បទល្មើសព្រៃឈើ និងបទល្មើសសត្វព្រៃមួយ​ចំនួន មានតម្រុយ​ពាក់ព័ន្ធការសម្អាតប្រាក់

មន្រ្តីជំនាញរកឃើញថា បទល្មើសដើមនៃបទល្មើសព្រៃឈើ និងបទល្មើសសត្វព្រៃមួយចំនួន មានតម្រុយពាក់ព័ន្ធនឹងការសម្អាតប្រាក់។

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា ការអនុវត្តច្បាប់ដើរតួនាទីសំខាន់ក្នុងការប្រយុទ្ធប្រឆាំងនឹងការសម្អាតប្រាក់ក្នុងបទល្មើសធនធានធម្មជាតិ។

លោកថ្លែងបែបនេះ នៅក្នុងវគ្គបណ្តុះបណ្តាលស្តីពី នីតិវិធីប្រតិបត្តិស្តង់ដារសម្រាប់ស៊ើបអង្កេត និងការរៀបចំសំណុំរឿងសម្អាតបទល្មើស និងបទល្មើសសម្អាតប្រាក់ក្នុងលក្ខខណ្ឌនៃដែនសមត្ថកិច្ចក្រសួងបរិស្ថាន ដើម្បីពង្រឹងយន្តការ និងបង្កើនសមត្ថភាពមន្ត្រីអនុវត្តច្បាប់ប្រឆាំងនឹងបទល្មើស​នៃការសម្អាតប្រាក់ពាក់ព័ន្ធនឹង​សំណំណុំរឿងដើមបទល្មើសធនធានធម្មជាតិ នៅថ្ងៃទី ១៨ ឧសភា ឆ្នាំ ២០២២។

អ្នកនាំពាក្យនៃក្រសួងបរិស្ថានរូបនេះ បានសង្កត់ធ្ងន់ថា មន្ត្រីនគរបាលយុត្តិធម៌ត្រូវពិនិត្យលើភស្តុតាង និងព័ត៌មានពាក់ព័ន្ធផ្សេងៗទាក់ទងនឹងបទល្មើសដើម ដើម្បីពិនិត្យលទ្ធភាពនៃការពន្លាតលើបទល្មើសនៃការសម្អាតប្រាក់ និងហិរញ្ញប្បទានភេរវកម្ម ប្រឆាំងនឹងជនសង្ស័យ។  លោកបន្តថា ក្នុងករណីរកឃើញបទល្មើសដើមនៃបទល្មើសព្រៃឈើ និងបទល្មើសត្វព្រៃដែលមានតម្រុយពាក់ព័ន្ធនឹងការសម្អាតប្រាក់ នោះជនល្មើស នឹងត្រូវទទួលទោសតាមច្បាប់។

បន្ថែមពីលើច្បាប់ស្តីពីតំបន់ការពារធម្មជាតិដែលមន្ត្រីនគរបាលក្រសួងបរិស្ថានប្រើប្រាស់ដើម្បីការពារនិងអភិរក្ស មន្ត្រីនគរបាលយុត្តិធម៌នៃក្រសួងបរិស្ថានមានច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្មជា​ឧបករណ៍ច្បាប់ដ៏មានតម្លៃ និងប្រសិទ្ធភាពក្នុងការការពារនិងអភិរក្សធនធានធម្មជាតិ​យើងឱ្យកាន់តែប្រសើរឡើង»។ នេះជាការបញ្ជាក់បន្ថែមរបស់លោក នេត្រ ភក្ត្រា។

បើតាមលោក នេត្រ ភក្ត្រា ជនល្មើសក្នុងបទល្មើសធនធានធម្មជាតិទាំងអស់ ដែលសមត្ថកិច្ចបង្រ្កាប និងស្រាវជ្រាវរកឃើញនឹងត្រូវប្រឈមមុខនឹងច្បាប់ទាំងពីរខាងលើ។

សូមបញ្ជាក់ថា វគ្គបណ្តុះបណ្តាលនេះ ធ្វើឡើងនៅមន្ទីរបរិស្ថានខេត្តស្ទឹងត្រែង ក្រោមអធិបតីភាពលោក នេត្រ ភក្ត្រា រដ្ឋលេខាធិការក្រសួងបរិស្ថាននិងជាអនុប្រធានអចិន្ត្រៃយ៍នៃក្រុមការងារប្រឆាំងការសម្អាតប្រាក់របស់ក្រសួងបរិស្ថាន៕ អត្ថបទ៖ នាង រតនៈ