អធិការស្រុកជុំគិរី បញ្ជាក់ថា ក្នុងមូលដ្ឋានរបស់ខ្លួនមិនមានករណីឆបោក Online Scam នោះទេ

លោកវីរសេនីយ៍ឯក ម៉ី សុខុម អធិការនៃអធិការដ្ឋាននគរបាលស្រុកជុំគិរី ខេត្តកំពត បានបញ្ជាក់ឱ្យដឹងថា ស្ថានភាពសន្តិសុខសណ្តាប់ធ្នាប់ នៅទូទាំងស្រុកមានភាពល្អប្រសើរ ព្រោះការអនុវត្តគោលនយោបាយភូមិឃុំសង្កាត់មានសុវត្ថិភាព មានប្រសិទ្ធភាពខ្ពស់។ ហើយជាពិសេស ការលួចបើកទីតាំងប្រព្រឹត្តអំពើឆបោកតាមប្រព័ន្ធបច្ចេកវិទ្យា(0nline Scams) គឺមិនមាននោះទេ ទោះស្រុកមានរោងចក្រ និងជនបរទេសស្នាក់នៅ និងធ្វើការច្រើនក៏ដោយ។

លោកវរសេនីយឯក ម៉ី សុខុម បានលើកឡើងថា ដោយមានការណែនាំពីលោកអភិបាលខេត្ត ពិសេសក្រោមបទបញ្ជាដ៏ម៉ឺងមាត់របស់លោកសេនីយ៍ទោស្នងការខេត្តកំពត កម្លាំងអធិការដ្ឋានស្រុកបាននិងកំពុងចុះពិនិត្យ ស្រាវជ្រាវតាមដានដោយយកចិត្តទុកដាក់ចំពោះមុខសញ្ញាដែលអាចបង្កឲ្យមានអំពើឆបោកតាមប្រព័ន្ធអនឡាញ ហើយគិតមកដល់ពេលនេះស្រុកគ្មានករណីឆបោកតាមប្រព័ន្ធអនឡាញនោះឡើយ។

លោកអធិការស្រុកជុំគិរី បានបញ្ជាក់អំពីមូលហេតុនៃការថយចុះបទល្មើផ្សេងៗក្នុងមូលដ្ឋានជាលំដាប់ គឺដោយសារតែកម្លាំងអធិការដ្ឋាន ផ្តោតខ្លាំងទៅលើការងារបង្ការ និងទប់ស្កាត់ឲ្យបានទាន់ពេលវេលា។

ទោះជាយ៉ាងណាក៏ដោយ បើតាមរបាយការណ៍របស់លោកវីរៈសេនីយ៍ឯក មុី សុខុម អធិការស្រុជុំគីរី បានឱ្យដឹងពីលទ្ធផលការងាររយៈពេល៦ខែ ឆ្នាំ២០២៦ របស់អធិការដ្ឋានស្រុកជុំគិរី  បានបង្ហាញថា ករណីគ្រោះថ្នាក់ចរាចរណ៍មានច្រើនជាងគេ គឺ៤១ករណី បណ្តាលឲ្យមនុស្សស្លាប់៩នាក់ របួសធ្ងន ៣៨នាក់  និងស្រាល ៥១នាក់  ខណៈដែលបទល្មើសព្រហ្មទណ្ឌកើតឡើងចំនួន ១៣ករណី (បទល្មើសឧក្រិដ្ឋកើតឡើងចំនួន ០២ករណី) និងបទល្មើសមជ្ឈិមកើតឡើងចំនួន១១ករណី៕

អត្ថបទ៖ សឹង រ៉ាត់