ថៃ តែងអះអាងថា ទាហានល្បាតលើដីខ្លួនឯង ប៉ុន្តែពេលជាន់មីន មកបន្ទោសតែកម្ពុជា

មេភូមិភាគ២ថៃ Boonsin Padklang អះអាងថា ទាហានទាំង៥នាក់ដែលជាន់មីនកាលពីល្ងាចថ្ងៃពុធគឺជាន់មីនលើទឹកដីខ្លួននៅក្នុងខេត្ត Ubon Ratchathani ប៉ុន្តែបែរជាដាក់កំហុសមកលើកម្ពុជាទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាហានថៃទាំង៥មានឈ្មោះ Pichitchai Bunchoola, Phisit Senasi, Suphakit Phongthai, Seksan Lunchak និង Jakkrit Butte។ ក្នុងចំណោមទាហានខាងលើ Pichitchai ត្រូវរបួសធ្ងន់ជាងគេគឺដាច់ជើងស្តាំ ខណៈ៤នាក់ទៀតតឹងទ្រូងនិងហ៊ឹងត្រចៀក។

មិនមែនជារឿងថ្មីឡើយដែលថៃ មកចោទប្រកាន់កម្ពុជាពេលទាហានខ្លួនជាន់មីន។ ជាក់ស្តែងកាលពីថ្ងៃទី១៦ខែកក្កដា ទាហានថៃ៣នាក់ក៏ដើរជាន់មីនដែរ ដោយក្នុងនោះមានម្នាក់របួសធ្ងន់ដាច់ជើងដូចគ្នា។

ដំបូងមេភូមិភាគ២ថៃ អះអាងថា មីនដែលទាហានខ្លួនជាន់គឺជាប្រភេទ PMN-2 សល់ពីសម័យសង្គ្រាម តែប្រហែលជាភ្លេចខ្លួនក៏ក្រោយមកក្រឡាស់សម្តីវិញថា មីននោះជាមីនទើបបង្កប់ថ្មី ដែលទាហានខ្មែរចូលដីថៃ លួចបង្កប់។

ជាថ្មីម្តងទៀត ឥឡូវថៃនៅតែចោទប្រកាន់ទាំងងងើលនិងគ្មានមូលដ្ឋានមកលើកម្ពុជា ថាជាអ្នកបង្កប់មីននៅព្រំដែន ទើបទាហានខ្លួនជាន់។

យ៉ាងណា មានសំណួរចោទសួរទៅវិញថា តើទាហានខ្មែរអាចចូលដីថៃទៅដាក់មីនបានដោយរបៀបណា បើថៃមានការល្បាត២៤ម៉ោងលើ២៤ម៉ោង ហើយថាតើ ទាហានថៃល្បាតលើផ្លូវថ្មីឬផ្លូវចាស់ ទើបជាន់មីនដូច្នេះ?

ម្យ៉ាងហេតុការណ៍ថ្មីនេះកើតឡើងមិនយូរប៉ុន្មានឡើយបន្ទាប់ពីប្រទេសថៃ បានអញ្ជើញអនុព័ន្ធយោធាបរទេសចំនួន៤៧ប្រទេសមកស្តាប់ការបកស្រាយនិងមើលព័ស្តុតាង ចោទប្រកាន់មកលើកម្ពុជា ប៉ុន្តែ ថៃត្រូវបាក់មុខយ៉ាងខ្លាំង ព្រោះតែក្នុងចំណោមអនុព័ន្ធយោធាបរទេសដែលត្រូវអញ្ជើញ មានតែ១៨ប្រទេសប៉ុណ្ណោះដែលចូលរួម ហើយតំណាងទាំងនោះមិនខ្វល់ស្តាប់សម្តីរបស់ថៃទៀត ទើបធ្វើឲ្យគេសង្ស័យថា នេះអាចជាល្បិចឈឺសាច់របស់ថៃ ដើម្បីបង្ហាញអន្តរជាតិថា ខ្លួនជាជនរងគ្រោះ៕

អត្ថបទ៖ សុខ សុវណ្ណ

ចុចអាន៖ ជាល្បិចឬយ៉ាងណា? ក្រោយអនុព័ន្ធយោធាបរទេសមិនខ្វល់ស្តាប់ ទាហានថៃ ៥នាក់ទៀតក៏ដើរជាន់មីន