លោក ឈួរ សុបញ្ញា ៖ រួមគ្នាលើកកម្ពស់អតីតយុទ្ធជន និងមន្ត្រីចូលនិវត្តន៍ ព្រោះពួកគាត់បានលះបង់គ្រប់បែបយ៉ាង ដើម្បីជាតិមាតុភូមិ

លោក ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃមូលនិធិជាតិជំនួយសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងថា យើងបន្តរួមគ្នាលើកកម្ពស់អតីតយុទ្ធជន និងមន្ត្រីចូលនិវត្តន៍ ព្រោះពួកគាត់បានលះបង់គ្រប់បែបយ៉ាង ដើម្បីជាតិមាតុភូមិ និងគ្រុមគ្រួសាររបស់ពួកគាត់ទទួលនូវប្រយោជន៍ពិតៗពីរាជរដ្ឋាភិបាល។

លោក ឈួរ សុបញ្ញា ថ្លែងបែបនេះខណៈពេលដែលខាងមូលនិធិជាតិជំនួយសង្គម បានសហការជា​មួយមន្ទីរ ស.អ.យ. និងសមាគមអតីតយុទ្ធជន បានប្រគល់ថវិកាឧបត្ថម្ភធានារ៉ាប់រងសង្គម និងបូជាសព ជូនគ្រួសារអតីតយុទ្ធជនចំនួន ៣៦គ្រួសារ នាព្រឹកថ្ងៃទី ៥ ខែសីហា ឆ្នាំ ២០២២នេះ។

ក្នុងនោះលោក ឈួរ សុបញ្ញា ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃមូលនិធិជាតិជំនួយសង្គម និងជានាយកស្តីទី ប.ជ.អ. បានថ្លែងនូវការពាំនាំអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ដោយរាជរដ្ឋាភិបាលមិនបោះបង់បងប្អូនគ្រួសារអតីតយុទ្ធជន ដែលលោកមានគុណបំណាច់ចំពោះជាតិ នោះទេ។

លោកបន្តថា ថ្នាក់ដឹកនាំគ្រប់លំដាប់ថ្នាក់ បានសម្ដែងនូវការចូលរួមរំលែកនូវមរណទុក្ខដ៏ក្រៀមក្រំ ចំពោះការបាត់បង់សមាជិកគ្រួសារ ដែលបានទទួលមរណភាព ដែលជាអតីតយុទ្ធជនយើងធ្លាប់បាន ចូលរួមចំណែកលះបង់សាច់ស្រស់ ឈាមស្រស់ ក្នុងបុព្វហេតុរំដោះជាតិ ការពារបូរណភាពទឹកដី រហូតទទួលបានជោគជ័យ រស់នៅសុខសប្បាយពេញផ្ទៃប្រទេស៕

អត្ថបទ៖ វិមាន