Connect with us

សន្តិសុខសង្គម

អនុភូមិ​មេប៉ៃ​ទទួល​កំហុស​ទារលុយ​ពលរដ្ឋ​ជាថ្នូរ​នឹងការធ្វើប័ណ្ណ​ក្រីក្រ​តែថ្នាក់លើ​មិនឃើញ​មានចំណាត់ការ​

បានផុស

នៅ

​ប្រជាពលរដ្ឋរាប់រយនាក់នៅភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរីបាននាំគ្នាផ្ដិតមេដៃប្ដឹងលោក ម៉ាត់ អ៊ែល អនុភូមិមេប៉ៃ ទៅសាលាឃុំពូជ្រៃ ដើម្បីស្នើសុំចាត់វិធានការដកលោក​អនុភូមិរូបនេះចេញពីតួនាទី។

ពលរដ្ឋអះអាងថា លោក ម៉ាត់ អ៊ែល ដឹកនាំធ្វើការប្រកាន់បក្ខពួក ផ្ដល់សេវាសាធារណៈមិនល្អ និងគាប​សង្កត់កំណត់យកលុយពីពួកគាត់ចាប់ពី ៥ ម៉ឺនរៀល ដល់ ១ សែនរៀលក្នុង១គ្រួសារជាថ្នូរនឹងការធ្វើ​បណ្ណក្រីក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងមកលោក ម៉ាត់ អ៊ែល បានផ្ដិតមេដៃទទួលស្គាល់កំហុសរបស់ខ្លួនដែលបាន​ប្រព្រឹត្តនៅសាលាឃុំម្ដងរួចមកហើយ។

លោក ម៉ៅ នូ ប្រជាពលរដ្ឋរស់នៅភូមិមេប៉ៃ ឃុំពូជ្រៃ ស្រុកពេជ្រាដាប្រាប់ថា កាលលោក​ធ្វើប័ណ្ណក្រីក្រ គឺត្រូវបានលោក ម៉ាត់ អ៊ែល កំណត់យកលុយ​​ចំនួន ១១ ម៉ឺនរៀល ដោយរូបលោក ៥ ម៉ឺន ប្រពន្ធ ៥ ម៉ឺន និងសេវា ១ ម៉ឺនរៀលទៀត។

បញ្ហានេះគណកៈម្មការស្រុក និងឃុំបានត្រឹមសម្របសម្រួលមិនឃើញមានចំណាត់ការលើលោក ម៉ាត់ អ៊ែល អនុភូមិមេប៉ៃនោះឡើយ។

ប្រជាពលរដ្ឋបញ្ជាក់ថា អ្វីដែលពួកខ្លួនហួសចិត្ត និងមានប្រតិកម្មម្ដងទៀតនោះ គឺក្រោយពួកខ្លួនប្ដឹង និងក្រោយពេលដោះស្រាយរួច ស្រាប់តែលោក ម៉ាត់ អ៊ែល ចងកំហឹងជាមួយពួកគាត់ ដោយបានទូរសព្ទដើរគំរាមកំហែងបំភិតបំភ័យពួកគាត់ ពិសេសអ្នកបានផ្ដិតមេដៃប្ដឹងតែម្ដង។

សកម្មភាពនេះ ប្រជាពលរដ្ឋបានចាត់ទុកថា លោក ម៉ាត់ អ៊ែល ទទួលស្គាល់កំហុសតែនៅ​លើក្រដាសប៉ុណ្ណោះ រីឯទង្វើជាក់ស្ដែង នៅគឃ្លើនផ្គើនប្រជាពលរដ្ឋលើសដើម។

សូមជម្រាបថា ប្រជាពលរដ្ឋរាប់សិបនាក់ នៅភូមិមេប៉ៃ ឃុំពូជ្រៃ ស្រុកពេជ្រាដា បាននាំគ្នាផ្ដិតមេដៃ ប្ដឹងលោក ម៉ាត់ អ៊ែល អនុភូមិមេប៉ៃ ទៅសាលាឃុំពូជ្រៃ កាលពីថ្ងៃទី១៥ ខែមិថុនា ២០២២។ ហើយនៅថ្ងៃទី ១៩ ខែកក្កដា គណៈកម្មការស្រុក ឃុំ បានសម្របសម្រួលដោះស្រាយបញ្ចប់រឿង។

ក្នុងនោះលោក ម៉ាត់ អ៊ែល បានទទួលស្គាល់កំហុសរបស់ខ្លួនចំនួន៥ចំណុច ដោយសន្យា​កែប្រែកំហុសទៀតផង។

ប្រជាពលរដ្ឋស្នើឱ្យថ្នាក់ដឹកនាំ បើកការស្រាវជ្រាវ ដើម្បីចាត់វិធានការដកលោក ម៉ាត់ អ៊ែល ចេញ​ពីអនុភូមិមេប៉ៃ៕

អត្ថបទ៖ វុទ្ធឦសាន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម