ព័ត៌មានអន្ដរជាតិ

វៀតណាមចេញច្បាប់ពិន័យនាយកសាលាជិត ៤០០ ដុល្លារ បើសិស្សជក់បារីអេឡិចត្រូនិកក្នុងសាលារៀន

បានផុស

៤ ខែ មុន

នៅ

ថ្ងៃពុធ ២៨ មករា ២០២៦

ដោយ

នាយកសាលានៅក្នុងប្រទេសវៀតណាម អាចប្រឈមមុខនឹងការពិន័យរហូតដល់ ១០ លានដុង (ជិត ៤០០ ដុល្លារអាមេរិក) ប្រសិនបើគេចាប់បានថា សិស្សក្នុងសាលារបស់ខ្លួនជក់បារីអេឡិចត្រូនិកនៅសាលារៀន។ នេះបើតាមការចុះផ្សាយរបស់កាសែត VnExpress កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចេញច្បាប់នេះ ធ្វើឡើងចំពេលដែលអាជ្ញាធរវៀតណាម កំពុងចាត់វិធានការដើម្បីទប់ស្កាត់កំណើនយ៉ាងខ្លាំងក្លានៃការប្រើប្រាស់បារីអេឡិចត្រូនិករបស់យុវវ័យវៀតណាម។

បើតាម VnExpress ការពិន័យនេះត្រូវបានប្រកាសដោយក្រសួងសុខាភិបាលវៀតណាម និងចូលជាធរមានកាលពីថ្ងៃទី ៣១ ខែធ្នូ ឆ្នាំ ២០២៥។

តាមច្បាប់ នាយកសាលាអាចរងការពិន័យជាប្រាក់ចំនួន ៥-១០ លានដុង (១៩១-៣៨៣ ដុល្លារ) ប្រសិនបើអាជ្ញាធរកំណត់ថា ពួកគេមិនបានគ្រប់គ្រង ត្រួតពិនិត្យ ឬរារាំងសិស្សឱ្យបានត្រឹមត្រូវ ពីការប្រើប្រាស់បារីអេឡិចត្រូនិក ឬផលិតផល អេចឈ៍ ធី ភី ( HTP-Heated Tobacco Product ) នៅក្នុងសាលារៀន។ សិស្ស ឬបុគ្គលដែលប្រើប្រាស់ផលិតផលដោយផ្ទាល់ អាចប្រឈមមុខនឹងការពិន័យជាប្រាក់ចំនួន ៣-៥ លានដុង។ ឧបករណ៍ដែលរឹបអូសបានទាំងអស់ នឹងត្រូវរឹបអូស និងបំផ្លាញចោល។

មន្ត្រីសុខាភិបាលវៀតណាម បាននិយាយថា នេះគឺជាលើកទី ១ ហើយ ដែលច្បាប់វៀតណាមកំណត់ការទទួលខុសត្រូវផ្នែកច្បាប់យ៉ាងច្បាស់លាស់ដល់ថ្នាក់ដឹកនាំសាលា ចំពោះការជក់បារីអេឡិចត្រូនិករបស់សិស្សក្នុងបរិវេណសាលា។

ក្រៅពីការពិន័យរដ្ឋបាល ការផលិត ការលក់ ការដឹកជញ្ជូន ឬការរក្សាទុកបារីអេឡិចត្រូនិក និងផលិតផល អេចឈ៍ ធី ភីខុសច្បាប់ទ្រង់ទ្រាយធំ អាចបង្កឱ្យមានការចោទប្រកាន់ព្រហ្មទណ្ឌចំពោះការជួញដូរទំនិញហាមឃាត់ ជាមួយនឹងការពិន័យរហូតដល់ ១ ប៊ីលានដុង ឬជាប់ពន្ធនាគារ ៥ ឆ្នាំ អាស្រ័យលើទម្ងន់ទោស។

ការអនុវត្តច្បាប់ដ៏តឹងរ៉ឹងនេះ ធ្វើឡើងចំពេលវៀតណាមប្រឈមមុខនឹងកំណើនយ៉ាងខ្លាំងក្លានៃការជក់បារីអេឡិចត្រូនិករបស់យុវជន។ ចន្លោះឆ្នាំ ២០១៩ និង ២០២៣ ការប្រើប្រាស់បារីអេឡិចត្រូនិកក្នុងចំណោមសិស្សអាយុពី ១៣-១៧ ឆ្នាំបានកើនឡើងពី ២,៦% ដល់ ៨,១%។ នេះបើយោងតាមទិន្នន័យពីក្រសួងសុខាភិបាល។ នៅឆ្នាំ ២០២៣ មនុស្សជាង ១២០០ នាក់ ទូទាំងប្រទេស ត្រូវបានបញ្ជូនទៅមន្ទីរពេទ្យដោយសារការពុល ឬមានជំងឺដែលទាក់ទងនឹងបារីអេឡិចត្រូនិក។

កាលពីខែវិច្ឆិកា ឆ្នាំ ២០២៤ រដ្ឋសភាវៀតណាមបានបោះឆ្នោតដាក់ការហាមឃាត់ទ្រង់ទ្រាយធំលើការផលិត ការលក់ ការនាំចូល និងការប្រើប្រាស់បារីអេឡិចត្រូនិក និងផលិតផល អេចឈ៍ ធី ភី។ វិធានការនេះចូលជាធរមាននៅឆ្នាំ ២០២៥ ដែលធ្វើឱ្យវៀតណាម ក្លាយជាប្រទេសមួយក្នុងចំណោមជាង ៤០ ដែលធ្វើយ៉ាងដូច្នេះ៕