ក្រសួងសុខាភិបាល ស្នើចាត់វិធានការតាម​ផ្លូវច្បាប់ទៅលើអ្នកលក់ បារីអេឡិចត្រូនិក​តាមបណ្តាញសង្គម

 ក្រសួងសុខាភិបាល បានស្នើឱ្យអាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងស្ថាប័នពាក់ព័ន្ធជួយចាត់វិធានការ​តាមផ្លូវច្បាប់ ទៅលើការផ្សព្វផ្សាយការលក់ផលិតផលបារី អេឡិចត្រូនិក អេចឈ៍ ធី ភីនៅតាមរយៈបណ្តាញ​ព័ត៌មានសង្គម។

ថ្លែងក្នុងកិច្ចប្រជុំលើកទី២៦ នៃគណៈកម្មាធិការត្រួតពិនិត្យផលិតផលថ្នាំជក់នៅព្រឹកថ្ងៃទី២៧មិថុនានេះ លោកវេជ្ជបណ្ឌិត អ៊ឹង ភីរុន រដ្ឋលេខាធិការក្រសួងសុខាភិបាល និងជាអនុប្រធាន​អចិន្ត្រៃយ៍​គណៈកម្មាធិការត្រួត​ពិនិត្យផលិតផលថ្នាំជក់បានមានប្រសាសន៍ថា «បារីអេឡិចត្រូនិក ជាផលិតផលថ្មីដែលបង្កហានិភ័យធ្ងន់ធ្ងរ​ទាំងអ្នក​ប្រើប្រាស់ និងអ្នកស្រូបយកចំហាយ។ ដូច្នេះក្រសួងសុខាភិបាល សូមអំពាវនាវដល់​សាធារណជន​គ្រប់រូប ​ដែលកំពុងប្រើប្រាស់ផលិតផលថ្នាំជក់ ​សូមលះបង់ចោល និង​អ្នកដែលមិនទាន់ចាប់ផ្តើមប្រើប្រាស់ សូមចៀសវាងពី​ការប្រើប្រាស់ផលិតផល​ថ្នាំជក់ ​ផលិតផលបារីអេឡិចត្រូនិកគ្រប់ប្រភេទ ​ដែលបង្កហានិភ័យធ្ងន់ធ្ងរដល់សុខភាពបុគ្គល គ្រួសារ សេដ្ឋកិច្ច និងសង្គមជាតិ និងសូមអំពាវនាវដល់ស្ថាប័នពាក់ព័ន្ធទាំងអស់ចូលរួមអនុវត្ត និង​ជំរុញការអនុវត្ត​ច្បាប់ស្តីពី ​ការត្រួតពិនិត្យផលិតផលថ្នាំជក់​ឲ្យមានប្រសិទ្ធភាព ដើម្បីការអភិវឌ្ឍប្រកបដោយចីរភាព»។

ទន្ទឹមនឹងនេះ លោកវេជ្ជបណ្ឌិត អ៊ឹង ភីរុន បានអបអរសាទរដល់អាជ្ញាធរជាតិប្រយុទ្ធប្រឆាំងគ្រឿងញៀន​ដែល​បាន​ចេញសេចកី្តណែនាំស្តីពី ការចាត់វិធានការ បង្ការទប់ស្កាត់ការនាំចូល ការជួញដូរ ការធ្វើអាជីវកម្ម និងការប្រើប្រាស់​ផលិតផល បារីអេឡិចត្រូនិក អេចឈ៍ ធី ភី ក្នុងព្រះរាជាណាចក្រកម្ពុជា។

លោករដ្ឋលេខាធិការបានបន្តថា ក្រសួងសុខាភិបាល​ ក្នុងនាមជាប្រធានគណៈកម្មាធិការត្រួតពិនិត្យផលិតផលថ្នាំជក់​កន្លងមក បាន​ចូលរួមអប់រំផ្សព្វផ្សាយអំពីផលប៉ះពាល់​ នៃបារីអេឡិចត្រូនិក ដល់គណៈកម្មាធិការត្រួតពិនិត្យ​ផលិត​ផលថ្នាំជក់ ស្ថាប័នពាក់ព័ន្ធ និងសាធារណជន និងបានចូលរួមសហការ​ជាមួយគណៈកម្មាធិការ​ប្រយុទ្ធប្រឆាំង​ផលិតផលក្លែងក្លាយ​ ក្នុងការចុះតាមដាន ឃាត់ ការលក់ដូរចែកចាយបារី​អេឡិចត្រូនិក។

ជុំវិញការប្រើប្រាស់ផលិតផល បារីអេឡិចត្រូនិកនេះដែរ ក្រសួងអប់រំយុវជន និងកីឡាថ្មីៗនេះ បានចេញសេចក្ដីណែនាំ ស្ដីពីការទប់ស្កាត់ការប្រើប្រាស់បារីអេឡិចត្រូនិក (E-Cigarette/Vape) និងផលិតផល អេចឆ៍ ធី ភី (HTPs) នៅតាមគ្រឹះស្ថានសិក្សាសាធារណៈ និងឯកជន ដើម្បីទប់ស្កាត់ការផ្សព្វផ្សាយអូសទាញយុវវ័យ ឱ្យប្រើប្រាស់បារីអេឡិចត្រូនិក និងផលិតផល អេចឆ៍ ធី ភី ដែលបង្កគ្រោះថ្នាក់ធ្ងន់ធ្ងរដល់សុខភាពដូចជា បង្កជំងឺមហារីក បង្កើនហានិភ័យជំងឺបេះដូង ជំងឺសួត ធ្វើឱ្យខួរក្បាលមានដំណើរការមិនប្រក្រតីក្នុងអំឡុងពេលប្រើប្រាស់ និងប៉ះពាល់យូរអង្វែងដល់ការលូតលាស់ខួរក្បាលរបស់កុមារ និងយុវវ័យព្រមទាំងបង្កអន្តរាយដល់រាយកាយ៕ សំអឿន