សម្ដេចតេជោ ប្រកាសជាថ្មី មិនលើកលែងដាច់ខាតចំពោះទណ្ឌិត សម រង្ស៊ី ដែលបានចោទប្រកាន់គ្មានការពិតមកលើសម្ដេច

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសជាថ្មីថា សម្ដេចមិនលើកលែងនូវការចោទប្រកាន់ដោយគ្មានការពិត របស់លោក សម រង្ស៊ី អតីតមេបក្សប្រឆាំង មកលើសម្ដេចជាដាច់ខាត ហើយសម្ដេចក៏នឹងមិនសរសេរលិខិតទូលថ្វាយព្រះមហាក្សត្រ ដើម្បីឲ្យលើកលែងទោសឲ្យលោក សម រង្ស៊ី ទៀតឡើយ។

នៅក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យភ្នំពេញអន្តរជាតិ (PPIU) នាព្រឹកថ្ងៃទី ១១ ខែតុលានេះ សម្ដេចតេជោ ហ៊ុន សែន បានថ្លែងដោយមិនបញ្ចេញឈ្មោះ តែគេដឹងថាចង់សំដៅទៅលោក សម រង្ស៊ី ថា សម្ដេច នឹងមិនសរសេរលិខិតទូលថ្វាយព្រះមហាក្សត្រ ដើម្បីឲ្យលើកលែងទោសឲ្យទណ្ឌិតរូបនេះ ទៀតឡើយ។  

សម្ដេចតេជោនាយករដ្ឋមន្ត្រី បានថ្លែងបន្តថា អតីតមេបក្សប្រឆាំងរូបនេះ ប្រព្រឹត្តកំហុសឆ្គងជាច្រើនមកលើសម្ដេច ហើយដែលមិនអាចលើកលែងឲ្យជាដាច់ខាត។ សម្ដេចតេជោ ហ៊ុន សែន បានថ្លែងយ៉ាងដូច្នេះថា «អ្នកឯងត្រូវចាំឲ្យច្បាស់ ការខុសឆ្គងអ្នកឯង…អ្នកឯងកុំសង្ឃឹម ទៅលើថា ហ៊ុន សែន អាចប្រើប្រាស់នូវដៃរបស់ ហ៊ុន សែន ដើម្បីលើកលែងទោសឲ្យអ្នកឯងឲ្យសោះ…អញ្ជើញចូលមកទៀតមក ហើយប្រកាសទៀតទៅ ប្រកាសផ្ដួលរំលំទៀតទៅ»។

ជាមួយគ្នានេះ សម្ដេចតេជោ ហ៊ុន សែន បានរំលឹកដែរថា ទណ្ឌិត សម រង្ស៊ី តែងតែចោទប្រកាន់ដោយគ្មានការពិតមកលើសម្ដេច ​និងក៏ធ្លាប់សុំទោសសម្ដេចជាច្រើនដងដែរ ហើយសម្ដេចក៏ធ្លាប់លើកលែងទោសឲ្យដែរ។ សម្ដេចតេជោនាយករដ្ឋមន្ត្រី បានរំលឹកយ៉ាងដូច្នេះថា «ដើរចោទគេ ចោទឯង ចោទខ្ញុំ សុំទោសប៉ុន្មានដងទៅ យើងបញ្ចេញឲ្យអស់ទៅ ២០០៦ ប៉ុន្មានឯណោះ សុំទោសខ្ញុំ ដកពាក្យបណ្ដឹងស្អីៗហ្នឹង អានេះវាក៏មិនយូរប៉ុន្មានទេ វាទៀតៗ»។

សម្ដេចតេជោ ហ៊ុន សែន គូសបញ្ជាក់ជាថ្មីទៀតថា ទណ្ឌិត សម រង្ស៊ី នឹងត្រូវរស់នៅក្រៅប្រទេសជារៀងរហូត ដោយនឹងមិនសរសេរលិខិតទូលថ្វាយព្រះមហាក្សត្រ ដើម្បីឲ្យលើកលែងទោសឲ្យអតីតមេបក្សប្រឆាំងរូបនេះទៀតឡើយ៕​

អត្ថបទ៖ ឃួន សុភ័ក្រ