ព័ត៌មានជាតិ
អ្នកនាំពាក្យ ៖ ការចាត់វិធានការច្បាប់ ទៅលើការជួបជុំនៅចម្ការលោក ខឹម វាសនា លុះត្រាតែរកឃើញបទល្មើសកើតឡើង
មន្ត្រីជាន់ខ្ពស់ក្រសួងយុត្តិធម៌ បានបញ្ជាក់អំពីមូលហេតុ ដែលអាជ្ញាធរ និងសមត្ថកិច្ចមិនមានវិធានការច្បាប់ ទៅលើការជួបជុំនៅចម្ការរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ។ ការបញ្ជាក់នេះ បន្ទាប់ពីមានមតិមួយចំនួនតូច បានលើកឡើងជុំវិញការជួបជុំនៅចម្ការលោក ខឹម វាសនា ចាប់តាំងពីចុងខែសីហា រហូតដល់ដើមខែកញ្ញា ថាតើហេតុអ្វីបានជាអាជ្ញាធរ និងសមត្ថកិច្ច មិនមានការចាត់វិធានការច្បាប់ ទៅលើការជួបជុំរបស់ពួកគេនោះ?
លោក ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ មានប្រសាសន៍ប្រាប់កម្ពុជាថ្មី នៅថ្ងៃទី ៦ ខែកញ្ញានេះថា ករណីជួបជុំមនុស្សនៅចម្ការរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ គឺអាជ្ញាធរ និងសមត្ថកិច្ច បានចាត់វិធានការរដ្ឋបាល ដោយបានអប់រំ ណែនាំ បំភ្លឺ ពន្យល់ឲ្យបញ្ឈប់ការជួបជុំ ហើយទប់ស្កាត់នូវរាល់សកម្មភាពនានា ដែលអាចបង្កហានិភ័យ ឬមួយក៏បង្កចលាចលដល់សង្គម។
ម្យ៉ាងទៀត មកដល់ពេលនេះ អាជ្ញារ និងសមត្ថកិច្ច ក៏បានអនុវត្តក្នុងការបញ្ឈប់ការជួបជុំ និងរុះរើសំណង់តាមវិធានការរដ្ឋបាល រួចហើយដែរ។ លោក ជិន ម៉ាលីន បានឲ្យដឹងបន្តថា ចំពោះវិធានការច្បាប់ អាចអនុវត្តទៅបាន លុះត្រាតែរកឃើញថា មានបទល្មើសកើតឡើង។
«ដើម្បីកំណត់ថា មានបទល្មើសវាទាមទារនូវធាតុផ្សំនៃបទល្មើស ដែលក្នុងនោះក៏ធាតុមួយ ដែលជាធាតុផ្សំសំខាន់នៃបទល្មើសដែរ គឺចេតនាទុច្ចរិត ហើយយើងឃើញថា ការជួបជុំរបស់គាត់នេះ គឺជាការប្រមូលផ្ដុំ ការផ្សព្វផ្សាយដែលប្រជាពលរដ្ឋ សកម្មជន អ្នកគាំទ្រមួយចំនួនគេជឿ ហើយមកធ្វើការជួបជុំ ក៏ប៉ុន្តែយើងមិនឃើញថា មានចេតនាទុច្ចរិត ក្នុងការប្រមូលផ្ដុំមនុស្ស ដើម្បីបង្កើតទៅជាតំបន់អបគមន៍ ធ្វើវិទ្ធង្សនា ឬមួយក៏ប្រឆាំងរាជរដ្ឋាភិបាល ផ្ដួលរំលំរាជរដ្ឋាភិបាល ដូចក្រុមសកម្មជននយោបាយមួយចំនួន ដែលធ្វើនាពេលកន្លងមកនោះទេ ដែលនាំឲ្យមានការទទួលខុសត្រូវតាមផ្លូវច្បាប់»។ នេះបើតាមការលើកឡើងរបស់អ្នកនាំពាក្យក្រសួងយុត្តិធម៌។
លោករដ្ឋលេខាធិការ បានលើកឡើងទៀតថា ការជួបជុំនោះ គឺកើតឡើងដោយការស្ម័គ្រចិត្ត និងការជឿពីអ្នកគាំទ្រ និងសកម្មជនរបស់លោក ខឹម វាសនា ហើយការជួបជុំនោះ ក៏បានធ្វើឡើងនៅទីតាំងដីឯកជន។ ដូច្នេះហើយ ទើបមិនមានការចាត់វិធានការតាមផ្លូវច្បាប់។ ប៉ុន្តែខុសពីក្រុមអ្នកនយោបាយផ្សេងមួយចំនួន ដែលប្រមូលផ្ដុំមនុស្សដើម្បីរៀបចំផែនការធ្វើសកម្មភាព បង្កភាពចលាចល និងប៉ុនប៉ងផ្ដួលរំលំរាជរដ្ឋាភិបាល ទើបមានការចាត់វិធាននានាទៅតាមផ្លូវច្បាប់។
យ៉ាងណាក៏ដោយ បើតាមលោក ជិន ម៉ាលីន ដដែល ប្រសិនបើមានប្រជាពលរដ្ឋ ដាក់ពាក្យបណ្ដឹងពាក់ព័ន្ធនឹងការបង្ខិតបង្ខំ ឬក៏បង្ខាំងមនុស្សដោយខុសច្បាប់ នៅក្នុងអំឡុងពេលនៃការជួបជុំនោះ សមត្ថកិច្ចអាចបើកការស្រាវជ្រាវបាន។ លោកថា «ក៏ប៉ុន្តែក្នុងករណី ដែលមានប្រជាពលរដ្ឋប្ដឹងពាក់ព័ន្ធដល់ការបង្ខិតបង្ខំ ឬការបង្ខាំងមនុស្សដោយខុសច្បាប់ អាហ្នឹងសមត្ថកិច្ចស្រាវជ្រាវបាន ប្រសិនបើរកឃើញថា មានការបង្ខិតបង្ខំ ឬមួយមានការបង្ខាំងមនុស្សដោយខុសច្បាប់ អាហ្នឹងជាបទល្មើស ហើយតែកាលណារកឃើញថា ជាបទល្មើសពាក់ព័ន្ធដល់ករណីបង្ខំ ឬក៏បង្ខាំងមនុស្សខុសច្បាប់ អាហ្នឹងនឹងមានវិធានការតាមផ្លូវច្បាប់ តាមបញ្ញត្តិច្បាប់ដែលមានជាធរមាន»។
គិតត្រឹមព្រឹកថ្ងៃទី ៦ ខែកញ្ញា ឆ្នាំ ២០២២នេះ គឺសកម្មជន និងអ្នកគាំទ្រ ដែលបានប្រមូលផ្ដុំគ្នានៅចម្ការរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានបំបែកជួរគ្នាស្ទើរតែទាំងស្រុងហើយ ដោយនៅសល់តិចតួចប៉ុណ្ណោះ ខណៈអាជ្ញាធរដាក់ឱសានវាទត្រឹមល្ងាចថ្ងៃទី ៥ ខែកញ្ញា ឆ្នាំ ២០២២ ឲ្យរំសាយការជួបជុំនៅទីនោះ៕
អត្ថបទ៖ ឃួន សុភ័ក្រ
-
ព័ត៌មានជាតិ៤ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ២ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ១ សប្តាហ៍ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ២ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៣ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
កីឡា១ សប្តាហ៍ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៧ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៤ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ