ព័ត៌មានជាតិ

ខេត្តចំនួន ៥ នឹងត្រូវបញ្ចប់បញ្ហាគ្រាប់មីននៅចុងឆ្នាំ ២០២២

បានផុស

៤ years មុន

នៅ

ថ្ងៃព្រហស្បតិ៍ ៣ វិច្ឆិកា ២០២២

ដោយ

ខេត្តចំនួន ៥ រួមមាន ខេត្តតាកែវ កំពត កំពង់ឆ្នាំង កំពង់ចាម និងខេត្តស្វាយរៀង ដែលអង្គភាពស៊ីម៉ាក់ ទទួលភារកិច្ចបញ្ចប់បញ្ហាគ្រាប់មីនក្រោម “គម្រោងសម្ដេចតេជោ សម្រាប់សកម្មភាពមីន” ក្នុងជំហានទី ១ នឹងត្រូវបញ្ចប់បញ្ហាគ្រាប់មីននៅចុងឆ្នាំ ២០២២ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈផេកហ្វេសប៊ុកចេញផ្សាយនៅថ្ងៃនេះ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានសរសេរថា កិច្ចប្រតិបត្តិការក្រោម “គម្រោងសម្ដេចតេជោ សម្រាប់សកម្មភាពមីន” ក្នុងជំហានទី ១ អង្គភាពស៊ីម៉ាក់ បានទទួលភារកិច្ចបញ្ចប់បញ្ហាគ្រាប់មីននៅខេត្តចំនួន ៥ គឺ ខេត្តតាកែវ កំពត កំពង់ឆ្នាំង កំពង់ចាម និងខេត្តស្វាយរៀង ដែលផ្ទៃដីបញ្ហាគ្រាប់មីនសរុបជិត ៣,០០០ ហិកតា ហើយគិតមកដល់ចុងខែតុលា ឆ្នាំ ២០២២ នេះ សម្រេចបានជិត ៨០% នៃផែនការ ជាគោលដៅខេត្តទាំង ៥ ត្រូវបញ្ចប់បញ្ហាគ្រាប់មីននៅចុងឆ្នាំ ២០២២ នេះ។

លោកបានបន្តថា ក្នុងនោះអង្គភាពបោសសម្អាតមីនភាគខាងត្បូងបានទទួលអនុវត្តគម្រោងសម្ដេចតេជោ សម្រាប់សកម្មភាពមីន ក្នុងខេត្តចំនួន ០៣ ខេត្តតាកែវ ខេត្តកំពត និងខេត្តកំពង់ស្ពឺ ដោយសម្រេចលទ្ធផលរំដោះផ្ទៃដីចម្ការមីនចំនួនជាង ១.៧០២ ហិកតា រកឃើញ និងកម្ទេចចោលមីនប្រឆាំងមនុស្ស ៨១៥ គ្រាប់ រកឃើញ និងកម្ទេចចោលគ្រាប់យុទ្ធភណ្ឌមិនទាន់ផ្ទុះ ១២០៩ គ្រាប់។

លោកបានបន្តទៀតថា ដោយឡែកសម្រាប់ខេត្តកំពត បានរំដោះផ្ទៃដីចម្ការមីនចំនួនជាង ៦៦៤ ហិកតា រកឃើញ និងកម្ទេចចោលមីនប្រឆាំងមនុស្ស ៣៨៥ គ្រាប់ រកឃើញ និងកម្ទេចចោលគ្រាប់យុទ្ធភណ្ឌមិនទាន់ផ្ទុះ ៤៨៥ គ្រាប់ ហើយតាមផែនការគ្រោងទុក ខេត្តកំពត នឹងបញ្ចប់ការបោសសម្អាតមីនទាំងស្រុង ត្រឹមចុងខែវិច្ឆិកា ឆ្នាំ ២០២២ ខាងមុខនេះ៕

អត្ថបទ ៖ សំអឿន