គ.ជ.ប​ បង្ហាញ​ពីសភាពការណ៍​ទូទៅថ្ងៃទី១១​ នៃការ​ឃោសនា​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់

នៅថ្ងៃទី ៣១​ ខែឧសភា​ ឆ្នាំ២០២២ ​ជាថ្ងៃទី១១​ នៃយុទ្ធនាការឃោសនាបោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់ អាណត្តិទី៥ ឆ្នាំ២០២២ គណបក្សនយោបាយ ដែលមានបញ្ជីបេក្ខជន​ឈរ​ឈ្មោះបានធ្វើសកម្មភាពឃោសនាតាមលទ្ធភាព និងមធ្យោបាយផ្សេងៗ ដើម្បីស្វែងរកការ​គាំទ្រពី​អ្នក​បោះឆ្នោត។ 

​បើតាមគណៈកម្មាធិការជាតិរៀបចំការបោះឆ្នោត(គ.ជ.ប)​ ក្នុងថ្ងៃទី ១១នេះ ​គណបក្សនយោបាយ​បានធ្វើសកម្មភាព​ឃោសនាជាអាទិ៍​ ការហែ​ក្បួន ការជួបប្រជុំ ​ការចែកខិត្តប័ណ្ណ ​និងការចាក់មេក្រូផ្សព្វផ្សាយ​នៅតាមមណ្ឌល​បោះឆ្នោត​នីមួយៗ។

នៅខេត្តព្រៃវែង​ គណបក្សភ្លើងទៀន​ បានធ្វើសកម្មភាព​ឃោសនាចំនួន ១១៦​ ឃុំ សង្កាត់​ ក្នុងនោះមានការហែក្បួនចំនួន​៣ ឃុំ សង្កាត់ គណបក្សសញ្ជាតិកម្ពុជា​ហែក្បួនចំនួន១ ឃុំ គណបក្សហ៊្វុនស៊ិនប៉ិចហែក្បួនចំនួន ៣ ឃុំ សង្កាត់ គណបក្សយុវជនកម្ពុជាហែក្បួន១ ឃុំ គណបក្សសំបុកឃ្មុំសង្គមប្រជាធិបតេយ្យហែក្បួនចំនួន ១ ឃុំ គណបក្សប្រជាជនកម្ពុជាចំនួន ១១៦ ឃុំ សង្កាត់ គណបក្សកម្ពុជានិយម ចំនួន៨ ឃុំ សង្កាត់ គណបក្ស ខ្មែររួបរួមជាតិ ចំនួន៧ ឃុំ សង្កាត់ គណបក្សខ្មែរស្រឡាញ់ជាតិចំនួន៥ ឃុំ សង្កាត់ គណបក្សឆន្ទៈខ្មែរ ចំនួន៤ ឃុំ សង្កាត់ និងគណបក្សខ្មែរតែមួយ ចំនួន១ ឃុំ។ 

ដោយឡែក នៅខេត្តឧត្ដរមានជ័យ គណបក្សភ្លើងទៀន បានហែក្បួនចំនួន ២ ឃុំ ហើយគណបក្ស​ប្រជាជនកម្ពុជា គណបក្ស ខ្មែររួបរួមជាតិ និងគណបក្សខ្មែរស្រឡាញ់ជាតិ បានធ្វើការជួបប្រជុំចែក​ខិត្តប័ណ្ណ និងចាក់មេក្រូផ្សព្វផ្សាយនៅទីស្នាក់ការគណបក្ស និងនៅតាមភូមិក្នុងឃុំ សង្កាត់មួយ​ចំនួន។

ជារួមសភាពការណ៍ទូទៅ នៃដំណើរការឃោសនាបោះឆ្នោតរបស់​គណបក្សនយោបាយក្នុង​ថ្ងៃទី១១នេះ បានប្រព្រឹត្តទៅក្នុងបរិយាកាសមានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង៕

អត្ថបទ៖ កោះកែវ