សម្ដេចតេជោ ហ៊ុន សែន អរគុណពលរដ្ឋនៅខេត្តពោធិ៍សាត់ ដែលបានបោះឆ្នោតជូនគណបក្សប្រជាជនកម្ពុជា ឈ្នះភ្លូកទឹកភ្លូកដី

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជា បានថ្លែងអំណរគុណដល់ប្រជាពលរដ្ឋនៅខេត្តពោធិ៍សាត់ ដែលបានបោះឆ្នោតជូនគណបក្សប្រជាជនកម្ពុជា ឈ្នះភ្លូកទឹកភ្លូកដី ក្នុងការបោះឆ្នោតបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥កន្លងទៅនេះ។

នៅក្នុងពិធីសំណេះសំណាល ជាមួយប្រជាកសិករជាង ៥ពាន់គ្រួសារ រងគ្រោះដោយសារគ្រោះទឹកជំនន់ នៅក្នុងខេត្តពោធិ៍សាត់ នាព្រឹកថ្ងៃទី ២៥​ ខែតុលានេះ សម្ដេចតេជោ ហ៊ុន សែន បានថ្លែងអំណរគុណដល់ប្រជាពលរដ្ឋនៅខេត្តពោធិ៍សាត់ និយាយដោយឡែក និងនិយាយជារួម ប្រជាពលរដ្ឋនៅទូទាំងប្រទេស ដែលបានបោះឆ្នោតជូនគណបក្សប្រជាជនកម្ពុជា ឲ្យទទួលបានជ័យជំនះភ្លូកទឹកភ្លូកដី ក្នុងការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ កាលពីពេលថ្មីៗនេះ។

សម្ដេចតេជោ ហ៊ុន សែន បានថ្លែងបន្តថា ខេត្តពោធិ៍សាត់ មានប្រជាពលរដ្ឋគាំទ្រគណបក្សប្រជាជនកម្ពុជាខ្ពស់ណាស់ ហើយកាលពីការបោះឆ្នោតជ្រើសតាំងតំណាងរាស្រ្ដអាណត្តិមុន គឺគណបក្សប្រជាជនកម្ពុជា បានឈ្នះរហូតដល់ ៤អាសនៈតែម្ដង។ សម្ដេចតេជោ ហ៊ុន សែន បានថ្លែងទៀតថា «ឥឡូវយោងទៅលើលទ្ធផល ដែលឆ្លុះបញ្ចាំងពីការបោះឆ្នោតឃុំសង្កាត់ យើងអាចទទួលទាំង ៤អាសនៈ នៅក្នុងខេត្តពោធិ៍សាត់»។

នៅក្នុងឱកាសនេះដែរ សម្ដេចតេជោ ហ៊ុន សែន បានបង្ហាញក្ដីសង្ឃឹមថា ប្រជាពលរដ្ឋនៅទូទាំងខេត្តពោធិ៍សាត់ នឹងបន្តបោះឆ្នោតជូនគណបក្សប្រជាជនកម្ពុជា បន្តទៀត នៅក្នុងការបោះឆ្នោតជ្រើសតាំងតំណាងរាស្រ្ដនីតិកាលទី ៧ នាថ្ងៃទី ២៣ ខែកក្កដា ឆ្នាំ ២០២៣ ខាងមុខ ដើម្បីបានបម្រើ ការពារ និងដោះស្រាយបញ្ហាជូនប្រជាពលរដ្ឋ បន្តទៀតផងដែរ៕

អត្ថបទ៖ ឃួន សុភ័ក្រ