លើស្ពានព្រះមុនីវង្សថ្មី​សម្បូរទៅដោយ​អ្នកស្ទូចត្រីក្នុងពេល​រាត្រី

អ្នកធ្វើដំណើរឆ្លងកាត់ស្ពានព្រះមុនីវង្សថ្មី ស្ថិតក្នុងមូលដ្ឋានខណ្ឌមានជ័យ និងខណ្ឌច្បារអំពៅ ​រាជធានីភ្នំពេញ​មានការភ្ញាក់ផ្អើលដោយសារតែឃើញ​មនុស្សឈប់សំចតលើស្ពាន​យ៉ាងត្រៀប​ត្រាតែទីបំផុតទើបដឹងថាពួកឈរស្ទូចត្រី។

​អ្នកធ្វើដំណើរបាននិយាយដូចៗគ្នាថា​ ពួកគាត់បានឃើញមនុស្សឈរត្រៀបត្រា​លើចិញ្ចើម​ស្ពានព្រះ​មុនីវង្សថ្មីដែលដំបូងឡើយនឹកស្មានថា មានមនុស្សលោតទឹកប៉ុន្តែដល់​ពេលឈប់​សាកសួរទៅគួបផ្សំឃើញ​ដងសន្ទូចជាច្រើន​ផងនោះទើប​ដឹងថា​ពួកគាត់ជាអ្នកស្ទូចត្រីសោះ។

តាមការរៀបរាប់ពីប្អូនប្រុស ធន់ វិសាល រស់នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញបានប្រាប់ថា ជារៀងរាល់យប់រូបលោក និងមិត្តភក្ដិក្នុងភូមិតែងមកនាំគ្នាស្ទូចត្រីលើស្ពានព្រះមុនីវង្សថ្មីហើយស្ទូចត្រីបានគ្រាន់បើ ទោះជាមិនបានច្រើនក៏បានរួចម្ហូបជាជាងទិញត្រីចិញ្ចឹមតាមផ្សារមកធ្វើម្ហូបហើយជាត្រីទន្លេសុទ្ធសាត។

ក្រៅពីស្ទូចត្រីក៏មានអ្នកធ្វើដំណើរមកនាំគ្នាឈប់មើលការស្ទូចត្រីផងដែរ។ ត្រីដែលស្ទូចបានភាគច្រើនត្រីឆ្លាំងចាប់ពីទំងន់៣ខាំឡើងទៅ៕

អត្ថបទ៖ នរា