ក្រសួងអប់រំ បាននិងបន្តលើកកម្ពស់គុណភាព និងជីវភាពគ្រូបង្រៀន ដោយបន្តដំឡើងប្រាក់ខែជូនគ្រូបង្រៀនតាមលទ្ធភាពរបស់រាជរដ្ឋាភិបាល

អ្នកនាំពាក្យក្រសួងអប់រំ យុវជន និងកីឡា បានអះអាងថា ក្រសួង បាននិងបន្តលើកកម្ពស់គុណភាព និងជីវភាពគ្រូបង្រៀន ដោយបន្តដំឡើងប្រាក់ខែជូនគ្រូបង្រៀន តាមលទ្ធភាពរបស់រាជរដ្ឋាភិបាល។ ការអះអាងនេះ គ្រានៅថ្ងៃទី ៥ ខែតុលានេះ ជាទិវាគ្រូបង្រៀន ហើយបានប្រព្រឹត្តទៅក្រោមប្រធានបទ៖ «គ្រូបង្រៀនយើង អនាគតយើង ប្រទេសជាតិយើង»។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ប្រាប់កម្ពុជាថ្មី នៅថ្ងៃទី ៥ ខែតុលា ឆ្នាំ ២០២២នេះថា ការប្រារព្ធទិវាគ្រូបង្រៀន និងដោយឡែកទិវាដឹងគុណគ្រូបង្រៀននៅកម្ពុជា ជាទិវាមួយ ដែលបានកើតឡើងក្រោមគំនិតផ្តួចផ្តើម ប្រកបដោយគតិបណ្ឌិត​របស់សម្តេច​តេជោ ហ៊ុន សែន នាយក​រដ្ឋមន្រ្តី​​​នៃកម្ពុជា តាំងពីឆ្នាំ ១៩៩៧ ហើយមានគោលបំណងបំផុសឡើងវិញ នូវវប្បធម៌ និង​ប្រពៃណី នៃ​ការរំលឹកគុណូបការៈដ៏ថ្លៃថ្លារបស់​សិស្ស​ ចំពោះគ្រូបង្រៀននៅទូទាំងប្រទេស។

លោកបន្តថា គ្រូបង្រៀនបានខិតខំអំណត់ ព្យាយាមក្នុងការបំពេញភារកិច្ច ជាអ្នកបណ្តុះបណ្តាល ដើម្បីផ្ទេរចំណេះដឹង ព្រមទាំងទូន្មាន ​​​សិស្សានុសិស្សឲ្យធ្វើអំពើល្អ ស្គាល់​ខុស​ត្រូវ​ គោរព​ចាស់ទុំ តាមគំនិតថ្មីនៃការអប់រំ គឺរៀនដើម្បីមានចំណេះដឹង រៀនដើម្បីមានចំណេះធ្វើ រៀន​ដើម្បី​មានសីលធម៌ល្អ និងរៀន​ដើម្បីរួមរស់នៅ​ជាមួយគ្នា ប្រកបដោយ​ភាពសុខដុម។ គ្រូបង្រៀនបានរួមចំណែកកសាងសិស្សា-នុសិស្ស​ឲ្យ​ក្លាយ​ជាកូនល្អ សិស្សល្អ ពលរដ្ឋល្អ ដែលជាកម្លាំងចលករនៃការ​អភិវឌ្ឍសង្គម​ជាតិ។

លោក រស់ សុវាចា បានឲ្យដឹងថា ក្រសួងអប់រំ យុវជន និងកីឡា ផ្តោតលើការលើកកម្ពស់ ជីវភាព និងគុណវុឌ្ឍិរបស់គ្រូបង្រៀន សម្រាប់ចូលរួមចំណែកពង្រឹងគុណភាពអប់រំដូចមានចែង នៅក្នុងផែនការយុទ្ធសាស្ត្រវិស័យអប់រំ ២០១៩-២០២៣ ដែលមានបំណងចូលរួមជាមួយរាជរដ្ឋាភិបាល ក្នុងការអភិវឌ្ឍមូលធនមនុស្ស សម្រាប់ប្រែក្លាយសេដ្ឋកិច្ចកម្ពុជាឲ្យមានចំណូលមធ្យមកម្រិតខ្ពស់ ក្នុងឆ្នាំ ២០៣០ និងក្លាយជាប្រទេសអភិវឌ្ឍន៍នៅឆ្នាំ ២០៥០។ ក្នុងបរិការណ៍នេះ គ្រូបង្រៀនបន្តដើរតួនាទីសំខាន់មួយ ក្នុងការលើកកម្ពស់គុណភាពរៀន និងបង្រៀន មុននិងក្នុងបរិបទកូវីដ-១៩។

បើតាមអ្នកនាំពាក្យរូបនេះ គឺក្រសួងអប់រំ យុវជន និងកីឡា បាននិងបន្តលើកកម្ពស់គុណភាព និងជីវភាពគ្រូបង្រៀន ដោយបន្តដំឡើងប្រាក់ខែជូនគ្រូបង្រៀន តាមលទ្ធភាពរបស់រាជរដ្ឋាភិបាល៖

-ប្រាក់ខែគ្រូបង្រៀននៅឆ្នាំ ២០១៥ គឺចន្លោះជាង ៥សែនរៀល ដល់ ១លាន ២សែនរៀល

-ប្រាក់ខែគ្រូបង្រៀននៅឆ្នាំ ២០២២ គឺចន្លោះ ១លាន ២សែនរៀល ដល់ ២លាន ១សែនរៀល

-សម្តេចតេជោនាយករដ្ឋមន្ត្រី បានជម្រាបជូនមហាជនរួចមកហើយថា ចាប់ពីដើមឆ្នាំ ២០២៣តទៅ ប្រាក់ខែគ្រូបង្រៀន គឺមានចំនួន ១លាន ៥សែនយ៉ាងតិច។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បា​នឲ្យដឹងទៀតថា ក្នុងអាណត្តិទី ៦នេះ សម្ដេចតេជោនាយករដ្ឋមន្ត្រី បានដាក់ចេញយុទ្ធសាស្រ្តចតុកោណដំណាក់កាលទី ៤ ដោយបានចាត់ទុកការអភិវឌ្ឍធនធានមនុស្ស ជាអាទិភាពទី ១។ ក្រសួងអប់រំ យុវជន និងកីឡា នឹងប្ដេជ្ញាសម្រេចឲ្យបាននូវមុំទី ១ ស្ដីពី “ការពង្រឹងគុណភាពអប់រំ វិទ្យាសាស្រ្ត និងបច្ចេកវិទ្យា” ដោយផ្ដល់អាទិភាពលើ ១) ការយកចិត្តទុកដាក់លើគ្រូបង្រៀន ២) ការពង្រីកវិសាលភាពសាលារៀនគ្រប់កម្រិត ៣) ការពង្រឹងអធិការកិច្ចគ្រប់ជ្រុងជ្រោយ លើការគ្រប់គ្រងសាលារៀន ៤) ការជំរុញការអប់រំបច្ចេកទេសនៅមធ្យមសិក្សាទុតិយភូមិ ៥) ការអប់រំបំណិនឲ្យស្របតាមទីផ្សារការងារ ៦) ការអភិវឌ្ឍកម្មវិធីសិក្សា និងសៀវភៅសិក្សាគោលគ្រប់ជ្រុងជ្រោយ និង ៧) ការត្រៀមប្រកួតកីឡាស៊ីហ្គេមឆ្នាំ ២០២៣។

ក្នុងនោះដែរ ក្រសួងអប់រំ យុវជន និងកីឡា បាននិងបន្តលើកកម្ពស់គុណវុឌ្ឍិគ្រូបង្រៀន ដោយមានកិច្ចសហការវិជ្ជមានជាមួយគ្រប់ភាគីពាក់ព័ន្ធ ដូចជាក្រសួង-ស្ថាប័ន ដៃគូរអភិវឌ្ឍន៍ សង្គមស៊ីវិល វិស័យឯកជន សហគមន៍តាមមូលដ្ឋាន មាតាបិតា សិស្ស-និស្សិត និងបុគ្គលិកអប់រំគ្រប់លំដាប់ថ្នាក់ ដើម្បីបន្តអនុវត្តន៍ផែនការសកម្មភាព នៃគោលនយោបាយ ស្តីពី គ្រូបង្រៀនរបស់ក្រសួងអប់រំ យុវជន និងកីឡា ក៏ដូចជាការបន្តអនុវត្តយុទ្ធសាស្រ្តកំណែទម្រង់វិស័យអប់រំ យុវជន និងកីឡា ២០១៨ – ២០២៣។

មុន និងក្នុងបរិការណ៍កូវីដ-១៩ ក្រសួងអប់រំ យុវជន និងកីឡាបន្តលើកកម្ពស់ការបណ្តុះបណ្តាលគ្រូបង្រៀន តាមរយ:ការបន្តអនុវត្តកំណែទម្រង់គ្រឹះស្ថានបណ្តុះបណ្តាលគ្រូ និងលើកកម្ពស់គុណវុឌ្ឍិគ្រូបង្រៀនដោយ៖

-បន្តអនុវត្ត ផែនការសកម្មភាពកំណែទម្រង់គ្រឹះស្ថានបណ្តុះបណ្តាលគ្រូ

-ជំរុញគ្រប់គ្រឹះស្ថានបណ្តុះបណ្តាលគ្រូ ឲ្យបន្តអនុវត្តកម្មវិធីបណ្តុះបណ្តាលឲ្យបានពេញលេញ និងច្បាស់លាស់

-កំណត់អ្នកទទួលខុសត្រូវកម្រិតបច្ចេកទេស ដើម្បីឲ្យមានការទទួលខុសត្រូវរឹតតែច្បាស់លាស់។

-បន្តផ្តល់ការបណ្តុះបណ្តាល ដោយ​ប្រើ​វិធី​សាស្រ្ត​បង្រៀន​ថ្មីៗ​ និងការ​ប្រើ​បច្ចេកវិទ្យា​ព័ត៌មាន​ក្នុង​ដំណើរការ​បង្រៀន​ និង​រៀន​។ គ្រូបង្រៀន ក៏ទទួលបានវិធីសាស្រ្តបង្រៀនថ្មីៗ រួម​មាន​ការ​រៀន​សូត្រ​សកម្ម​ ការ​រៀន​បែប​ស្ថាបនា​ ការ​រៀន​តាម​បែប​ដោះស្រាយ​បញ្ហា​ ការ​រៀន​តាម​បែប​ស្រាវជ្រាវ​ និង​ការរៀនតាមបែបរិះរក រួមទាំងបច្ចេកទេសគ្រប់គ្រងថ្នាក់រៀនផ្ទាល់ និងតាមអនឡាញ។

ក្រសួងអប់រំយុវជន និងកីឡា ក៏បានថ្លែងអំណរគុណជូនចំពោះលោកគ្រូ អ្នកគ្រូ សាស្រ្តាចារ្យ បុគ្គលិកអប់រំគ្រប់លំដាប់ថ្នាក់ និងគ្រប់ភាគីពាក់ព័ន្ធ ដែលបានខិតខំប្រឹងប្រែងបំពេញកម្រងភារកិច្ចប្រកប​ដោយ​ស្មារតីទទួលខុសត្រូវខ្ពស់ និងមនសិការស្នេហាជាតិ។ ឧបការគុណនេះជាការចូលរួមចំណែកដ៏សំខាន់ ក្នុងការលើកកម្ពស់គុណភាពមូលធនមនុស្សកម្ពុជា៕

អត្ថបទ៖ ឃួណ សុភ័ក្រ