ភាគីថៃស្នើផ្តល់ជូនភាគីកម្ពុជានូវសំណើផ្សេងៗដើម្បីលើកកម្ពស់គុណភាពអប់រំ

បណ្ឌិតសភាចារ្យ ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា និងសាស្ត្រាចារ្យបណ្ឌិត Anek Laothamatas រដ្ឋមន្រ្តីក្រសួងឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ នៃព្រះរាជាណាចក្រថៃ បានចូលរួមកិច្ចប្រជុំពិភាក្សាស្តីពី កិច្ចសហប្រតិបត្តិការលើការអភិវឌ្ឍធនធានមនុស្ស និងការងារស្រាវជ្រាវលើផ្នែកវិទ្យាសាស្ត្រ និងបច្ចេកវិទ្យា។

ក្នុងឱកាសកិច្ចប្រជុំពិភាក្សា នៅថ្ងៃទី៧ ខែតុលា ឆ្នាំ២០២២នេះ ភាគីថៃបានស្នើផ្តល់ជូនភាគីកម្ពុជានូវសំណើផ្សេងៗដើម្បីចូលរួមលើកកម្ពស់គុណភាពអប់រំ ការអភិវឌ្ឍធនធានមនុស្ស ការស្រាវជ្រាវវិទ្យាសាស្ត្រ និងបច្ចេកវិទ្យាក្នុងវិស័យអប់រំ ព្រមទាំងរឹតចំណងកិច្ចសហប្រតិបតិ្តការរវាងប្រទេសទាំងពីរ។

គួរបញ្ជាក់ថា ក្រសួងឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍នៃព្រះរាជាណាចក្រថៃ ជាអាណាព្យាបាលគ្រឹះស្ថានឧត្តមសិក្សាប្រមាណ១៥០កន្លែង និងមជ្ឈមណ្ឌលស្រាវជ្រាវវិទ្យាសាស្ត្រប្រមាណ៣០កន្លែង៕