តើរដ្ឋមន្ត្រីរូបណា ដែលទៅទទួលស្វាគមន៍លោក Joe Biden ប្រធានាធិបតីអាមេរិក?

នៅព្រឹកថ្ងៃទី ១២ ខែវិច្ឆិកា ឆ្នាំ ២០២២នេះ លោក Joe Biden ប្រធានាធិបតីអាមេរិក និងគណៈប្រតិភូ បានធ្វើដំណើរមកដល់ប្រទេសកម្ពុជាហើយ ដើម្បីចូលរួមកិច្ចប្រជុំកំពូលប្រចាំឆ្នាំអាមេរិក-អាស៊ាន និងកិច្ចប្រជុំកំពូលអាស៊ីបូព៌ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឯព្រលានយន្ដហោះអន្តរជាតិភ្នំពេញ នៅទីតាំង VIP លោក ជា វ៉ាន់ដេត ​រដ្ឋមន្ត្រី​ក្រសួង​ប្រៃស​ណីយ៍ ​និង​ទូរគមនាគមន៍, លោក អ៊ូច បូរិទ្ធ រដ្ឋលេខាធិការក្រសួងការបរទេសកម្ពុជា បានទទួលស្វាគមន៍លោក Joe Biden ប្រធានាធិបតីអាមេរិក និងគណៈប្រតិភូរបស់លោក។ ក្នុងនោះ ក៏មានវត្តមានលោក​W. Patrick Murphy ឯក​អគ្គរដ្ឋទូត​អាមេរិក​ប្រចាំ​កម្ពុជា​ និងមន្ត្រីស្ថានទូតមួយចំនួនទៀត។

ពេលមកដល់ប្រទេសកម្ពុជាភ្លាម, លោក Joe Biden ប្រធានាធិបតីអាមេរិក មិនបានចូលរថយន្តភ្លាមៗនោះទេ ដោយដើរទៅកាន់ក្រុមមនុស្សមួយក្រុម ដែលកំពុងឈររង់ចាំលោកនៅព្រលានយន្ដហោះអន្តរជាតិភ្នំពេញ និងមានការជជែកគ្នាមួយចំនួនដែរ មុនឡើងរថយន្ត។

សូមជម្រាបថា លោក Biden គឺជា​ប្រធានាធិបតី​អាមេរិក​កំពុង​កាន់តំណែង​ទី ២ ដែល​ធ្វើ​ដំណើរ​ទៅ​ប្រទេស​កម្ពុជា​ ដើម្បី​ចូលរួម​កិច្ច​ប្រជុំ​កំពូល​អាស៊ាន និង​កិច្ច​ប្រជុំ​កំពូល​ពាក់ព័ន្ធ ក្នុង​ពេល​កម្ពុជា​កាន់​តួនាទី​ជា​ប្រធាន​អាស៊ាន​ប្តូរវេន។ កាលពី​ឆ្នាំ ២០១២ លោក Barack Obama ដែល​ជា​ប្រធានាធិបតី​កាន់តំណែង​នា​ពេល​នោះ បាន​ធ្វើ​ដំណើរ​​ទៅ​កម្ពុជា ​ដើម្បី​ចូលរួម​កិច្ច​ប្រជុំ​ថ្នាក់​តំបន់​ និង​សកល​លោក​នេះ។

នៅប្រទេសកម្ពុជា លោក Joe Biden នឹងបញ្ជាក់ជាថ្មី នូវការប្តេជ្ញាចិត្តយូរអង្វែងរបស់សហរដ្ឋអាមេរិក ចំពោះតំបន់អាស៊ីអាគ្នេយ៌ និងមជ្ឈភាពអាស៊ាន និងពង្រឹងបន្ថែមលើជោគជ័យ នៃកិច្ចប្រជុំកំពូលពិសេសជាប្រវត្តិសាស្រ្ត អាមេរិក-អាស៊ាន នៅទីក្រុង Washington នាពេលកន្លង។ 

ជាមួយគ្នានេះ លោកប្រធានាធិបតីអាមេរិក នឹងបញ្ជាក់ពីសារសំខាន់នៃកិច្ចសហប្រតិបត្តិការ អាមេរិក-អាស៊ាន នៅក្នុងការធានាសន្តិសុខ និងវិបុលភាព នៅក្នុងតំបន់ និងសុខមាលភាព នៃប្រជាជនរបស់អាស៊ាន-អាមេរិក ដែលមានចំនួនសរុប ១ពាន់លាននាក់។

តាមគម្រោង សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ ក៏នឹងមានជំនួបសម្តែងការគួរសម និងពិភាក្សាការងារជាមួយលោក Joe Biden ប្រធានាធិបតីអាមេរិក ផងដែរ៕