សម្តេចក្រឡាហោម ស្នើឱ្យផ្តល់ព័ត៌មាន បើនគរបាល​ចរាចរណ៍​ប្រើ​អាកប្បកិរិយា​មិន​សមរម្យ

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រាប់ឱ្យប្រជាពលរដ្ឋគ្រប់រូបផ្តល់ព័ត៌មាន មកកាន់ផេកហ្វេសប៊ុករបស់សម្តេចផ្ទាល់ បើសិនជាមានមន្ត្រីនគរបាលចរាចរណ៍​ប្រើ​អាកប្បកិរិយា​មិន​ល្អ​។ សម្តេចក្រឡាហោមសន្យាថា នឹងដោះស្រាយជូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសអញ្ជើញជាអធិបតី ពិធីសម្ពោធដាក់ឱ្យប្រើប្រាស់ជាផ្លូវការ​ អាគារសិក្សានៃវិទ្យាល័យ សម្ដេចតេជោ ហ៊ុន សែន ភ្នំសំពៅ នៅខេត្តបាត់ដំបង កាលពីព្រឹកថ្ងៃទី២ ខែវិច្ឆិកា ឆ្នាំ២០២២ កន្លងទៅ រដ្ឋមន្ត្រីក្រសួងមហាផ្ទៃរូបនេះ អះអាងថា ផេកហ្វេសប៊ុករបស់សម្តេច ស្វាគមន៍ជានិច្ចចំពោះការផ្តល់ព័ត៌មានរបស់ប្រជាពលរដ្ឋ លើអាកប្បកិរិយាមិនសមរម្យ របស់កម្លាំងសមត្ថកិច្ចសម្រួលចរាចរណ៍ ខណៈក្រសួងក៏កំពុងពង្រឹងវិន័យលើបញ្ហានេះ។

បើតាមសម្តេចក្រឡាហោម បច្ចុប្បន្ននេះ មិនសូវទទួលបានការរិះគន់ទៅលើមន្ត្រីនគរបាលចរាចរណ៍ ដូចកាលពីពេលកន្លងទៅនោះទេ ដែលនេះអាចចាត់បានទុកថា​ កម្លាំងសមត្ថកិច្ចក៏ធ្វើបានល្អដែរ។

ម៉្យាងវិញទៀត សម្តេចក្រឡាហោម ស ខេង ក៏បានស្នើដល់កម្លាំងមានសមត្ថកិច្ចចរាចរណ៍ ប៉ូលិស រួមនឹងកងរាជអាវុធហត្ថ ដែលសម្រួលចរាចរណ៍ទាំងអស់ ត្រូវតែសម្រួលអាកប្បកិរិយាឱ្យបានល្អ មុឺងម៉ាត់ ទន់ភ្លន់ និងមានវិន័យថ្លៃថ្នូរជាកងនគរបាល ឱ្យមានសណ្តាប់ធ្នាប់។

ទោះជាបែបនេះក្តីសម្តេចក្រឡាហោម​ ក៏បានស្នើឱ្យមន្ត្រីនគរបាលចរាចរណ៍បំពេញតួនាទីរបស់ខ្លួនឱ្យបានល្អ ទាំងនៅចំពោះមុនថ្នាក់ដឹកនាំ និងប្រជាពលរដ្ឋ ជាពិសេស អំឡុងពេលមានគណប្រតិភូមកចូលរួមកិច្ចប្រជុំកំពូលអាស៊ានក្នុងពេលខាងមុខនេះ ដើម្បីលើកមុខមាត់កម្ពុជាដែលជាម្ចាស់ផ្ទះ៕