សម្ដេចតេជោ ហ៊ុន សែន ៖ ភ្ញៀវចូលរួមកិច្ចប្រជុំ​​រដ្ឋមន្ត្រីការបរ​ទេសអាស៊ានមួយចំនួន មិនចង់អង្គុយជិតគ្នា

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា ក្នុងការរៀបចំកិច្ចប្រជុំ​​រដ្ឋមន្ត្រីការបរ​ទេសអាស៊ានលើកទី ៥៥ និងកិច្ចប្រជុំពាក់ព័ន្ធ ដែលកម្ពុជាធ្វើជាប្រធានអាស៊ាននៅឆ្នាំនេះនោះ សូម្បីតែការរៀបចំកៅអីអង្គុយក៏មានការពិបាកដែរ ពីព្រោះមានភ្ញៀវមួយចំនួនមិនចង់អង្គុយជិតគ្នា ខណៈកំពុងមានជម្លោះនៅនៅតំបន់អឺរ៉ុប និងជម្លោះនៅកន្លែងមួយចំនួនទៀត។

នៅក្នុងពេលអញ្ជើញទទួលសញ្ញាបត្របណ្ឌិតកិត្តិយសផ្នែកអភិវឌ្ឍន៍ ពីសាកលវិទ្យាល័យភូមិន្ទភ្នំពេញ នាព្រឹកថ្ងៃទី ៥ ខែសីហានេះ សម្ដេចតេជោ ហ៊ុន សែន បានថ្លែងថា រដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសដៃគូរបស់អាស៊ាន បានធ្វើដំណើរមកកាន់រាជធានីភ្នំពេញ ដើម្បីចូលរួមកិច្ចប្រជុំរដ្ឋមន្រ្តី​​ការបរទេសអាស៊ានលើកទី ៥៥ និងកិច្ចប្រជុំពាក់ព័ន្ធ ដែលកម្ពុជាធ្វើជាប្រធានអាស៊ាននាឆ្នាំនេះ។  

សម្ដេចតេជោនាយករដ្ឋមន្ត្រី បានថ្លែងបន្តថា រដ្ឋមន្ត្រីការបរទេសអាស៊ាន និងរដ្ឋមន្ត្រីការបរទេសដៃគូរបស់អាស៊ាន សុទ្ ធតែមានការអធ្យាស្រ័យមកលើកម្ពុជា ដោយយល់ឃើញថា ក្នុងពេលដែលកម្ពុជាធ្វើជាប្រធានអាស៊ានឆ្នាំ ២០២២នេះ មានរឿងជាច្រើនដែលមិនធ្លាប់មានពីមុនមក។

សម្ដេចតេជោ ហ៊ុន សែន បានថ្លែងបន្ថែមថា សម្រាប់ការរៀបចំកៅអីអង្គុយក៏មានការពិបាកដែរ ពីព្រោះមានភ្ញៀវមួយចំនួន មិនចង់អង្គុយជិតគ្នា។ សម្ដេចតេជោ បានថ្លែងយ៉ាងដូច្នេះថា «សូម្បីតែរៀបចំកៅអីអង្គុយក៏ពិបាកដែរៗ ព្រោះឥឡូវកំពុងតែមានជម្លោះនៅអឺរ៉ុប មានជម្លោះនៅកន្លែងមួយចំនួន ដូច្នេះរៀបកៅអីអង្គុយ គេមិនចង់អង្គុយជិតគ្នាក៏មាន មិន​មែនជារឿងងាយស្រួលទេ»។

សម្ដេចតេជោ ហ៊ុន សែន ដែលជាប្រធានអាស៊ានឆ្នាំ ២០២២នេះ បានលើកឡើងដែរថា ការធ្វើសេចក្ដីថ្លែងការណ៍រួម ក្នុងកិច្ចប្រជុំរដ្ឋមន្រ្តី​​ការបរទេសអាស៊ាន ក៏មិនមែនជាការងាយស្រួលនោះដែរ។ ប៉ុន្តែសមត្ថភាពនៃការឆ្លើយតប និងការសម្របសម្រួលរបស់កម្ពុជា អាចធ្វើទៅបាន៕

អត្ថបទ៖ ឃួន សុភ័ក្រ