ព័ត៌មានជាតិ

ស្រ្តីម្នាក់ប្រាប់មូលហេតុ សុខចិត្តធ្វើផ្ទះមុនសង់បង្គន់

បានផុស

៤ years មុន

នៅ

ថ្ងៃអាទិត្យ ២៩ ឧសភា ២០២២

ដោយ

យូរឆ្នាំមកហើយដែលអ្នកមីង មុត ហាន់ ពលរដ្ឋរស់នៅឃុំរុនតាឯក ស្រុកបន្ទាយស្រី គ្មានបង្គន់ប្រើប្រាស់ដូចគេ ដោយសារពុំយល់ពីអនាម័យ ទើបសុខចិត្តធ្វើផ្ទះមុនសង់បង្គន់។

ស្រ្តីវ័យ ៧២ ឆ្នាំបានរំលឹកឲ្យដឹងថា តាំងពីជំនាន់ឪពុកម្តាយ តែងនាំគ្នាដើរទៅបន្ទោរបង់នៅតាមវាលស្រែ គុម្ពោធព្រៃ ឬជីកដីកប់ជាដើមពុំសូវគិតគូរពីអនាម័យទេ ទើបចេះតែឧស្សាហ៍ឈឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្រ្តីដែលមានកូន ៤ នាក់ ដែល ៣ មានប្ដីប្រពន្ធការបែកផ្ទះអស់ នៅសល់តែកូនស្រីក្រមុំម្នាក់រស់នៅជាមួយក៏បារម្ភពីកូនស្រីខ្លាចយប់ព្រលប់ទៅបត់ដៃបត់ជើងជួបមនុស្សអាក្រក់ធ្វើបាប តែពេលនេះលែងភ័យបារម្ភដូចមុនទៀតហើយ។

ជាមួយស្នាមញញឹម ស្រ្តីរូបនេះប្រាប់ថា ឥលូវខុសគ្នាឆ្ងាយណាស់ ដោយសារមានការជួយជ្រោមជ្រែងពីអាជ្ញាធរអប្សរាបានជួយធ្វើបង្គន់ មានតម្លៃជាង ៣០០ ដុល្លារ និងអណ្តូងទឹក 1 រួមទាំងធុងទឹកចម្រោះ ទឹកស្អាតមួយទៀត ដែលឧបត្ថម្ភដោយអង្គការ plan គឺលែងពិបាកដូចមុនទៀតហើយ។

អង្គុយជិតលួចញញឹមញញែមតិចៗ កូនស្រីរបស់ស្រ្តីរូបនេះក៏ឲ្យដឹងដែរថា ពេលនេះនាងសប្បាយចិត្តលែងភិតភ័យដូចមុនទៀត ព្រោះមានបង្គន់មួយនៅក្បែរផ្ទះគឺលែងពិបាក ទៅបត់ជើងតាមវាលស្រែ ឬ ព្រៃឆ្ងាយពីផ្ទះ ខ្លាចមានមនុស្សអាក្រក់ចាប់ ឬសត្វធាតុផ្សេងៗខាំឬទិច ដូចជា ពស់ ក្អែប ជាដើម។

មេឃុំរុនតាឯកបានបញ្ជាក់ថា គ្រួសារស្រ្តីមុតហាន់បានរួចផុតពីការអត់បង្គន់ មកមានបង្គន់ប្រើ ក្រោមការចូលរួមគាំទ្រឧបត្ថម្ភពីសប្បុរសជន។ ការមានបង្គន់អនាម័យប្រើប្រាស់បានសមរម្យ នឹងធ្វើឲ្យគ្រួសារមួយនេះលែងលំបាកដើរបត់ដៃបត់ជើង ពាលវាលពាសកាលដូចមុនទៀត៕

អត្ថបទ៖ រុងរឿង