ព័ត៌មានជាតិ

ក្រសួងប្រកាសបិទរដូវនេសាទទូទាំងប្រទេសរយៈពេល៤ ខែ ចាប់ពីថ្ងៃទី ១ មិថុនា

បានផុស

២ years មុន

នៅ

ថ្ងៃសុក្រ ២៧ ឧសភា ២០២២

ដោយ

មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានប្រាប់ថា ការបិទរដូវនេសាទនៅទូទាំងប្រទេសនឹងចាប់ផ្តើមពីថ្ងៃទី ០១ ខែមិថុនា ឆ្នាំ២០២២ខាងមុខនេះតទៅដែលមានរយៈពេល៤ខែឆ្នាំដើម្បីការពារត្រីមេពូជនៅរដូវពងកូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងឱកាសដឹកនាំក្រុមការងារចុះពិនិត្យស្ថានភាព នៃការបំពេញភារកិច្ចរបស់កងកម្លាំងអន្តរាគមន៍ថ្នាក់ជាតិប្រចាំការនៅទីបញ្ជាការកន្លែងអភិរក្សជលផលកំពង់ភ្លុក នៃបឹងទន្លេសាប ស្ថិតក្នុងស្រុកប្រាសាទបាគងខេត្តសៀមរាបកាលពីពេលថ្មីៗនេះលោក ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានគណៈកម្មការអន្តរក្រសួង ដើម្បីទប់ស្កាត់ និងបង្រ្កាបបទល្មើសនេសាទនៅបឹងទន្លេសាបបានមានប្រសាសន៍ថា ចាប់ពីថ្ងៃទី០១ ខែមិថុនាដល់ខែកញ្ញាគឺមានរយៈពេល ៤ ខែដែលជារដូវបិទការនេសាទ ព្រោះជាពេលវេលាដែលមច្ឆា ជាតិពងកូន។ ដូច្នេះ រាល់ការធ្វើអាជីវកម្មនេសាទដោយប្រើប្រាស់ឧបករណ៍គ្រប់ប្រភេទគឺមិនត្រូវអនុញ្ញាតឡើយ។

ប៉ុន្តែយ៉ាងណាក៏ដោយលោក រដ្ឋលេខាធិការបានបន្តថាបើទោះបីជាក្នុងរដូវបិទនេសាទនេះមិនអនុញ្ញាតឲ្យប្រើប្រាស់ឧបករណ៍នេសាទសម្រាប់អ្នកធ្វើអាជីវកម្មក៏ពិតមែនក៏ប៉ុន្តែសម្រាប់ប្រជាពលរដ្ឋដែលប្រកប របរនេសាទជាលក្ខណៈគ្រួសារមិនត្រូវបានហាមឃាត់ឡើយក្នុងករណីដែលពួកគាត់ប្រើប្រាស់ឧបករណ៍តាមការកំណត់របស់ក្រសួងកសិកម្មដូចជា សន្ទូច ទ្រូ សំណាញ់ ឆ្នុក លប សាច់មងមានក្រឡា១ហ៊ុនកន្លះឡើងទៅ។

ជាមួយគ្នានេះលោករដ្ឋលេខាធិការបានណែនាំដល់មន្ត្រីជលផល ត្រូវសហការគ្នាលើកផ្លាកសញ្ញាដាក់នៅតាមទីសាធារណៈ និងទីប្រជុំជនដោយរាយឈ្មោះឧបករណ៍នេសាទដែលអាចប្រើបាន និងមិនអាចប្រើបានក្នុងរដូវបិទការនេសាទដើម្បីឱ្យប្រជានេសាទបានយល់ដឹងកាន់តែច្បាស់ចៀសវាងការប្រព្រឹត្តបទល្មើសក្នុងរដូវបិទនេសាទនេះ។

លោករដ្ឋលេខាធិការបានសម្ដែងនូវក្តីមោទន ភាពផងដែរ គឺចាប់តាំងពីពេលដែលប្រមុខរាជរដ្ឋាភិបាលបង្កើតគណៈកម្មការអន្តរក្រសួង ដើម្បីទប់ស្កាត់ និងបង្ក្រាបបទល្មើសនេសាទនៅបឹងទន្លេសាបមានរយៈពេល១ខែកន្លងមកនេះករណីបទល្មើសនេសាទមានការថយចុះជាលំដាប់ ពោលគឺមានតែ ១១ករណីប៉ុណ្ណោះ។

គួរបញ្ជាក់ថាពាក់ព័ន្ធនឹងការបិទរដូវនេសាទនេះដែរខេត្តស្ទឹងត្រែងបានប្រកាសបិទមុនគេដោយបានបិទតាំងពីថ្ងៃទី០១ឧសភារហូតដល់ថ្ងៃទី ៣០ ខែកញ្ញា ឆ្នាំ២០២២ខាងមុខ៕

អត្ថបទ៖ សំអឿន