ពលរដ្ឋរស់នៅក្រុងខេមរភូមិន្ទ ស្នើអាជ្ញាធរពន្លឿនការស្ថាបនាផ្លូវបេតុងមួយខ្សែ ក្រោយរៀបចំប្រព័ន្ធលូរំដោះទឹករួច

ខណៈប្រព័ន្ធលូរំដោះទឹកស្អុយសាងសង់រួចហើយ តែផ្លូវបេតុងថ្មីមិនទាន់ធ្វើ ប្រជាពលរដ្ឋរស់នៅក្រុងខេមរភូមិន្ទ បានស្នើដល់អាជ្ញាធរខេត្តកោះកុង ពន្លឿនស្ថាបនាផ្លូវបេតុងឲ្យឆាប់រហ័ស ដោយមិនចង់លំបាកធ្វើចរាចរណ៍ទៅមកទៀត។

កំណាត់ផ្លូវចាប់ពីកែងមុខមន្ទីរផែនការខេត្តកោះកុង រហូតដល់ផ្លូវកែងផ្ទះលោក ចេង ឪ ស្ថិតក្នុងសង្កាត់ស្មាច់មាន័យ កំពុងជួបការលំបាកធ្វើដំណើរ បន្ទាប់ពីក្រុមហ៊ុនម៉ៅការសាងសង់ បានរៀបចំប្រព័ន្ធលូរំដោះទឹករួចរាល់ជាង ១ខែកន្លងទៅនេះ។

លោក ស៊ី សុខុម និងលោក ឈឿន សារឿង តំណាងប្រជាពលរដ្ឋរស់នៅក្នុងក្រុងខេមរភូមិន្ទ បានឲ្យដឹងនៅរសៀលថ្ងៃទី ២៣ ខែវិច្ឆិកាថា គម្រោងឈូសឆាយផ្លូវ រៀបចំប្រព័ន្ធលូលើកំណាត់ខាងលើនេះបានបញ្ចប់ហើយ នៅឡើយតែផ្លូវបេតុងមិនទាន់ឃើញអាជ្ញាធរ ឬក្រុមហ៊ុនម៉ៅការសាងសង់មិនអនុវត្ត។

បើតាមពលរដ្ឋ ពេលមានភ្លៀងធ្លាក់វាកើតជង្ហុកទឹកដក់ជ្រៅ ងាយបង្កគ្រោះថ្នាក់ដល់អ្នកដំណើរ ពិសេ​សសិស្សានុសិស្ស ដែលរៀនសូត្រនៅសាលាបឋមសិក្សាទីរួមខេត្ត។ ដូច្នេះពួកគាត់ស្នើដល់អាជ្ញាធរក្រុមហ៊ុនម៉ៅការសាងសង់ ពន្លឿនការធ្វើផ្លូវបេតុងឲ្យបានឆាប់រហ័ស សម្រួលការធ្វើដំណើរទៅមកមានសុវត្ថិភាព និងលើកកម្ពស់សោភ័ណ្ឌភាពទីក្រុងផងដែរ។

ជុំវិញការលើកឡើរបស់ប្រជាពលរដ្ឋ ដែលមានតម្រូវការបែបនេះ លោក វ៉ែន សុខា នាយកទីចាត់ការផែនការ និងវិនិយោគរបស់រដ្ឋបាលខេត្តកោះកុង ថ្លែងថា ដំណើរការធ្វើផ្លូវបេតុងប្រវែងជាង ៨០០ម៉ែត្រ ទទឹង ៧ម៉ែត្រ និងកម្រាស់ ១តឹកកន្លះមិនទាន់ធ្វើបានទេ ដោយសារតែអាកាសធាតុមិនអំណោ​យផល ព្រោះភ្លៀងធ្លាក់ច្រើនជាបន្តបន្ទាប់។

រីឯកម្មករភាគចំនួន បែរទៅរៀបចំសួនច្បារផ្លូវភ្លោះ ចាប់ពីកែងផ្លូវកោះប៉ោ រហូតដល់រង្វង់ស្តូប។ ទន្ទឹមនេះ លោក វ៉ែន សុខា ក៏សុំការអធ្យាស្រ័យយោគយល់ពីប្រជាពលរដ្ឋ អ្នកប្រើប្រាស់ផ្លូវ មេត្តាអនុគ្រោះចំពោះការលំបាកធ្វើដំណើរទៅមករយៈពេលធំ លើកំណាត់ផ្លូវ ១ខ្សែ ហើយរង់ចាំរយៈពេលខ្លីបន្តិចទៀត នឹងមានផ្លូវបេតុងស្អាតល្អងាយស្រួលធ្វើដំណើរ៕

អត្តបទ៖ សិរីវឌ្ឍនៈ