ស្អែកនេះចាប់ផ្តើមគិតថ្លៃហើយ មកដឹងពីតម្លៃធ្វើដំណើរតាមផ្លូវល្បឿនលឿន

ចាប់ពីថ្ងៃទី០១ វិច្ឆិកា ស្អែកនេះទៅ ការធ្វើដំណើរលើផ្លូវល្បឿនលឿន នឹងត្រូវគិតថ្លៃហើយ ដោយសេវាធ្វើដំណើរលើផ្លូវនេះនឹងគណនាតាមរយៈចម្ងាយជាក់ស្តែងនៃការបើកបរ និងតាមប្រភេទយានយន្ត ដោយបែងចែកជា ៥ប្រភេទ។ ក្រុមហ៊ុនផ្លូវល្បឿនលឿនបញ្ជាក់ថា ការ​ចាប់ផ្តើម​យក​ថ្លៃ​សេវាធ្វើដំណើរនេះ គឺមានការបញ្ចុះតម្លៃ ២០% រយៈពេល ១ឆ្នាំ ចាប់ពីថ្ងៃទី០១ ខែវិច្ឆិកា ឆ្នាំ២០២២ រហូតដល់ថ្ងៃទី៣១ ខែតុលា ឆ្នាំ២០២៣។

យោងតាមតារាងកម្រៃដែលទូទាត់លើមធ្យោបាយធ្វើដំណើរតាមផ្លូវល្បឿនលឿនភ្នំពេញ-ក្រុងព្រះសីហនុ របស់ក្រុមហ៊ុន បានបែងចែកតម្លៃយ៉ាងលម្អិតជាពីរ ដោយតម្លៃទីមួយគឺតម្លៃបានបញ្ចុះតម្លៃរួចហើយ (-២០%) និងមួយទៀតជាតម្លៃពេញ(១០០%) ទៅតាម ៥ប្រភេទយានយន្ត ប្រភេទ A-E។

• ប្រភេទ A
  ទោចក្រយានយន្តទំហំសុីឡាំងចាប់ ៥០០cc ឡើងទៅ; រថយន្តគ្រួសារ (មិនលើសពី ៧ កៅអី) និងរថយន្តដឹកទំនិញ អាចផ្ទុកទំនិញក្រោម ២តោន ដែលស្ថិតនៅក្នុងប្រភេទA ត្រូវបង់ ០,០៦៤ ដុល្លារ/គ.ម (តម្លៃបញ្ចុះ ២០%) ។
• ប្រភេទ B
  រថយន្តដឹកអ្នកដំណើរ (ចាប់ពី ៨-១២កៅអី) និងរថយន្តដឹកទំនិញ (អាចផ្ទុកទំនិញ ២តោន-៥តោន) ស្ថិតក្នុងប្រភេទB វិញ តម្រូវឱ្យបង់ ០,១២៨ ដុល្លារ/គ.ម (តម្លៃបញ្ចុះ ២០%) ។
• ប្រភេទ C
  រថយន្តដឹកអ្នកដំណើរ (ចាប់ពី ២០-៥៦កៅអី) និងរថយន្តដឹកទំនិញ (អាចផ្ទុកទំនិញលើសពី ៥តោន-១០តោន) តម្រូវឱ្យបង់ ០,១៩២ ដុល្លារ/គ.ម (តម្លៃបញ្ចុះ ២០%) ។
• ប្រភេទ D
  រថយន្តដឹកទំនិញ ដែលអាចផ្ទុកទំនិញលើសពី ១០តោន-២០តោន គឺតម្រូវឱ្យបង់ ០,២៥៦ ដុល្លារ/គ.ម (តម្លៃបញ្ចុះ ២០%) ។
• ប្រភេទ E
  រថយន្តដឹកទំនិញ ដែលអាចផ្ទុកទំនិញលើសពី ២០តោនឡើងទៅ គឺតម្រូវឱ្យបង់ ០,៣២ ដុល្លារ/គ.ម (តម្លៃបញ្ចុះ ២០%) ។

ទន្ទឹមនឹងដំណើរការបង់សេវាលើការប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុនេះ នគរបាលចរាចរណ៍ ក៏នឹងចាប់ផ្តើមរឹតបន្តឹងលើការអនុវត្តការផាកពិន័យផងដែរ ពិសេសចំពោះអ្នកបើកបរលើសល្បឿនកំណត់។

សូមរំលឹកថា ​សម្រាប់រថយន្តគ្រួសារ​ អាចបើកបរក្នុងល្បឿនលឿនបំផុត ១២០គីឡូម៉ែត្រ/ម៉ោង ខណៈល្បឿនទាបបំផុត ៦០គីឡូម៉ែត្រ/ម៉ោង ។ ដោយឡែកសម្រាប់រថយន្តកុងតឺន័រមានសណ្តោង អាចបើកបរក្នុងល្បឿនត្រឹមតែ ៨០គីឡូម៉ែត្រ/ម៉ោង និងសម្រាប់រថយន្តធំអត់មានសណ្តោង អាចបើកបរក្នុងល្បឿន ១០០គីឡូម៉ែត្រ/ម៉ោង ។

លោក ស៊ុន​ ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ធ្លាប់បានគូសបញ្ជាក់ជាច្រើនលើករួចមកហើយសម្រាប់រថយន្តធុនធំ គឺតម្រូវឱ្យបើកបរប្រកាន់ស្តាំជានិច្ច ដោយមិនអាចបើកលើគន្លងខាងឆ្វេងប្រើពេលយូរឡើយ៕