រដ្ឋបាលខេត្តបន្ទាយមានជ័យ បង្កើតក្រុម​ការងារបង្រ្កាប​ល្បែងស៊ីសង​ខុសច្បាប់គ្រប់​ប្រភេទ

បន្ទាយមានជ័យ៖ កាលពីរសៀលថ្ងៃទី១៧ ខែកញ្ញា ឆ្នាំ២០២២ ក្រោយទទួលបានបទបញ្ជាដ៏ខ្ពង់ខ្ពស់​របស់សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា លោក អ៊ុំ រាត្រី អភិបាលខេត្តបន្ទាយមានជ័យ ក្នុងនាមគណ:បញ្ជាការឯកភាពរដ្ឋបាលខេត្ត បានដឹកនាំកិច្ចប្រជុំបន្ទាន់ជាមួយស្នងការ មេបញ្ជាការកងកម្លាំង​ប្រដាប់អាវុធ អាជ្ញាធរក្រុង ស្រុក ដើម្បីដាក់ចេញការអនុវត្តន៍កិច្ចការងារ បង្រ្កាបការលេងល្បែងស៊ីសងខុសច្បាប់គ្រប់​ប្រភេទ ក្នុងភូមិសាស្ត្រខេត្តបន្ទាយមានជ័យឲ្យមានប្រសិទ្ធិភាពខ្ពស់ ទាន់ពេលវេលាតាមបទបញ្ជាដ៏ម៉ឺងម៉ាត់​បំផុតរបស់សម្តេច។

ជាមួយគ្នានោះរដ្ឋបាលខេត្តបានដាក់ចេញសេចក្តីសម្រេចបង្កើតក្រុមការងារបង្រ្កាបការលេងល្បែងស៊ីសងខុសច្បាប់គ្រប់ប្រភេទ ក្នុងភូមិសាស្ត្រខេត្តបន្ទាយមានជ័យ ដោយមានអភិបាលខេត្តជាប្រធាននិងអភិបាលរងខេត្ត ព្រះរាជអាជ្ញា  ស្នងការ មេអាវុធហត្ថ មេបញ្ជាការទិសទី១ ជាអនុប្រធានទទួលដឹកនាំតាមស្រុកក្រុងដែលជាសមាជិក។

សូមបញ្ជក់ថា នៅបន្ទាយមានជ័យក្រៅពីល្បែងស៊ីសងនៅតាមកាស៊ីណូនាក្រុងប៉ោយប៉ែតដែលសំបូរខ្មែរចូលលេង នៅមានល្បែងស៊ីសងជាច្រើនទៀត នៅកាស៊ីណូដូចជាល្បែងភ្នាល់បាល់ទាត់ ឆ្នោតថៃវៀតណាម អនឡាញធំតូច ជាពិសេសនៅពេលថ្មីៗនេះការជល់មាន់តាមអនឡាញ ដែលកើតមានតាមហាងកាហ្វេ ឬកន្លែងតារាងបាល់រហូត​ដល់ឃុំ។ ក្រោយសម្តេចបានចេញបទបញ្ជាក្បែងស៊ីសងឆ្នោត ជល់មាន់តាមអនឡាញ​ត្រូវបានបិទ៕ អពៅ