រដ្ឋមន្ត្រីសុខាភិបាល​ស្នើឱ្យក្រុមគ្រូពេទ្យកម្ពុជា​ខិតខំរៀនសូត្រ​ពីបច្ចេកទេសវេជ្ជសាស្ត្រ​ថ្មីៗពីអ្នក​ជំនាញកូរ៉េ

លោកសាស្ត្រាចារ្យ ម៉ម ប៊ុនហេង រដ្ឋមន្ត្រី ​ក្រសួងសុខាភិបាល​បានណែនាំឱ្យ​ក្រុមគ្រូពេទ្យ​ផ្នែកច្រមុះ ត្រចៀក​និងបំពង់កនៃមន្ទីរពេទ្យព្រះអង្គឌួង​ត្រូវខិតខំសិក្សារៀនសូត្រ​ពីបច្ចេកទេសវេជ្ជសាស្ត្រថ្មីៗ​ពីសាស្ត្រាចារ្យមកពីសកលវិទ្យាល័យកូរ៉េដែលមានជំនាញ និងបទពិសោធន៍ខ្ពស់​ដើម្បីយក​ចំណេះ​និងជំនាញទាំងនេះមកព្យាបាលជូនប្រជាពលរដ្ឋប្រកបដោយប្រសិទ្ធិភាពនិងគុណភាពខ្ពស់។

​ថ្លែងក្នុងសិក្ខាសាលារួមកម្ពុជាកូរ៉េកលើកទី២ស្តីពីជំងឺត្រចៀក ច្រមុះនិងបំពង់ក នៅព្រឹកថ្ងៃ​ទី២៥​ ខែមិថុនានេះ នៅសណ្ឋាគារហាយ៉ាតរីជិនស៊ីភ្នំពេញ ​លោកសាស្ត្រាចារ្យបាន​មានប្រសាសន៍ថា​ សិក្ខាសាលានេះគឺជាផ្នែកមួយនៃការបណ្តុះបណ្តាលធនធានមនុស្សរវាងគ្រូពេទ្យផ្នែកច្រមុះត្រចៀកបំពង់កជាមួយមជ្ឈមណ្ឌលសកលវិទ្យាល័យស៊ុនជុនយ៉ាងនៃសាធារណរដ្ឋកូរ៉េដើម្បីធ្វើការពិភាក្សាគ្នាផ្លាស់ប្តូរបទពិសោធន៍គ្នាហើយមានបញ្ហាអ្វីរួមគ្នារកដំណោះស្រាយសំដៅធ្វើយ៉ាងណាឱ្យក្រុមគ្រូពេទ្យនិងគិលានុប្បដ្ឋាកយើងកាន់តែមានសមត្ថភាពខ្ពស់និងមានភាពប៉ិនប្រសព្វ។

លោករដ្ឋមន្ត្រីបានស្នើឱ្យមន្ទីរពេទ្យព្រះអង្គឌួងធ្វើការសហការជាមួយសកលវិទ្យាល័យកូរ៉េតាមរយៈប្រព័ន្ធតេឡេម៉ាស៊ីនដើម្បីអាចឱ្យក្រុមគ្រូពេទ្យនៅមន្ទីរពេទ្យអាចទំនាក់ទំនងជាមួយអ្នកជំនាញនិងវេជ្ជបណ្ឌិតនៅសាកលវិទ្យាល័យនៅកូរ៉េបាននៅពេលដែលមានបញ្ហាអ្វីមួយដើម្បីធ្វើការពិភាក្សាគ្នា។ចំណែកខាងកូរ៉េប្រសិនបើមានអ្វីផ្នែកវេជ្ជសាស្ត្រដែលថ្មីៗអាចផ្តល់ជូនមកគ្រូពេទ្យនៅកម្ពុជាបន្ថែមក្រៅពីការបញ្ជួនគ្រូពេទ្យទៅសិក្សាដោយផ្ទាល់នៅសកលវិទ្យាល័យកូរ៉េ។

ជាមួយគ្នានេះដែរលោករដ្ឋមន្ត្រីក៏បានណែនាំឱ្យមន្ទីរពេទ្យព្រះអង្គឌួងបញ្ជួនគ្រូពេទ្យជំនាញផ្នែកច្រមុះត្រចៀកនិងបំពង់កនៅតាមមន្ទីរពេទ្យតាមបណ្តាខេត្តដែលកូរ៉េបានកំពុងជួយសាងសង់ដើម្បីបង្កើនសមត្ថភាពគ្រូពេទ្យតាមខេត្តផ្នែកទាំងនេះឱ្យបានកាន់តែប្រសើរព្រោះថាវិស័យវេជ្ជសាស្ត្រមានការប្រែប្រួលឥតឈប់ឈរដែលគ្រូពេទ្យចាំបាច់បណ្តុះបណ្តាលដលម្បីធ្វើយ៉ាងណាដើរឱ្យទាននិន្នាការរីកចំរើនរបស់ពិភពលោក។

លោក គីម ខ្វាងវុក ប្រធានស្តីទីទីភ្នាក់ងារសហប្រតិបត្តិការអន្តរជាតិកូរ៉េ​ប្រចាំការិយាល័យប្រទេស​កម្ពុជា​បានមានប្រសាសន៍ថាគោលបំណងនៃសិក្ខាសាលាលើកទី ២ នេះគឺដើម្បីចែករំលែក​និងផ្លាស់ប្ដូរបទពិសោធន៍គ្នាទៅវិញទៅមកនិងជំនាញរបស់ប្រទេសនីមួយៗកម្ពុជាកូរ៉េនៅក្នុងវិស័យត្រចៀកច្រមុះនិងបំពង់កជាពិសេសក្នុងការពង្រីកប្រសិទ្ធភាពនៃការព្យាបាលរួមគ្នារវាងផ្នែកត្រចៀកច្រមុះនិងបំពង់ក ក្បាលនិងក ដោយប្រើវេជ្ជសាស្រ្តពហុជំនាញ។

លោកបានបន្តថារដ្ឋាភិបាលនៃសាធារណរដ្ឋកូរ៉េតាមរយៈទីភ្នាក់ងារសហប្រតិបត្តិការអន្តរជាតិកូរ៉េបានផ្ដល់ជំនួយឥតសំណងនូវទឹកប្រាក់ចំនួន៨លានដុល្លារអាមេរិកសម្រាប់គម្រោងការកសាងសមត្ថភាពសម្រាប់មជ្ឈមណ្ឌលត្រចៀកច្រមុះនិងបំពងកនៅមន្ទីពេទ្យព្រះអង្គដួងដែលបានអនុវត្តចាប់ពីឆ្នាំ២០១៨ រហូតដល់ឆ្នាំ២០២២នេះហើយអគារត្រចៀកច្រមុះនិងបំពង់កមួយខ្នងដែលមានកម្ពស់ ៥ជាន់បានសាងសង់រួចរាល់ហើយនៅក្នុងបរិវេណមន្ទីរពេទ្យព្រះអង្គឌួងហើយអគារនេះបានបំពាក់សម្ភារៈទំនើបបំផុតចាំបាច់នានាដើម្បីពិនិត្យព្យាបាលនិងវះកាត់ធ្វើយ៉ាងណាដើម្បីបង្កើនគុណភាពសេវាកម្មក្នុងមន្ទីរពេទ្យឲ្យល្អប្រសើរមួយកម្រិតថែមទៀត។

លោកបានបន្តទៀតថាក្រៅពីលើកកម្ពស់ផ្នែកហេដ្ឋារចនាសម្ព័ន្ធរូបវន្ត័សមត្ថភាពរបស់វេជ្ជបណ្ឌិតជំនាញឯកទេសនិងបុគ្គលិកទាំងអស់ត្រូវបានបង្កើនសមត្ថភាពតាមរយៈកម្មវិធីបណ្តុះបណ្តាលនិងការផ្ទេរចំណេះដឹងនិងចំណេះធ្វើពីវេជ្ជបណ្ឌិតជនជាតិកូរ៉េផងដែរ៕

អត្ថបទ៖ សំអឿន