រំដោះ​ផ្ទៃដីគ្រាប់​មីន​ជិត ២០០ ហិកតានៅ​ខេត្តកំពត គ្រោង​​ប្រកាស​ខេត្តអស់មីន​ឆាប់ៗ

នៅក្នុងរយៈពេល ១ ខែ អង្គភាពស៊ីម៉ាក់បានធ្វើការបោសសម្អាតផ្ទៃដីមានគ្រាប់មីននៅខេត្តកំពតបានជិត ២០០ ហិកតាហើយគ្រោងបញ្ចប់បញ្ហាគ្រាប់មីនប្រឆាំងមនុស្សនៅខេត្តជាប់សមុទ្រមួយនេះ នៅដើមឆ្នាំក្រោយខាងមុខ។

បើតាមលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានលើកឡើងនៅក្នុងបណ្តាញសង្គម​ថា យោងតាមទិន្នន័យថ្នាក់ជាតិបានបង្ហាញថា ផ្ទៃដីសរុបនៅខេត្តកំពតដែលរងផលប៉ះពាល់ដោយសារគ្រាប់មីននៅសល់ មានចំនួន ៩៧៥ ហិកតា ហើយកំលាំងអង្គភាពស៊ីម៉ាក់បានទទួលអនុវត្តរំដោះគ្រាប់មីន ក្រោមការគាំទ្រនៃគម្រោងសម្តេចតេជោសម្រាប់សកម្មភាពមីន ក្រោមមូលបទ “ផ្តល់ដីសុវត្ថិភាព បង្កើតស្នាមញញឹម” ដែលមានទីតាំង​ស្ថិត​នៅភូមិដំណាក់ឈើក្រំ ឃុំស្នាយអញ្ចិត ស្រុកជុំគិរី ខេត្តកំពតបានចាប់ផ្តើមនៅដើមខែសីហា ឆ្នាំ២០២២ ដោយប្រើប្រាស់កម្លាំងប្រតិបត្តិការសំរាប់ទិសខាងត្បូងសរុបចំនួន ១៤ ក្រុម។

លោកអគ្គនាយកស៊ីម៉ាក់បានបន្តថា គិតត្រឹមចុងខែកញ្ញាឆ្នាំ២០២២ កំលាំងអង្គភាពស៊ីម៉ាក់បានសម្រេចសមិទ្ធិផល​បោស​សម្អាតផ្ទៃដីសរុបចំនួន ១៩៩ ហិកតាហើយបានរកឃើញគ្រាប់មីនប្រឆាំងមនុស្សចំនួន ១៣៥ គ្រាប់ និងយុទ្ធភណ្ឌមិនទាន់ផ្ទុះ ១៦០ គ្រាប់។ តាមផែនការអង្គភាពស៊ីម៉ាក់ត្រៀមបញ្ចប់បញ្ហាគ្រាប់មីនប្រឆាំងមនុស្សនៅខេត្តកំពត ក្នុងចុងខែមីនា ឆ្នាំ២០២៣ខាងមុខ។

លោកអគ្គនាយកស៊ីម៉ាក់បានបញ្ជាក់ថា អង្គភាពស៊ីម៉ាក់បានទទួលការគាំទ្រពីគំរោងសម្តេចតេជោក្នុងជំហានទី១ សម្រាប់​អនុវត្តភារកិច្ចបញ្ចប់ខេត្តចំនួន ៥ ជា “ខេត្តអស់គ្រាប់មីនប្រឆាំងមនុស្ស” រួមមានខេត្តតាកែវ ខេត្តកំពត ខេត្តកំពង់ឆ្នាំង ខេត្តកំពង់ចាម និងខេត្តស្វាយរៀង ដែលផ្ទៃដីចម្ការមីនសរុបជិត ៣.០០០ហិចតា៕

អត្ថបទ៖ សំអឿន