លោក ខៀវ កាញារីទ្ធ៖ ប្រព័ន្ធផ្សព្វផ្សាយកម្ពុជា ដើរតួនាទីសំខាន់ លើកកម្ពស់គោលដៅអាស៊ាន

លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន មានប្រសាសន៍ថា ខណៈដែលកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ាន ក្នុងខែវិច្ឆិកាខាងមុខនេះ ប្រព័ន្ធផ្សព្វផ្សាយកម្ពុជា កំពុងដើរតួយ៉ាងសំខាន់ក្នុងការលើកកម្ពស់ការយល់ដឹងអំពីអាស៊ានដល់សាធារណជន។

លោករដ្ឋមន្ត្រី​បាន​ថ្លែង​បែបនេះ នៅ​​ក្នុង​ពិធី​បើក​ព្រឹត្តិការណ៍​ប្រព័ន្ធ​ផ្សព្វផ្សាយ ERIA-Khmer Times ស្តីពី​ការ​រាយការណ៍​អំពី​ការ​ធ្វើ​ជា​ប្រធាន​អាស៊ាន​របស់​កម្ពុជា​ឆ្នាំ​២០២២ ​នៅ​ថ្ងៃ​ទី២៥ ខែឧសភា ឆ្នាំ២០២២នេះ។

លោក ខៀវ កាញារីទ្ធ បានមានប្រសាសន៍ថា ប្រព័ន្ធផ្សព្វផ្សាយកម្ពុជា មានតួនាទីយ៉ាងសំខាន់ក្នុងការរួមចំណែកដល់ស្ថិរភាព ការអភិវឌ្ឍន៍សេដ្ឋកិច្ច និងការកសាងសហគមន៍អាស៊ាន ជាពិសេសក្នុងអំឡុងពេលដែលកម្ពុជាធ្វើជាប្រធានអាស៊ាន។ លោកបានបន្ថែមថា ប្រព័ន្ធផ្សព្វផ្សាយមានតួនាទីផ្តល់ព័ត៌មាន អប់រំ និងកម្សាន្ត ហើយវាជាដៃគូដែលមិនអាចជៀសបានក្នុងការសម្រេចបាននូវចក្ខុវិស័យ និងគោលដៅរបស់អាស៊ាន។

លោក ខៀវ កាញារីទ្ធ មានប្រសាសន៍បន្តថា៖ “ប្រព័ន្ធផ្សព្វផ្សាយនៅកម្ពុជា ដែលរួមមានប្រព័ន្ធផ្សព្វផ្សាយបោះពុម្ព ប្រព័ន្ធផ្សព្វផ្សាយអេឡិចត្រូនិក និងប្រព័ន្ធផ្សព្វផ្សាយថ្មី កំពុងដើរតួយ៉ាងសំខាន់ក្នុងការលើកកម្ពស់ការយល់ដឹងរបស់អាស៊ាន និងការយល់ដឹងរបស់ខ្លួនដល់សាធារណជន។ វា​ក៏​ត្រូវ​បាន​ប្រើជា​មជ្ឈដ្ឋាន​ដើម្បី​ធ្វើ​ឱ្យ​ប្រជាជន​កម្ពុជា​មាន​ទំនាក់ទំនង​ជាមួយ​ប្រជាជន​អាស៊ាន និង​ប្រជាជន​ទូទាំង​ពិភពលោក”។

លោករដ្ឋមន្ត្រី បានលើកទឹកចិត្តអ្នកសារព័ត៌មានគ្រប់ទម្រង់នៅកម្ពុជា និងពិភពខាងក្រៅ ឱ្យធ្វើអ្វីៗគ្រប់យ៉ាងដែលពួកគេអាចធ្វើបាន ដើម្បីផ្សព្វផ្សាយព័ត៌មានវិជ្ជមានបន្ថែមទៀតអំពីការធ្វើជាប្រធានរបស់កម្ពុជាឆ្នាំ២០២២ នៅក្នុងតួនាទីអាស៊ានជាប្រវត្តិសាស្ត្រ។

លោក Mohan Bandam នាយកគ្រឹះស្ថានបោះពុម្ព ខ្មែរថាមស៍ មានប្រសាសន៍ថា ការលើកកម្ពស់លទ្ធភាពទទួលបានព័ត៌មានអំពីអាស៊ាន និងសម្រាប់ឆ្នាំនេះ គឺជាវិស័យសំខាន់ដែលអ្នកសារព័ត៌មានពិភាក្សាដើម្បីយល់កាន់តែច្បាស់អំពីកម្ពុជា និងបញ្ហាប្រឈមកំពុងជួបប្រទះ ហើយនឹង​ត្រូវ​ប្រឈម​មុខ​ក្នុង​ជុំ​ទី​បី​របស់​ខ្លួន ​ក្នុង​នាម​ជា​ប្រធាន​គណៈកម្មការ​ប្រជុំ​ប្រទេស​ទាំង​ដប់។

លោក Mohan Bandam មានប្រសាសន៍បន្តថា៖ “យើងត្រូវវាយតម្លៃពីភាពធំធេងនៃមុខតំណែងជាប្រធានរបស់កម្ពុជា និងរបៀបដែលយើងរាយការណ៍អំពីព្រឹត្តិការណ៍ដែលនឹងកំណត់កេរ្តិ៍ដំណែលរបស់កម្ពុជាក្នុងអាណត្តិបច្ចុប្បន្ន ហើយមានថ្វីដៃដែលនឹងទទួលការចាប់អារម្មណ៍ ពីអ្នកខាងក្រៅនៃប្រទេសក្នុងតំបន់ និងលើសពីនេះទៀត”។

គួរបញ្ជាក់ថា សិក្ខាសាលារយៈពេលមួយថ្ងៃដែលសហការរៀបចំដោយ ERIA និង Khmer Times មានគោលបំណងបង្កើនសមត្ថភាពទាំងមូលរបស់អ្នកសារព័ត៌មានក្នុងស្រុកពីគ្រប់វេទិកាប្រព័ន្ធផ្សព្វផ្សាយដើម្បីយល់ និងរាយការណ៍អំពីបញ្ហាទាំងនេះក្នុងលក្ខណៈទូលំទូលាយ។

កម្ពុជា​បាន​ចូល​កាន់​តំណែង​ជា​ប្រធាន​អាស៊ាន​នៅ​ឆ្នាំ​នេះ ​ចំ​ពេល​មាន​ការ​អភិវឌ្ឍ​ថ្មី​ក្នុង​តំបន់ និង​អន្តរជាតិ ក្រោម​ប្រធានបទ “ASEAN A.C.T: អាស៊ាន ដោះស្រាយ​បញ្ហា​ប្រឈម​ជាមួយ​គ្នា”។ ​ប្រធានបទ​នេះ កម្ពុជា​មាន​គោលបំណង​កសាង​សហគមន៍​អាស៊ាន​ប្រកបដោយ​សុខដុមរមនា​ប្រកបដោយ​សន្តិភាព ស្ថិរភាព និង​វិបុលភាព ដោយកំណត់បញ្ហានយោបាយ សន្តិសុខ សេដ្ឋកិច្ច សង្គម និងវប្បធម៌ជាអាទិភាពសំខាន់ ដើម្បីពង្រឹងការចូលរួមរបស់អាស៊ានជាមួយនឹងតំបន់ទូលំទូលាយ និងប្រឈមមុខបញ្ហាសកល៕

អត្ថបទ៖ ច័ន្ទ វីរៈ