លោកស្រី បាន ស្រីមុំ ប្រតិកម្មចំពោះបុរស-ស្ត្រី ២នាក់ប្ដីប្រពន្ធ ផ្សាយផ្ទាល់លើហ្វេសប៊ុកប្រើពាក្យសម្ដីអសុរោះ

លោកស្រី បាន ស្រីមុំ អភិបាលខេត្តប៉ៃលិន បានបញ្ចេញប្រតិកម្មទៅកាន់បុរស-ស្ត្រី ២នាក់ប្ដីប្រពន្ធ រស់នៅក្រៅប្រទេស ដែលតែងតែផ្សាយផ្ទាល់លើហ្វេសប៊ុករបស់ខ្លួន ប្រើពាក្យសម្ដីអសុរោះ ជេរខ្មែរក្រហម ប្រមាថ​ប្រជាជនខ្មែរល្ងង់ និងជេរប្រមាថថ្នាក់ដឹកនាំកម្ពុជា។ លោកស្រីអភិបាលខេត្ត បានស្នើឲ្យបញ្ឈប់សកម្មភាពនេះជាបន្ទាន់។

លោកស្រី បាន ស្រីមុំ បានសរសេរនៅលើគណនីហ្វេសប៊ុករបស់ខ្លួន កាលពីថ្ងៃទី ២៣ ខែតុលាថា «យើងឃើញមីងពូ ២នាក់ប្តីប្រពន្ធនេះ តែងតែឡាយជេរខ្មែរក្រហម ប្រជាជនខ្មែរល្ងង់ ជេរថ្នាក់ដឹកនាំកម្ពុជា យើងកប់ៗមាត់ មីងពូ ហាស មីងពូកើតអី ក្តៅក្រហាយរឿងអី មីងពូ មិនសប្បាយចិត្ត ឈ្លោះជាមួយអ្នកណា សូមមីងពូឈ្លោះតែអ្នកនោះទៅ ជាពិសេសយើងទាំងអស់គ្នា មានទីលំនៅអតីតតំបន់ខ្មែរក្រហម យើងជាកូនចៅ និងប្រជាជនកងកម្លាំងអតីតខ្មែរក្រហម ដែលបានចូលរួមចំណែកបង្រួបបង្រួមស្វែងរកដំណេះស្រាយ តាមរយៈនយោបាយឈ្នះ-ឈ្នះ សម្តេចតេជោ ហ៊ុន សែន ដើម្បីបញ្ចប់សង្គ្រាម នៅកម្ពុជា»។

អភិបាលខេត្តប៉ៃលិន បានសរសេរបន្តថា «បើមីងពូ មិនចូលចិត្តខ្មែរ ឬក៏រើសអើងខ្មែរក្រហមនោះ សូមមេត្តាពូមីងតាម ដានប្រវត្តិសាស្រ្តច្បាស់លាស់ផង ខ្មែរក្រហម មានច្រើនប្រភេទ មានខ្មែរក្រហមល្អ និង ខ្មែរក្រហម របបប្រល័យពូជសាសន៍ ហើយខ្ញុំសូមបញ្ជាក់ពូមីងថា លោកជំទាវ ហ៊ុន ស៊ីណាត មិនមែនជាអតីតខ្មែរក្រហម ឬក៏លោកធ្លាប់ចូលរួមតស៊ូជាមួយខ្មែរក្រហមអ្វីឡើយ កុំចេះតែជេរមួលបង្កាច់គាត់ខុសរឿង ព្រោះតែកំហឹង យកចាញ់ឈ្នះ វាមិនថ្លៃថ្នូរទេ»។

ជាមួយគ្នានេះលោកស្រី បាន ស្រីមុំ ក៏បានស្នើបុរស-ស្ត្រី ២នាក់ប្ដីប្រពន្ធនោះ សូមបញ្ឈប់ជេរប្រមាថ ថ្នាក់ដឹកនាំកម្ពុជា និងសូមបញ្ឈប់ការលាបពណ៌រើសអើងជាបន្ទាន់។ លោកស្រីអភិបាលខេត្តប៉ៃលិន បានសរសេរយ៉ាងដូច្នេះថា «បើមីងពូប្តីប្រពន្ធនេះ មិនបានរស់នៅកម្ពុជា ហើយមិនដែលបានចូលរួមជួយអ្វីដល់ប្រជាជន ប្រទេសជាតិទេ សូមបញ្ឈប់ជេរថ្នាក់ដឹកនាំប្រទេសកម្ពុជា ជាពិសេសសម្តេចតេជោ ហ៊ុន សែន ក៏ដូចជារើសអើងប្រៀបធៀប អ្នកណាខ្មែរក្រហម ខ្មែរខៀវ ខ្មែរស អីទៀតទៅ ព្រោះមកដល់ម៉ោងនេះពេលនេះ មានខ្មែរតែមួយ ជ្រកក្រោមម្លប់នៃឆ័ត្រសន្តិភាពតែមួយ។ សូមបញ្ឈប់ការលាបពណ៌រើសអើងជាបន្ទាន់»៕