AOT ទាំងនៅខាងកម្ពុជានិងថៃ សុទ្ធតែអះអាងថា មីនដែលទាហានថៃ ដើរជាន់ គឺជាមីនចាស់

នាយករដ្ឋមន្ត្រីថៃប្រកាសផ្អាកកិច្ចព្រមព្រៀងសន្តិភាពជាមួយកម្ពុជា ដោយយកលេសថា ទាហានរបស់ខ្លួនដើរជាន់មីននិងដាក់កំហុសមកលើកម្ពុជាថាបានដាក់មីនថ្មី ប៉ុន្តែយ៉ាងណា ការពិតត្រូវបានលាតត្រដាង ដោយពេលនេះ ក្រុមអ្នកសង្កេតការណ៍អាស៊ាន (AOT) ទាំងនៅខាងកម្ពុជានិងថៃ សុទ្ធតែអះអាងថា មីនដែលទាហានថៃ ដើរជាន់នោះគឺជាមីនចាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bernama កាលពីថ្ងៃព្រហស្បតិ៍ទី១៣ខែវិច្ឆិកាឆ្នាំ២០២៥ រដ្ឋមន្ត្រីក្រសួងការបរទេសម៉ាឡេស៊ី Mohamad Hasan បានបញ្ជាក់យ៉ាងច្បាស់ថា៖ «AOT នៅកម្ពុជានិងថៃសុទ្ធតែបានរាយការណ៍ថា មីនដែលទាហានថៃដើរជាន់នៅព្រំដែន គឺមិនមែនជាមីនដាក់ថ្មីៗទេ។ ខ្ញុំទើបតែនិយាយទូរសព័្ទជាមួយរដ្ឋមន្ត្រីការបរទេសថៃរួច ហើយសង្ឃឹមថា ភាគីទាំងពីរនឹងរក្សាភាពស្ងប់ស្ងាត់និងបន្តកិច្ចពិភាក្សាសន្តិភាព»។

យ៉ាងណា លោក Mohamad លើកឡើងថា AOT មិនស្ថិតនៅព្រំដែនទេ ប៉ុន្តែពួក​គេ​កំពុង​តាម​ដាន​យ៉ាងយកចិត្តទុកដាក់ និង​រាយការណ៍​អំពី​ការវិវត្តស្ថានការណ៍ទៅ​កាន់​ភាគី​ពាក់ព័ន្ធ។

សូមជម្រាបជាថ្មី នាយករដ្ឋមន្ត្រីថៃ អនុទីន ឆាន់វីរៈគុល បានប្រកាសជាឯកតោភាគី ផ្អាកកិច្ចព្រមព្រៀងសន្តិភាពជាមួយកម្ពុជាដែលមានប្រធានាធិបតីអាមេរិក ដូណាល់ ត្រាំ និងប្រធានអាស៊ានឆ្នាំ២០២៥ គឺនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ជាសាក្សី។

ក្រោយផ្អាកនោះផងដែរ លោកអនុទីន បានបោះសម្តីទៅកាន់លោកត្រាំថា ប្រសិនបើទីក្រុងវ៉ាស៊ីនតោន ហ៊ានចាត់វិធានការដំឡើងពន្ធដើម្បីដាក់សម្ពាធមែននោះ ថៃ នឹងស្វែងរកទីផ្សារផ្សេងជំនួសអាមេរិក ដែលការនិយាយបែបនេះ បង្កឲ្យមានពាក្យរិះគន់និងស្តីបន្ទោសយ៉ាងខ្លាំងនៅក្នុងប្រទេសថៃ៕

អត្ថបទ៖ សុខ សុវណ្ណ

ចុចអាន៖ សមាជិកសភាថៃ បន្ទោស អនុទីន ដែលផ្អាកកិច្ចព្រមព្រៀងសន្តិភាពជាមួយ កម្ពុជា