ជំនន់ទឹកភ្លៀង វាយលុកផ្ទះពលរដ្ឋជាច្រើនខ្នងទាំងកណ្ដាលអធ្រាត្រនៅស្រុកសំឡូត

លំនៅឋានជាច្រើនខ្នងដែលស្ថិតនៅតាមបណ្តោយមាត់ព្រែកនៃស្រុកសំឡូត ត្រូវបានទឹកជំនន់យាយីយ៉ាងធ្ងន់ធ្ងរទាំងកណ្តាលអធ្រាត្រ ដែលតម្រូវអោយកងកម្លាំងចុះជួយអន្តរាគមន៍ទាំងយប់។

លោកវរសេនីយ៍ត្រី ទូច សម្បត្តិ នាយប៉ុស្តិ៍នគរបាលរដ្ឋបាល តាតោក បានបញ្ជាក់ថា គ្រោះទឹកជំនន់ដោយសារទឹកភ្លៀងដែលធ្លាក់នៅប៉ែកខាងលើជាច្រើនម៉ោង បានកើតឡើងនៅវេលាម៉ោង១រំលងអធ្រាត្រ យប់ថ្ងៃទី១៣ ខែកក្កដា ឆ្នាំ២០២២ ត្រង់ចំណុចភូមិវាលរលឹម ឃុំតាតោក ស្រុកសំឡូត ខេត្តបាត់ដំបង ។

លោកនាយប៉ុស្តិ៍បានបន្តថា ទឹកនេះគឺធ្លាក់ពីជួរភ្នំក្បាលឡាន ដែលជាប្រភពក្បាលស្ទឹងសង្កែ ហើយបានជន់ជោរឡើងភ្លាមៗតែម្តង បង្កអោយលិចផ្ទះពលរដ្ឋជាច្រើនខ្នង ដែលនៅពេលនោះដែរ លោកបានដឹកនាំកម្លាំងសហការជាមួយកម្លាំងយោធាជួយអន្តរាគមន៍ ដើម្បីបញ្ជូនប្រជាពលរដ្ឋទៅកាន់ទីទួលសុវត្ថិភាពទាំងយប់ជាបណ្តោះអាសន្ន ដោយនៅពេលនោះដែរ ពុំមានប៉ះពាល់ដល់អាយុជីវិត មនុស្ស ឬសត្វឡើយ ។

នៅព្រឹកនេះដែរស្ថានភាពទឹកត្រូវបានថមថយ និងស្រកវិញហើយ បន្ទាប់ពីមេឃឈប់ធ្លាក់ភ្លៀងទៅវិញ ដែលធ្វើអោយពលរដ្ឋទាំងអស់វិលទៅរកលំនៅឋានវិញជាបណ្តើរៗហើយ ៕

អត្ថបទ៖ សោ និយមរ័ត្ន