គណៈប្រតិភូសភាអាមេរិក គោរពចំពោះសម្ដេចតេជោ ដែលបានខិតខំប្រឹងប្រែង នាំមកជូនពលរដ្ឋកម្ពុជា នូវសុខសន្តិភាព ស្ថិរភាព និងការអភិវឌ្ឍ

គណៈប្រតិភូសមាជិកសភាអាមេរិក បានសម្ដែងការគោរពចំពោះសម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា ដែលបានខិតខំតស៊ូ និងប្រឹងប្រែង នាំមកជូនប្រជាពលរដ្ឋកម្ពុជា នៅសុខសន្តិភាព ស្ថិរភាព និងការអភិវឌ្ឍ។

ការសម្ដែងការគោរពនេះ គ្រាដែលសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតឲ្យគណៈប្រតិភូសមាជិកសភាអាមេរិក ដឹកនាំដោយលោកស្រី (Elizabeth Van Duyne) តំណាងរាស្ត្រគណបក្សសាធារណរដ្ឋ មកពីរដ្ឋតិចសាស់ ចូលជួបសម្តែងការគួរសម និងពិភាក្សាលើការងារ នៅព្រឹកថ្ងៃទី ២៩ ខែសីហា ឆ្នាំ ២០២២នេះ។  

លោកស្រី Elizabeth Van Duyne និងគណៈប្រតិភូ បានសម្ដែងនូវការគោរពជូនចំពោះសម្ដេចតេជោ ដែលខិតខំតស៊ូ និងប្រឹងប្រែង ដែលបាននាំមកជូនប្រជាពលរដ្ឋកម្ពុជា នៅសុខសន្តិភាព ស្ថិរភាព និងការអភិវឌ្ឍ។ លោកស្រី ក៏បានគោរពជម្រាបជូនសម្ដេចតេជោផងដែរថា ដំណើរទស្សនកិច្ចរបស់លោកស្រី និងប្រតិភូនាពេលនេះ គឺដើម្បីពង្រឹងទំនាក់ទំនងរវាងប្រទេសទាំងពីរ ឲ្យកាន់តែខ្លាំងឡើងតាមរយៈសក្ដានុពលដែលកំពុងមាន និងតាមរយៈកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ។

ជាការឆ្លើយតបសម្ដេចតេជោ ហ៊ុន សែន បានជម្រាបជូនលោកស្រី Elizabeth Van Duyne និងគណៈប្រតិភូ អំពីប្រវត្តិរបស់ប្រទេសកម្ពុជា ក៏ដូចជាប្រវត្តិនៃទំនាក់ទំនងរវាងកម្ពុជា ជាមួយសហរដ្ឋអាមេរិក។ សម្ដេចតេជោ បានឯកភាពជាមួយលោកស្រី Elizabeth Van Duyne ដែលថា យើងនាំគ្នាសំលឹងទៅមុខ ក្ដាប់ឱកាស ដែលកំពុងមាននាពេលបច្ចុប្បន្ន ជាពិសេសលើវិស័យពាណិជ្ជកម្ម វិនិយោគ និងអប់រំ ធ្វើជាមូលដ្ឋាន ដើម្បីពង្រឹងទំនាក់ទំនងរវាងប្រទេសទាំងពីរ ឲ្យកាន់តែខ្លាំងឡើងថែមទៀត៕

អត្ថបទ៖ ឃួន សុភ័ក្រ