អាជីវករផ្សារបឹងកុក សាទរអាជ្ញាធរចុះរៀបចំសណ្តាប់ធ្នាប់ តែសូមរក្សាកន្លែងឲ្យគាត់លក់

ប៉ុន្មានថ្ងៃនេះ កម្លាំងសហការមានកម្លាំងអាជ្ញាធរក្រុង កម្លាំងសហគមន៍ផ្សារបឹងកុក បានចុះរៀបចំសណ្តាប់ធ្នាប់បន្ទាប់ពីមានការកកស្ទះចរាចរណ៍ជារៀងរាល់ថ្ងៃនោះ មូលហេតុដោយមានការលក់ដូររបស់​ក្រុមអាជីវករមួយ​ចំនួនដែលបានអាស្រ័យ​ផលលើចំណីផ្លូវ និងខាងក្រុមផ្ញើម៉ូតូពង្រីកទីដាក់ម៉ូតូចេញមកក្រៅលើចំណីផ្លូវ ជាហេតុធ្វើឲ្យមានការកកស្ទះ​បៀបនេះ។

កម្លាំងសហការបានអនុវត្តតាមការណែនាំរបស់ក្រុងដើម្បីអនុវត្តភារៈកិច្ចរៀបចំសណ្តាប់ធ្នាប់សាធារណៈឲ្យបានល្អ ហើយខាងក្រុមអាជីវករលក់បន្លែក៏បានការស្វាគមន៍ និងចូលរួមចំណែកអនុវត្តនូវភារកិច្ចដ៏សំខាន់នេះដែរ តែពួកគាត់ក៏បានសំណូមពរដល់អាជ្ញាធរក្រុង និងសហគមន៍ផ្សារ សូមមេត្តារក្សាទុកកន្លែងដែលជាឆ្នាំងបាយរបស់គាត់ធ្លាប់អាស្រ័យផលចំនួន១០កន្លែង ដែលមានអាយុជាង២០ឆ្នាំមកហើយនោះផង។ ក្នុងសកម្មភាពនេះ បានកើតនៅព្រឹកថ្ងៃទី១៧ ខែសីហា ឆ្នាំ២០២២ នៅផ្សារបឹងកុក ក្រុងកំពង់ចាម ខេត្តកំពង់ចាម។

ក្រុមអាជីវករលក់បន្លែចំនួន១០នាក់បានបញ្ជាក់ឲ្យដឹងថា ពួកគាត់មិនជំទាស់ដល់កម្លាំងសាលាក្រុងសហគមន៍ផ្សារទេ តែត្រូវរក្សាកន្លែងពួកគាត់ធ្លាប់លក់ជាង២០ឆ្នាំហើយ បើឲ្យរើយកចេញគាត់បានអីលក់​ដោយកន្លែង​គាត់ម្នាក់ៗ មាន១ម៉ែត្រ​២តឹកទេ អីចឹងត្រូវរកដំណោះស្រាយជូនពួកគាត់ផង។ ចុះកន្លែងផ្ញើម៉ូតូលើចំណីផ្លូវដែរម៉ិចដាក់បាន មកទើសអីតែកន្លែងកញ្ច្រែង ល្អីទៅវិញ បើរៀបត្រូវឲ្យស្មើភាព។

លោក ខាំ ជួរ រៀបចំសណ្តាប់ធ្នាប់ក្រុងបានបញ្ជាក់ឲ្យដឹងថា បញ្ហានេះសូមបងប្អូនអាជីវករត្រូវទៅដោះស្រាយនៅស្នាក់ការសហគមន៍ផ្សារបឹងកុកទៅ។ ហើយបើមានពាក្យបណ្តឹងត្រូវយកទៅផង ការដោះស្រាយជា​លទ្ធ​ភា​ព​​ខាង​សហគម៍ផ្សារទេ។ ឯខាងសមត្ថកិច្ច គឺបំពេញភារកិច្ចរៀបចំសណ្តាប់ធ្នាប់សាធារណៈឲ្យមានរបៀបរៀបរយ ផ្លូវធំទូលាយ ងាយស្រួលដល់ការធ្វើចរាចរណ៍ដល់បងប្អូនប្រជាពលរដ្ឋយើងទាំងអស់គ្នាក្នុងខេត្ត​។

លោកស្រី ឡុង ឆៃអ៉ី ប្រធានសហគមន៍ផ្សារបឹងកុក បានបញ្ជាក់ឲ្យដឹងដែរថា ចំពោះបងប្អូនអាជីវករលក់ដូរដែលរំលោភ​មកលើទ្រូងផ្លូវ​ ឬលើសការកំណត់របស់រដ្ឋបាលក្រុង ក្រុមការងារត្រូវចាត់វិធានការរដ្ឋបាល ដើម្បីសម្រួល​សណ្តាប់ធ្នាប់​សាធារណៈ។ ការរៀបចំដាក់ម៉ូតូ គឺសម្រាប់អ្នកដែលមានរូបនៅក្នុងផ្សារហើយការរៀបចំសណ្តាប់ធ្នាប់ គឺធ្វើតាមការណែនាំរបស់ក្រុងតែប៉ុណ្ណោះ៕

អត្ថបទ ៖ សាន វិឡែម