​លោក​ប្រាក់ សុខុន សម្រេច​​ស្នាដៃ​ធំ​ ៣ កាន់​តំណែង​ជាង ៦ ឆ្នាំ​​នៅ​ក្រសួង​ការបរទេស

ប្រមុខ​រដ្ឋាភិបាល​សម្ដេច​តេជោ ហ៊ុន សែន ក្នុងពិធី​ចែក​សញ្ញាបត្រ​ដល់​និស្សិត​កាល​ពី​ម្សិលមិញ​បាន​ថ្លែង​កោត​សរសើរ​ដល់​​លោក ប្រាក់ សុខុន រដ្ឋមន្ត្រី​ក្រសួង​ការបរទេ​ស ដែល​បាន​ដឹកនាំ​រៀបចំ​កិច្ច​ប្រជុំ​រដ្ឋមន្ត្រីការ​បរទេស​អាស៊ាន ក្នុង​ស្ថានភាព​ដ៏​លំបាក ដោយ​សម្របសម្រួល​បាន​ជោគជ័យ។

មន្រ្តី​ជើង​ចាស់រូបនេះ​ ត្រូវ​បាន​គេ​ទទួល​ស្គាល់លើគំនិ​តច្នៃប្រឌិត​លើ​ការងារ​តាំងពីលោកនៅ​កាន់ជារ​ដ្ឋមន្រ្តី​​ក្រសួង​ប្រៃសណីយ និង​ទូរគមនាគមន៍។ ក្រោយ​ផ្លាស់មកដឹកនាំ​ក្រសួង​ការបរទេស​នៅ​ឆ្នាំ ២០១៦ ក្នុង​រយៈ​ជាង ៦ ឆ្នាំ ក្នុង​តួនាទី​ជា​ប្រមុខ​ការ​ទូត​​កម្ពុជា លោកបាន​សម្រេច​ស្នាដៃ​ជាច្រើន​ទុក​ជា​មរតក​និង​បម្រើ​ដល់​ផល​ប្រយោជន៍​ជាតិ។

ស្នាដៃ​ដ៏​លេចធ្លោ​ដែលលោក​សម្រេច​បាន​នៅ​ក្រសួង​ការបរទេស​មាន​ដូចជា៖

-បង្កើត “វិទ្យាស្ថាន​ជាតិ​ការទូត​និង​ទំនាក់ទំនង​អន្តរជាតិ (NIDIR)”ដំបូង​គេ​ នៅ​ក្នុង​វិស័យ​ការ​ទូត​កម្ពុជា

ឆ្នាំ ២០១៨ លោក ​ប្រាក់ សុខុន បាន​បង្កើត​​វិទ្យាស្ថាន​ជាតិ​ការទូត​និង​ទំនាក់ទំនង​អន្តរជាតិ។ លោក ប្រាក់ សុខុន គូសបញ្ជាក់ថា ជាប្រវត្តិសាស្ត្រដែលកម្ពុជាបានបង្កើតជាលើកដំបូងនៅ​វិទ្យាស្ថានជាតិការទូត និងទំនាក់ទំនងអន្តរជាតិ ចំណុះ​ឱ្យ​​ក្រសួងការបរទេស និងសហប្រតិបត្តិការអន្តរជាតិ។

ស្ថាប័ននេះគឺជាស្ថាប័នសំខាន់ក្នុងការចូលរួមចំណែកគាំទ្រ និង​ពង្រឹងជួរអ្នកការទូតរបស់កម្ពុជាឱ្យមានវិជ្ជាជីវ:ច្បាស់លាស់​ពិតប្រាកដ និងបំពេញមុខងារជាតំណាងដ៏ស័ក្តិសម និងការពារផលប្រយោជន៍ប្រទេសជាតិ និងប្រជាពលរដ្ឋយើងលើឆាកអន្តរជាតិ ព្រមទាំងដើម្បីបំពេញឱ្យបាននូវតួនាទីជាអ្នកការទូតពហុវិស័យឬអ្នកការទូតនៃសតវត្សរ៍ទី២១ ដោយផ្តល់សារ:សំខាន់ដល់សកម្មភាពសេដ្ឋកិច្ច វប្បធម៌ និងទេសេចរណ៍ និងការបំពេញតួនាទីឱ្យកាន់តែសំខាន់ឡើងនៅក្នុងបណ្តាវេទិកាពហុភាគីក្នុងតំបន់ និងពិភពលោក។

លោក​បានប្រៀបដំណើរការនៃវិទ្យាស្ថានជាតិការទូត និងទំនាក់ទំនងអន្តរជាតិដូចជា «សុបិនដែលក្លាយជាការពិត»។ការបើកវិទ្យាស្ថាននេះ គឺមានអត្ថន័យជ្រាលជ្រៅ ជាការបើកទំព័រប្រវត្តិសាស្ត្រថ្មី ក្នុងវិស័យការទូតកម្ពុជា ដើម្បីឈានទៅរកការកសាងស្ថាប័នមួយ ដែលមានលក្ខណ:វិជ្ជាជីវ:ខ្ពស់ និងមានលក្ខណ:ជាប្រព័ន្ធ។

-​ដាក់​ចេញ​ “យុទ្ធសាស្ត្រ​ការទូត​សេដ្ឋកិច្ច” ឆ្នាំ​២០២១-​២០២៣

បន្ទាប់​ពី​ចំណាយ​ពេល​តាក់តែង​ជាង​ ២ ឆ្នាំ យុទ្ធសាស្រ្ត​ការទូត​សេដ្ឋកិច្ច​ឆ្នាំ២០២១-២០២៣ រៀបចំ​ឡើង​នៅ​ក្នុង​កាលៈទេសៈដែល​​ពិភពលោក​ក៏ដូចជា​ប្រទេស​កម្ពុជា កំពុង​ប្រឈម​ទៅ​នឹង​ការ​គំរាមកំហែង​ធ្ងន់ធ្ងរ​បំផុត​មិន​ធ្លាប់​ជួប​ក្នុង​រយៈពេល​ជាង ៣ ទសវត្សរ៍​ចុងក្រោយ​នេះ។

តាម​រយៈ​យុទ្ធសាស្រ្តខាងលើ ក្រសួងការបរទេស និង​សហប្រតិបត្តិការអន្តរជាតិនឹង​ដើរ​តួនាទី​ជា​អ្នក​សម្របសម្រួល និង​ជំរុញ​​យន្តការ​​ដែល​មានស្រាប់ ដើម្បី​ទាក់ទាញ​ការ​វិនិយោគទុន​ផ្ទាល់​ពី​បរទេស ជំរុញ​ឱ្យ​មាន​កំណើន​នៃ​ការ​ធ្វើ​ពាណិជ្ជកម្ម​ទ្វេភាគី និង​ពហុភាគី និង​ទាក់ទាញ​ភ្ញៀវ​ទេសចរណ៍​ តាមរយៈ​ការ​ពង្រឹង​តម្លៃ​វប្បធម៌​ខ្មែរ​នៅ​ក្រៅ​ប្រទេស, និង អភិវឌ្ឍ​ធនធាន​អ្នកការទូត​ជំនាន់​ថ្មី​ប្រកប​ដោយ​វិជ្ជាជីវៈ សមត្ថភាព ខ្ពស់​សកម្ម​ការពារ និង​លើកស្ទួយ​ផលប្រយោជន៍​ជាតិ​លើ​គ្រប់​វិស័យ។

–ជា​រដ្ឋមន្ត្រី​នវានុវត្តន៍ ដែល​បាន​តាក់តែង​បង្កើត “ផ្ទះបាយអង្គរ“

ផ្ទះបាយ​អង្គរ គឺជា​ផ្នែក​មួយ​នៃ​ការទូត​សេដ្ឋកិច្ច ជា​ឧបករណ៍​គន្លឹះ​ដើម្បី​លើក​ស្ទួយ​និង​ផ្សព្វផ្សាយ​វិស័យ​ការទូត​កម្ពុជា តាម​រយៈ​ការ​បង្ហាញ​អំពី​ប្រវត្តិ​ម្ហូប​ខ្មែរ​និង​អត្តសញ្ញាណ​ជាតិខ្មែរ ដែល​មាន​តួនាទីយ៉ាង​សំខាន់​ដល់​វិស័យ​ការទូត​អាហារ ដើម្បី​ស្វែង​រក​ការ​គាំទ្រ និង​ការ​ទទួល​ស្គាល់​ពីម្ហូប​ខ្មែរ​នៅ​លើ​ឆាក​អន្តរជាតិ​។

ការបង្កើត “ផ្ទះបាយអង្គរ” នេះគឺជាការកែទម្រង់ផ្ទៃក្នុង ដែលផ្តួចផ្តើមឡើងដោយ​លោកឧបនាយករដ្ឋមន្រ្តី ប្រាក់ សុខុន ជាផ្នែកមួយ​នៃការទូតអាហារ។

លោកប្រាក់​ សុខុន បាន​ឲ្យ​ដឹង​ថា បន្ទាប់ពីម្ហូបខ្មែរត្រូវបានទទួលស្គាល់និងមានភាពល្បីល្បាញ នឹងមានឱកាសវិនិយោគ​លើវិស័យផ្សេងៗដូចជា ឧស្សាហកម្មទេសចរណ៍ ឧស្សាហកម្មអាកាសចរណ៍ ផលិតផលកសិកម្ម និងការពង្រីកចំនួនភោជនីយដ្ឋាន និងសណ្ឋាគារជាដើម ដែល​នឹងរួមចំណែកក្នុងកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការប្រែក្លាយ​កម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានប្រាក់ចំណូលកម្រិតខ្ពស់នៅឆ្នាំ ២០៥០។

សៀវភៅមុខម្ហូប “រសជាតិអង្គរ-The Taste of Angkor” របស់ក្រសួងការបរទេស បាន​ចូលរួមប្រកួតប្រជែង​និង​​ទទួលបាន​ជយ​លាភីជា “សៀវភៅ​មុខម្ហូប​អាស៊ីដែលល្អផ្តាច់គេ-The Best Asian Cookbook” នៅក្នុងការប្រកួត Gourmand World Cookbook Awards ប្រចាំឆ្នាំ២០២១ នៅទីក្រុង​បារីស៕