Connect with us

ព័ត៌មានជាតិ

សម្ដេចតេជោ ហ៊ុន សែន ប្រកាសកែសម្រួលព្រំប្រទល់តំបន់ ៣ និងតំបន់ ២ ជុំវិញបឹងទន្លេសាប

បានផុស

នៅ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី ២៧ ខែឧសភានេះ បានចេញសេចក្តីថ្លែងសារពិសេស ជូនបងប្អូនជនរួមជាតិ ស្តីពី «បឹងទន្លេសាប»។ នៅក្នុងសេចក្ដីថ្លែងសារពិសេសនាព្រឹកនេះ សម្ដេចតេជោនាយករដ្ឋមន្ត្រី បានថ្លែងថា កាលពីពេលកន្លងទៅ សម្ដេចបានចេញបទបញ្ជាឲ្យធ្វើការបង្ក្រាប និងទប់ស្កាត់ការកាប់ទន្ទ្រានយកព្រៃលិចទឹក នៅជុំវិញបឹងទន្លេសាប ដែលដឹកនាំដោយលោកឧបនាយករដ្ឋមន្ត្រី ​ជា សុផារ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន បានបន្ថែមថា នៅពេលនេះទាក់ទងនឹងការអភិរក្ស និងការរៀបចំការទ្រទ្រង់ សម្រាប់ប្រជាកសិករ នៅជុំវិញបឹងទន្លេសាប គឺរាជរដ្ឋាភិបាលកម្ពុជា បានគិតគូរអំពីកត្តា ២។ កត្តាទីមួយ គឺកត្តាអភិរក្សចំពោះបឹងទន្លេសាប ដែលចាំបាច់ត្រូវតែមានការការពារ​ ដើម្បីជីវិតរបស់ប្រជាពលរដ្ឋ និងប្រទេសជាតិ។ កត្តាទីពីរ គឺត្រូវគិតអំពីប្រជាពលរដ្ឋ ដែលរស់នៅទីនោះ។

ចំណុចនេះ សម្ដេចតេជោនាយករដ្ឋមន្ត្រី​ បានចេញបញ្ជាឲ្យលោកឧបនាយករដ្ឋមន្ត្រី ជា សុផារ៉ា និងអាជ្ញាធរខេត្តនៅជុំវិញបឹងទន្លេសាប ធ្វើការកែសម្រួលព្រំប្រទល់តំបន់ ៣ និងតំបន់ ២ ដែលមានការសម្រេចរួចទៅហើយ គឺមានខេត្តកំពង់ធំ សម្រួលផ្ទៃដីចំនួន ១០០,១៤ហិកតា ចេញពីតំបន់ ២ បញ្ចូលមកតំបន់ ១ នៃតំបន់ទន្លេសាប ជូនប្រជាពលរដ្ឋចំនួន ៩,១៤៤គ្រួសារ និងកែសម្រួលផ្ទៃដីទំហំ ៦, ៣៦៥ហិកតា ស្មើនឹង ២,០២៥ក្បាលដី ចេញពីតំបន់ ៣ បញ្ចូលមកតំបន់ ២ នៃបឹងទន្លេសាប ជូនប្រជាពលរដ្ឋចំនួន ១, ៧៤៩គ្រួសារ នៅខេត្តបន្ទាយមានជ័យ។

ក្នុងនោះ ក៏កែសម្រួលផ្ទៃដីទំហំ ៥៨ហិកតា និង ១៦អារ ចេញពីតំបន់ ៣ បញ្ចូលមកតំបន់ ២ នៃបឹងទន្លេ​សាប ជូនប្រជាពលរដ្ឋចំនួន ២២គ្រួសារ និងខេត្តពោធិ៍សាត់ ផ្ទៃសម្រួលផ្ទៃដី ៣, ៤៤៨ហិកតា ចេញពីតំបន់ ៣ បញ្ចូលមកតំបន់ ២ នៃបឹងទន្លេសាប ជូនប្រជាពលរដ្ឋចំនួន ១,៦៥៨គ្រួសារ។

សម្ដេចតេជោនាយករដ្ឋមន្ត្រី បានឲ្យដឹងបន្តទៀតថា​ កាលពីថ្ងៃម្សិលមិញនេះ សម្ដេចបានដាក់ចេញបទបញ្ជា ជូនលោកឧបនាយករដ្ឋមន្ត្រី ជា សុផារ៉ា បន្តការពិនិត្យបន្តទៅទៀត។ ការពិនិត្យនោះ គឺផ្អែកទៅលើគោលការណ៍ចំនួន ៣ សំខាន់ ដែលគោលការណ៍ទីមួយ​ គឺការពិនិត្យពិចារណាដោយផ្អែកលើស្ថានភាពជាក់ស្ដែង នៃភាពភូមិសាស្រ្ដនីមួយៗ ក្នុងកាត់ឆ្វៀលចេញពីតំបន់ ២ ឬតំបន់ ៣ សម្រាប់ទីតាំង ដែលមានប្រជាជនរស់នៅជាក់ស្ដែង កើតជាភូមិករ ជាឃុំ ជាស្រុក ​មានទីវត្តអារាម ហើយភូមិករខ្លះ គឺកើតមានតាំងពីយូរយារណាស់មកហើយ។

បញ្ហានេះត្រូវតែមានការគិត ហើយមិនត្រូវមានការងាប់ក្រឡា ទោះបីជាស្ថិតនៅតំបន់ ៣ ឬនៅតំបន់ ២។ ប៉ុន្តែយើងត្រូវតែទទួលស្គាល់ថា តំបន់នេះ គឺជាតំបន់ដែលមានប្រជាពលរដ្ឋរស់នៅ តាំងពីមុនពេលដែលយើងកំណត់ក្របខណ្ឌ តំបន់ ១ តំបន់ ២ តំបន់ ៣ ទៅទៀត។ គោលការណ៍​ទីពីរ គឺត្រូវកែសម្រួលព្រំប្រទល់ តំបន់ ២ និងតំបន់ ៣ ឡើងវិញ ដោយផ្អែកលើការជាក់ស្ដែង ជាពិសេសផ្ទៃដីដែលចាំបាច់ និងសមហេតុផល សម្រាប់ការពារតំបន់ព្រៃលិចទឹក នៃបឹងទន្លេសាប ក្នុងស្ថានភាពថ្មីដែលផ្ទៃបឹងមា​នការគោករាក់ ហើយប្រជានជនធ្លាប់បង្កបង្កើនផល។

គោលការណ៍ទីបី គឺស្នើឲ្យអាជ្ញាធរបឹងទន្លេសាប សហការជាមួយក្រសួងធនធានទឹក ជាមួយក្រសួងកសិកម្ម ក៏ដូចអាជ្ញាធរខេត្តជុំវិញបឹងទន្លេសាបទាំង ៦ ដោយត្រូវពិនិត្យមើលថាតើ កន្លែងណាខ្លះដែលចាំបាច់ត្រូវបូមស្ដារ ព្រោះឥឡូវនេះរៀងរាល់ឆ្នាំដីល្បាប់ហូរចូលទៅ ជាមួយនឹងការធ្លាក់ចុះនៃស្លឹកឈើ ធ្វើឲ្យបឹងទន្លេសាបពីមួយថ្ងៃទៅមួយថ្ងៃ មានការរាក់បន្តិចម្ដងៗ៕

អត្ថបទ៖ ឃួន សុភ័ក្រ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម