ព័ត៌មានជាតិ

លោក ឃឹម ហ្វីណង់ ៖ កម្ពស់ទឹកស្ទឹងបន្ទាយស្រីបានហក់ឡើងគួរឱ្យកត់សម្គាល់ ប៉ុន្តែមិនពាក់ព័ន្ធនឹង « Black Hole» ទេ

បានផុស

៤ years មុន

នៅ

ថ្ងៃសៅរ៍ ២៧ សីហា ២០២២

ដោយ

លោក ឃឹម ហ្វីណង់ អភិបាលស្រុកបន្ទាយខេត្តសៀមរាបបានឱ្យដឹងថាកម្ពស់ទឹកស្ទឹងបន្ទាយស្រីបានហក់ឡើងគួរឱ្យកត់សម្គាល់ក្នុងរយៈពេលប៉ុន្មានថ្ងៃចុងក្រោយនេះ ដោយសារតែស្រុកបន្ទាយស្រីកំពុងទទួលរងឥទ្ធិពលនៃភ្លៀងធ្លាក់ជោកជាំជាប់ៗគ្នា បណ្តាលឱ្យលិចផ្ទះបងប្អូនប្រជាពលរដ្ឋមួយចំនួន ប៉ុន្តែមិនទាន់មានអ្វីដែលគួរឱ្យព្រួយបារម្ភនៅឡើយទេ ហើយក៏មិនទាន់ដល់កម្រិតត្រូវប្រកាសអាសន្ននោះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈបណ្តាញសង្គមហ្វេសបុកនៅថ្ងៃទី២៧ ខែសីហា ឆ្នាំ២០២២នេះលោកបានសរសេរ ដោយអំពាវនាវដល់បងប្អូនប្រជាពលរដ្ឋនៅក្នុងស្រុកបន្ទាយស្រីជាពិសេសអ្នករស់នៅតាមបណ្តោយដងស្ទឹង និងនៅតាមជ្រលងជើងភ្នំគូលែនដែលមានមុខទឹកហូរឆ្លងកាត់ បង្កើនការប្រុងប្រយត្ន័ចំពោះហានិភ័យនៃជំនន់ទឹកភ្លៀងគំហក់(Flash Flood) ជៀសវាងគ្រោះថ្នាក់ជាយថាហេតុណាមួយ។

បាតុភូតនេះគឺជារឿងធម្មតានៅរៀងរាល់រដូវសម្បូរណ៍ព្យុះភ្លៀងសម្រាប់ស្រុកបន្ទាយស្រី ដែលតែងរងឥទ្ធិពលពីខ្យល់មូសុងវស្សា ដោយសារតែមានស្ថានភាពភូមិសាស្ត្រជាតំបន់ខ្ពង់រាប និងមានផ្ទៃរងទឹកភ្លៀងនៃទីជម្រាលភ្នំគូលែនលាតសន្ធឹងធំហើយវែង ដែលជាហេតុធ្វើឱ្យតំបន់មួយចំនួនងាយនឹងទទួលរងហានិភ័យនៃជំនន់ទឹកភ្លៀងគំហុក(Flash Flood) ជាពិសេសប្រសិនបើមានភ្លៀងធ្លាក់ខ្លាំងបន្តបន្ទាប់គ្នា ប៉ុន្តែក៏តែងតែហូរស្រកចុះទៅវិញដោយខ្លួនឯងយ៉ាងឆាប់រហ័សក្នុងរយៈពេលខ្លីផងដែរ នៅពេលដែលភ្លៀងឈប់ធ្លាក់ ហើយទឹកជំនន់ទាំងនោះត្រូវបានហូរចុះបន្តទៅកាន់ស្ទឹងសៀមរាប (តែមិនមានពាក់ព័ន្ធនឹងអានុភាពនៃកម្លាំងបឺតទាញរបស់ «Black Hole» នោះទេ )។