ព័ត៌មានជាតិ

សម្ដេចតេជោហ៊ុន សែន ៖ ត្រូវទទួលស្គាល់ថា កុមារគឺជាអ្នកបន្តវេនក្នុងការជួយស្ដារ កសាង និងអភិវឌ្ឍសង្គមកម្ពុជា

បានផុស

៤ years មុន

នៅ

ថ្ងៃអង្គារ ៣១ ឧសភា ២០២២

ដោយ

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាលើកឡើងបែបនេះ នៅក្នុងសារលិខិតចូលរួមអបអរសាទរខួបលើកទី៧៣ ទិវាកុមារអន្តរជាតិ ១ មិថុនា ខួបលើកទី២១ ទិវាពិភពលោកប្រឆាំងពលកម្មកុមារ ១២ មិថុនា និងទិវាកុមារកម្ពុជាឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសារលិខិតសម្តេចតេជោហ៊ុន សែន បានលើកឡើងថា ទោះបីកម្ពុជាមិនបានប្រារព្ធមិទ្ទិញអបអរសាទររយៈពេល៣ឆ្នាំជាប់គ្នាក៏ដោយ ក៏រាជរដ្ឋាភិបាលមិនដែលបំភ្លេចថ្ងៃជាប្រវត្តិសាស្ត្រនេះដែរ។ ក្នុងនាមប្រមុខរាជរដ្ឋាភិបាលកម្ពុជា និងក្នុងនាមជាប្រធានកិត្តិយសក្រុមប្រឹក្សាជាតិកម្ពុជាដើម្បីកុមារ សម្ដេចបានសម្ដែងនៅមនោសញ្ជេតនានឹករលឹក និងព្រួយបារម្ភពីសុខទុក្ខរបស់កុមារទាំងអស់នៅទូទាំងប្រទេសអស់ពីដួងចិត្ត។

បើតាមសម្ដេចតេជោ ហ៊ុន សែន រាជរដ្ឋាភិបាលតែងតែយកចិត្តទុកដាក់ និងមានឆន្ទៈមោះមុត ប្ដេជ្ញាចិត្តខ្ពស់ក្នុងការលើកកម្ពស់សិទ្ធិកុមារ និងបានលើកទឹកចិត្តដល់ជនរួមជាតិ ជាពិសេសត្រូវទទួលស្គាល់ថា “កុមារ គឺជាអ្នកដែលត្រូវបន្តវេនក្នុងការជួយស្ដារ កសាង និងអភិវឌ្ឍន៍សង្គមកម្ពុជា”។ សម្តេចថា “សូមកុំអស់សង្ឃឹម ប្រទេសកម្ពុជាយើងកំពុងត្រូវការមនុស្ស ដែលមានធនធាន រួមគ្នាបន្តវិនិយោគកុមារនៅថ្ងៃនេះ និងបង្កើតបានធនធានមនុស្ស ដែលមានជំនាញប្រកបដោយសក្តានុពលនាពេលអនាគត សំដៅធ្វើឲ្យសម្រេចបាននូវការអភិវឌ្ឍប្រកបដោយចីរភាព”។

សម្តេចតេជោមានប្រសាសន៏ទៀតថា ក្នុងនាមជាសមាជិកភាព ជាដៃគូសកល ដើម្បីលុបបំបាត់អំពើហិង្សាលើកុមារ កម្ពុជាយើងបានបោះជំហានទៅមុខក្នុងឆន្ទៈបង្ហាញការប្ដេជ្ញាចិត្តរួមគ្នាលុបបំបាត់អំពើហិង្សាលើកុមារ និងអំពើរំលោភបំពានគ្រប់រូបភាពមកលើកុមារ សំដៅធ្វើឲ្យកាន់តែប្រសើរឡើងនូវការអនុវត្តអនុសញ្ញាស្ដីពីសិទ្ធិកុមារ។

សម្ដេចតេជោហ៊ុន សែន បញ្ជាក់ទៀតថា រដ្ឋាភិបាលកម្ពុជានៅតែបន្តប្ដេជ្ញាចិត្តលើកកម្ពស់ការគោរពសិទ្ធិកុមារ និងផ្ដល់កិច្ចការពារយ៉ាងពេញទំហឹងនៅគ្រប់ស្ថានភាព ដោយបានបង្កើតនូវយន្តការជាច្រើន ក្នុងការគ្រប់គ្រង និងផ្ដល់សេវាដល់មុខសញ្ញាកុមារទូទៅ កុមារងាយរងគ្រោះ និងកុមាររងគ្រោះ។

ជាមួយគ្នានោះសម្ដេចតេជោ ហ៊ុន សែន បានស្នើឲ្យអាជ្ញាធរមូលដ្ឋានគ្រប់លំដាប់ថ្នាក់បន្តពង្រឹងយន្តការសម្របសម្រួល ក្នុងការបង្ការទប់ស្កាត់ អន្តរាគមន៍ និងការឆ្លើយតបលើករណីកុមារ ដើម្បីលើកកម្ពស់ និងផ្ដល់សេវាយុត្តិធម៍សង្គម ដោយធានាឲ្យមានសមភាពរវាងកុមារា និងកុមារី បង្កើតឱកាសស្មើភាពគ្នាក្នុងកម្លាំងចលករសង្គម សម្រាប់ជីវភាពសាធារណៈ ជីវភាពនយោបាយ សកម្មភាពសង្គម វប្បធម៌ សិល្បៈ សាសនា និងសកម្មភាពផ្សេងៗទៀត៕

ដោយ ៖ កោះកែវ