ក្រសួងកំពុង​រៀបចំ​បញ្ជូនសម្បត្តិ​វប្បធម៌ខ្មែរ​ ៣០ រូប ​ពីសហរដ្ឋអាមេរិក​មកមាតុប្រទេសវិញ

ក្រសួងវប្បធម៌ និងវិចិត្រសិល្បៈ កំពុងធ្វើការជាមួយក្រុមហ៊ុនដឹកជញ្ជូន ដើម្បីដឹកបញ្ជូនសម្បត្តិវប្បធម៌ខ្មែរចំនួន ៣០ រូប ពីសហរដ្ឋអាមេរិក ត្រឡប់មកកម្ពុជាវិញ។

លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈមានប្រសាសន៍ថា “យើងពិតជាមានសេចក្ដីរំភើបទទួលស្វាគមនៃការវិលត្រឡប់មកវិញនូវមរតកដ៍ល្អឯកទាំងនេះ ដែលជាព្រលឹងបុព្វបុរសខ្មែរជាច្រើនជំនាន់ និងតំណាងឱ្យភាពរុងរឿងនៃចក្រភពខ្មែរ។

លោកស្រីបន្តថា “ការបញ្ជូនមកវិញនេះគឺអាចសម្រេចទៅបាន ដោយសារកិច្ចសហប្រតិបត្តិការ និងការខិតខំប្រឹងប្រែងរួមគ្នារវាងរដ្ឋាភិបាលកម្ពុជា និងសហរដ្ឋអាមេរិក។

សម្បត្តិវប្បធម៌ខ្មែរចំនួន ៣០ រូប នឹងត្រូវបញ្ជូនពីសហរដ្ឋអាមេរិកមកម្ពុជាវិញ ខណៈវត្ថុទាំងនោះ ជាប់ពាក់ព័ន្ធនឹងករណីកាន់កាប់វត្ថុបុរាណដោយខុសច្បាប់ ដែលត្រូវបានរឹបអូសដោយរដ្ឋអាជ្ញាសហរដ្ឋអាមេរិក។ សម្បត្តិវប្បធម៌ខ្មែរចំនួន ៣០ រូប នោះមានរូបបដិមាសំខាន់ៗមួយចំនួន ផ្នែកពុទ្ធសាសនា និងព្រហ្មញ្ញសាសនា ដូចជារូបចម្លាក់ ព្រះស្កន្ទគង់លើក្ងោក និងព្រះគណេស ដែលត្រូវបានលួចចេញពីប្រាសាទកោះកេរ៕

អត្ថបទ៖ ឡេង ដេត