សណ្ឋាគារសុខាភ្នំពេញរបស់អ្នកឧកញ៉ា សុខ គង់ ទីដែលមេដឹកនាំពិភពលោកមកប្រជុំ មានលក្ខណៈពិសេសអ្វីខ្លះ?

សណ្ឋាគាររ៉េស៊ីដង់​សុខាភ្នំពេញ ត្រូវបានគេដឹងថា ជាទីតាំងសម្រាប់កិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំពាក់ព័ន្ធ ដែលប្រទេសកម្ពុជាជាម្ចាស់ផ្ទះរៀបចំនាឆ្នាំ ២០២២នេះ។ តើសណ្ឋាគារសុខាភ្នំពេញរបស់អ្នកឧកញ៉ា សុខ គង់ ជាទីដែលមេដឹកនាំអាស៊ាន និងមេដឹកនាំពិភពលោក មកប្រជុំនោះ មានលក្ខណៈពិសេសអ្វីខ្លះ?

សណ្ឋាគាររ៉េស៊ីដង់​សុខាភ្នំពេញ ​​ជាសណ្ឋាគារលំដាប់​ផ្កាយ​ ៥​ ដ៏​​ល្បី​ល្បាញ​​មួយនៅរាជធានីភ្នំពេញ ដោយ​ផ្តល់​ជូន​​​​​​នូវ​ស្ដង់ដារ​ស្នាក់នៅប្រកបដោយប្រណិតភាព​​។ សណ្ឋាគារនេះ ​​​មាន​កម្ពស់ ​១៨ជាន់ ​និងមាន​ទីតាំង​នៅ​ទល់​មុខ​ព្រះ​បរមរាជវាំង ស្ថិត​នៅ​ចំ​ចំណុច​ប្រសព្វ​នៃ​ទន្លេ​ចតុមុខ។

សណ្ឋាគារលំដាប់អភិជនមួយនេះ ​មាន​បន្ទប់​ស្នាក់​នៅ​សរុប​ ៧៤៤បន្ទប់ ​និងត្រូវ​បាន​ចែក​ចេញ​ជា​ ២​ផ្នែក ​គឺ​បន្ទប់​សណ្ឋាគារ​ ៥៤៩បន្ទប់ ​និង​ខុនដូ ១៩៥បន្ទប់។ សណ្ឋាគាររ៉េស៊ីដង់​សុខាភ្នំពេញ ​មាន​សា​ល​ប្រជុំ​ធំ​មួយ​ ដែល​អាច​ផ្ទុក​មនុស្ស​ ៣,០០០នាក់ និង​មាន​កន្លែង​ចត​យានយន្ត ៣​ជាន់ ​ដែល​អាច​ផ្តល់​ជា​ចំណត​រថយន្ត​ប្រមាណ​ ១,០០០គ្រឿង និងម៉ូតូ ​១,០០០គ្រឿង។ ក្នុងនោះ ក៏មាន​ចំណត​ឧទ្ធម្ភាគចក្រ​ ២​កន្លែង​ នៅ​លើ​ដំបូល​សណ្ឋាគារ ផងដែរ។

សូមជម្រាបថា សណ្ឋាគាររ៉េស៊ីដង់​សុខាភ្នំពេញ ត្រូវបានបុក​គ្រឹះ​សាងសង់ដំបូង ​នៅ​​ថ្ងៃ​ទី ​៨ ខែ​សីហា ​​ឆ្នាំ​ ២០០៨​ និង​ចំណាយ​ថវិកា​អស់​ប្រមាណ​​ ១២០លាន​ដុល្លារ​អាមេរិក​ ដោយ​មិន​គិត​តម្លៃ​ដី​។ ដំណើរការ​សាងសង់​ នៅ​លើ​ផ្ទៃដី​ទំហំ​ ៥ហិកតា និង​មាន​កម្ពស់​សរុប​ ៧២,៨៧ម៉ែត្រ។ សណ្ឋាគារ​នេះ ត្រូវ​ចំណាយ​ពេល​​សាង​សង់​ជាង ​៦ឆ្នាំ​ និង​បាន​បើក​សម្ពោធ​​ដាក់​ឲ្យ​ដំណើរ​ការ​ កាល​​ពី​ថ្ងៃ​ទី ​២៣ ខែ​មីនា ​ឆ្នាំ ​២០១៥ ​​ក្រោយ​អធិបតីភាពរបស់​សម្តេច​​តេជោ​ ហ៊ុន សែន​ នាយករដ្ឋមន្រ្តី​នៃកម្ពុជា៕