សម្ដេចតេជោ ហ៊ុន សែន ថ្លែងអំណរគុណប្រជាពលរដ្ឋខ្មែរ ដែលបានបោះឆ្នោតជូនគណបក្សប្រជាជនកម្ពុជា

សម្ដេចតេជោ ហ៊ុន សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា បានថ្លែងអំណរគុណដល់ប្រជាពលរដ្ឋខ្មែរ ដែលបានបោះឆ្នោតជូនគណបក្សប្រជាជនកម្ពុជា សម្រាប់ការបោះឆ្នោតឃុំ-សង្កាត់ កាលពីពេលថ្មីៗនេះ។

សម្តេចតេជោនាយករដ្ឋមន្ត្រី បាន​ថ្លែងក្នុងពិធីបិទ និងប្រគល់សញ្ញាបត្រក្នុងវគ្គបណ្ដុះបណ្ដាលឆ្នាំ ២០​២០-២០២១ និងបើកវគ្គបណ្ដុះបណ្ដាលឆ្នាំ ២០២២ របស់សាលាភូមិន្ទរដ្ឋបាលជាង ២ពាន់នាក់ នៅព្រឹកថ្ងៃទី ១៣ ខែមិថុនានេះថា ក្នុងនាមជាប្រធានគណបក្សប្រជាជនកម្ពុជា សម្ដេចសូមថ្លែងអំណរគុណដល់ប្រជាពលរដ្ឋខ្មែរ ដែលបានបោះឆ្នោតជូនគណបក្សប្រជាជនកម្ពុជា ទទួលបានសំឡេងគាំទ្រដ៏ច្រើនលើសលប់។

សម្ដេចតេជោ ហ៊ុន សែន បានថ្លែងបន្តថា «ចំណុចនេះ វាបានបង្ហាញឲ្យឃើញច្បាស់ថា ប្រជាជនបានបោះឆ្នោតជ្រើសរើស យកសន្តិភាព និងការអភិវឌ្ឍហើយ ព្រោះនយោបាយរបស់គណបក្សប្រជាជន ពេលណា ក៏ដូចជាពេលណា គឺសន្តិភាព និងការអភិវឌ្ឍ»។

សូមជម្រាបថា ការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ កាលពីថ្ងៃទី ៥ ខែមិថុនា ឆ្នាំ ២០២២កន្លងទៅនេះ គណបក្សប្រជាជនកម្ពុជា ទទួលបានសំឡេងគាំទ្រដ៏ច្រើនលើសលប់៕

អត្ថបទ៖ ឃួន សុភ័ក្រ