វៀតណាម បញ្ចេញទឹកប្រាក់ជាង ៣ពាន់លានដុល្លារ សាងសង់ផ្លូវល្បឿនលឿនមួយខ្សែទៀត ភ្ជាប់មកកម្ពុជា

ក្រុមប្រឹក្សាគ្រប់គ្រងគម្រោង My Thuan ក្រោមក្រសួងដឹកជញ្ជូនវៀតណាម បានប្រកាសកាលពីថ្ងៃពុធទី២៣ខែតុលាឆ្នាំ២០២៤ថា ការសិក្សាបឋមសម្រាប់ផ្លូវល្បឿនលឿន Ha Tien – Rach Gia – Bac Lieu ប្រវែងជាង១៧៥គីឡូម៉ែត្រ តភ្ជាប់ខេត្តភាគនិរតីវៀតណាមជាមួយកម្ពុជា បានបញ្ចប់រួចរាល់អស់ហើយ ហើយត្រៀមបើកកញ្ចប់ថវិកា៨០.៨ទ្រីលានដុង ស្មើនឹង ៣.១៧ពាន់លានដុល្លារអាមេរិក ដើម្បីសាងសង់ ប៉ុន្តែសំណើនេះ ត្រូវបញ្ជូនទៅក្រសួងសិន មុននឹងចាប់ផ្តើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន VN Express ចុះផ្សាយថា តាមគម្រោង ផ្លូវល្បឿនលឿនមួយខ្សែថ្មីនេះ នឹងចាប់ផ្តើមនៅច្រកទ្វារព្រំដែនអន្តរជាតិ Ha Tien ក្នុងទីក្រុង Ha Tien នៃខេត្ត Kien Giang ហើយបញ្ចប់នៅទីក្រុង Bac Lieu ខេត្ត Bac Lieu។

ផ្លូវនេះមានប្រវែងសរុបប្រហែល១៧៥គីឡូម៉ែត្រ មានបួនគន្លង និងផ្លូវសង្គ្រោះបន្ទាន់ចំនួនពីរ ឆ្លងកាត់ខេត្តចំនួន៤នៅតំបន់ដីសណ្ដទន្លេមេគង្គដូចជា Kien Giang (៨២គីឡូម៉ែត្រ), Hau Giang (១៨គីឡូម៉ែត្រ), Soc Trang (១៣គីឡូម៉ែត្រ) និង Bac Lieu (២៥.៣គីឡូម៉ែត្រ)។

សូមបញ្ជាក់ជាថ្មី រដ្ឋបាលផ្លូវថ្នល់​​វៀតណាម​ បាន​ដាក់​ក្នុង​សំណើ​មួយ​ថា ប្រទេសនេះ​រំពឹងមានផ្លូវល្បឿនលឿនចំនួន ៤៣ ខ្សែដែលគ្របដណ្តប់លើ​ប្រវែង​ប្រមាណ​ ៩ ២៣៤ គីឡូម៉ែត្រ​ ត្រឹម​ឆ្នាំ​ ២០៥០។

ក្នុងផែនការកសាង​ផ្លូវថ្មី ចាប់ពីឆ្នាំ២០២១-២០៣០ ជាមួយនឹងចក្ខុវិស័យឆ្ពោះទៅឆ្នាំ២០៥០ ដែលដាក់ជូនដោយរដ្ឋបាលទៅកាន់​ក្រសួងដឹកជញ្ជូន, ផ្លូវល្បឿនលឿនប្រមាណ ៦​ ៧៥៤ គីឡូម៉ែត្រ គ្រោងនឹងបញ្ចប់នៅឆ្នាំ២០៣០ ហើយនៅសល់ប្រមាណ​​​ ២ ៤៨០ គីឡូម៉ែត្រ គ្រោង​បញ្ចប់ក្រោយឆ្នាំ ២០៣០​៕

អត្ថបទ៖ សុខ សុវណ្ណ

ចុចអាន៖ ផ្លូវល្បឿនលឿនវៀតណាម តភ្ជាប់មកព្រំដែនកម្ពុជា នឹងបញ្ចប់ការសាងសង់នៅឆ្នាំ២០២៧