អគារប៉ុស្តិ៍នគរបាលត្នោត ស្រុកកំពង់រោទិ៍ តម្លៃជាង ១ម៉ឺនដុល្លារ បានដាក់ឱ្យដំណើរការ​ជាផ្លូវការ

(ស្វាយរៀង): នៅរសៀលថ្ងៃទី២៥ ខែវិច្ឆិកា ឆ្នាំ២០២២ លោកឧត្តមសេនីយ៍ត្រី ពេជ្រ វីរៈ ស្នងការនគរបាលខេត្ត រួមជាមួយលោក សុខ សំអុល ប្រធានក្រុមប្រឹក្សាស្រុក និងលោក សុច ពិសី អភិបាលស្រុកកំពង់រោទិ៍ បានអញ្ជើញ​ជាអធិបតីក្នុងពិធី កាត់ខ្សែបូរណ៍សម្ពោធដាក់ឱ្យប្រើប្រាស់ជាផ្លូវការអគារថ្មី ប៉ុស្តិ៍នគរបាលរដ្ឋបាលត្នោត នៃអធិការ​ដ្ឋាននគរបាលស្រុកកំពង់រោទិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានប្រសាសន៍នៅក្នុងពិធីសម្ពោធអាគារប៉ុស្តិ៍នគរបាលរដ្ឋបាល លោកឧត្តមសេនីយ៍ត្រី ពេជ្រ  វីរៈ ស្នងការនគរ​បាលខេត្ត បានធ្វើការកោតសរសើរដល់កម្លាំងសមត្ថកិច្ចនគរបាលនៅគ្រប់មូលដ្ឋាន​ដែលបានសហការគ្នាល្អ​ជាមួយប្រជាពលរដ្ឋក្នុងការបង្ក្រាបបទល្មើសនានារក្សាបាននូវសន្តិសុខ សណ្តាប់ធ្នាប់ សុវត្ថិភាព  ជូនប្រជាពលរដ្ឋ​បានល្អនៅក្នុងមូលដ្ឋានរបស់ខ្លួន។

លោកស្នងការនគរបាលខេត្ត បានបញ្ជាក់ថា ពេលនេះគឺនគរបាលឃុំត្នោត ស្រុកកំពង់រោទ៍  បានទទួលសមិទ្ធផលថ្មី គឺអគារប៉ុស្តិ៍នគរបាលរដ្ឋបាល សម្រាប់ឲ្យមន្ត្រីនគរបាលយើងមានកន្លែងធ្វើការសមរម្យ  ក្នុងការការពារសន្តិសុខ​និងផ្ដល់សេវាសាធារណៈនានាជូនប្រជាពលរដ្ឋនៅក្នុងមូលដ្ឋាននេះ។

លោកឧត្តមសេនីយ៍ត្រីស្នងការនគរបាលខេត្ត  បានផ្ដាំផ្ញើដល់មន្ត្រីនគរបាលនៅទីនោះ  ត្រូវ សាមគ្គីសហការគ្នា​ឲ្យបានល្អក្នុងការការពារសន្តិសុខជូនប្រជាពលរដ្ឋគោរពវិន័យការងារនិងខិតខំធ្វើ ការតាមតួនាទីភារកិច្ចរបស់​ខ្លួនឲ្យបានល្អប្រសើរ  បន្តអនុវត្តគោលនយោបាយភូមិឃុំមានសុវត្ថិភាពដើម្បីក្នុងមូលដ្ឋានរបស់ខ្លួនគ្មានកើតឡើងលើក នូវបទល្មើសនានាក្នុងមូលដ្ឋានរបស់ខ្លួន។

សូមបញ្ជាក់ថា អគារថ្មីប៉ុស្តិ៍នគរបាលរដ្ឋបាលត្នោត ដែលបានសម្ពោធឱ្យប្រើប្រាស់មានទំហំ  ៥,២x១៣,៥០ ម៉ែត្រ បានចំណាយថវិកា ១៥,០០០ដុល្លា ជាអំណោយឧត្តមសេនីយ៍ឯក កឹង ឃន អគ្គស្នងការរងនគរបាលជាតិ៕ ដោយ:ភក្ដី