លោកជំទាវ ម៉ែន សំអន ផ្តាំផ្ញើប្រជាពលរដ្ឋទៅបោះឆ្នោត ជូនគណបក្សប្រជាជនកម្ពុជា ឲ្យបានគ្រប់ៗគ្នា  

លោកជំទាវ ម៉ែន សំអន អនុប្រធានគណបក្សប្រជាជនកម្ពុជា បានថ្លែងផ្តាំផ្ញើដល់ប្រជាពលរដ្ឋទូទាំងខេត្តស្វាយរៀង អញ្ជើញទៅបោះឆ្នោត ជូនគណបក្សប្រជាជនកម្ពុជា ឲ្យបានគ្រប់ៗគ្នា ព្រោះគណបក្សប្រជាជនកម្ពុជា បានជួយសង្គ្រោះអាយុជីវិតយើងគ្រប់ៗគ្នា ឲ្យមានអ្វីៗគ្រប់យ៉ាងដូចសព្វថ្ងៃនេះ។

លោកជំទាវ ម៉ែន សំអន បាន​ផ្ដាំផ្ញើបែបនេះ ខណៈអញ្ជើញជាអធិបតី ក្នុងពិធីបិទយុទ្ធនាការឃោស​នាបោះឆ្នោត ជ្រើស​រើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២២ នៅស្នាក់ការគណបក្សឃុំស្វាយជ្រំ ខេត្តស្វាយរៀង នាព្រឹកថ្ងៃសុក្រ ទី ៣ ខែមិថុនា ឆ្នាំ ២០២២។ ពិធីនេះ ក៏មានការអញ្ជើញចូលរួមពីថ្នាក់ដឹកនាំ, សមាជិក-សមាជិកាគណបក្សប្រជាជនកម្ពុជា, ប្រធានគណបក្សខេត្តស្វាយរៀង, ក្រុមការងារគណបក្សចុះជួយឃុំ-សង្កាត់ និងសកម្មជនជាច្រើនរូបទៀត នៅក្នុងខេត្តស្វាយរៀង។

សម្រាប់យុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ មានរយៈពេល ១៤ថ្ងៃ ដែលបានចាប់ផ្តើមកាលពីថ្ងៃទី ២១ ខែឧសភា ឆ្នាំ ២០២២ ហើយត្រូវបិទបញ្ចប់នៅថ្ងៃទី ៣ ខែមិថុនា ឆ្នាំ ២០២២នេះ ដោយជាទូទៅយុទ្ធនាការ ក្នុងរយៈពេលប៉ុន្មានថ្ងៃកន្លងទៅនេះ បានប្រព្រឹត្តិទៅក្រោមបរិយាកាសល្អប្រសើរ គ្មានអំពើហិង្សាកើតឡើងឡើយ។

លោកជំទាវ បានផ្ដាំផ្ញើសួរសុខទុក្ខ ពីសំណាក់ថ្នាក់ដឹកនាំរបស់គណបក្សប្រជាជនកម្ពុជា ព្រមទាំងបានថ្លែងកោតសរសើរ ជូនចំពោះសកម្មជន អ្នកគាំទ្រគណបក្សប្រជានកម្ពុជាទាំងអស់ ប្រជាពលរដ្ឋ កងកម្លាំងប្រដាប់អាវុធគ្រប់ប្រភេទ និងមន្ត្រី គ.ជ.ប ដែលបានសហការរួមគ្នាគោរពច្បាប់បោះឆ្នោត និងនីតិវិធីបោះឆ្នោតយ៉ាងពេញលេញ ប្រកបដោយកិត្តិយស និងសេចក្តីថ្លៃថ្នូរ ធានាបាននូវសន្តិសុខសណ្តាប់ធ្នាប់ ធ្វើឲ្យដំណើរការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ឆ្នាំ ២០២០ ប្រព្រឹត្តបានយ៉ាងរលូន នៅក្នុងខេត្តស្វាយរៀង។

លោកជំទាវ ម៉ែន សំអន ក៏បានអំពាវនាវឲ្យប្រជាពលរដ្ឋទាំងអស់គ្នា សូមអញ្ជើញទៅបោះឆ្នោតជូនគណបក្សប្រជាជនកម្ពុជា ដែលមានរូបទេវតាបាចផ្កា ជាសញ្ញាសំគាល់លើសន្លឹកឆ្នោត នៅតាមការិយាល័យបោះឆ្នោត ក្នុងមណ្ឌលបោះឆ្នោតនៅឃុំ-សង្កាត់ ដោយយកភ្ជាប់ជាមួយខ្លួននូវអត្តសញ្ញាណប័ណ្ណសញ្ជាតិខ្មែរ ឬលិខិតបញ្ជាក់អត្តសញ្ញាណ (ឯ.អ) ឲ្យបានគ្រប់ៗគ្នាកុំបីខាន ព្រោះបក្សទេវតា បានជួយសង្គ្រោះអាយុជីវិតយើងគ្រប់ៗគ្នាឲ្យមានអ្វីៗគ្រប់យ៉ាងដូចសព្វថ្ងៃនេះ ជាពិសេសសុខសន្តិភាពនេះតែម្ដង ដែលមនុស្សលើពិភពលោកប្រាថ្នាចង់បាន៕

អត្ថបទ៖ វិមាន