បណ្ឌិត ហ៊ុន ម៉ាណែត រំលឹក​ដល់​អតីតសាកលវិទ្យាធិការទី១ សាកលវិទ្យាល័យអន្តរជាតិ

ឯកឧត្តម បណ្ឌិត ហ៊ុន ម៉ាណែត ក្នុងពិធីអបអរសាទរខួប២០ ឆ្នាំ នៃការបង្កើតសាកលវិទ្យាល័យអន្តរជាតិ IU ដែល​រៀបចំ​ឡើង​កាលពីម្សិលមិញនេះ​បាន​រំលឹក​អតីតសាកលវិទ្យាធិការទី១ នៃសាកលវិទ្យាល័យអន្តរជាតិ លើចក្ខុវិស័យលើកស្ទួយវិស័យអប់រំ។

ឯកឧត្តម​ បណ្ឌិត ហ៊ុន ម៉ាណែត អគ្គមេបញ្ជាការរងនិងជាមេបញ្ជាការកងទ័ពជើងគោកនៃកងយោធពលខេមរភូមិន្ទ​បាន​ឲ្យ​ដឹង​ថា ក្រោមការដឹកនាំរបស់គណៈគ្រប់គ្រងទាំងមូល សាកលវិទ្យាល័យអន្តរជាតិ​ បានពង្រឹងនិងពង្រីកសក្តានុពលរបស់ខ្លួនក្នុងបេសកកម្មនៃការបណ្តុះបណ្តាលប្រកបដោយគុណភាព និងកិត្យានុភាព ក្នុងក្របខណ្ឌជាតិនិងអន្តរជាតិ ក្នុងទិសដៅឆ្លើយតបទៅនឹងតម្រូវការ និងការវិវឌ្ឍនៃសង្គម-សេដ្ឋកិច្ចក្នុងយុគសម័យនៃបដិវត្តន៍ឧហ្សាហកម្មជំនាន់ទី ៤ និងឌីជីថលរូបនីយកម្ម ក្រោមកិច្ចសហការជាមួយស្ថាប័ន, អង្គភាព និងដៃគូក្នុងរាជរដ្ឋាភិបាល, វិស័យឯកជន និងក្រៅប្រទេស។

ក្នុង​ឱកាស​នោះ ឯកឧត្តម​បណ្ឌិត​ក៏បាន​សម្តែងនូវការរឭកនឹកឃើញ និងឧទ្ទិសកុសលផលបុណ្យជូនដល់វិញ្ញាណក្ខន្ធ​សាស្ត្រាចារ្យ អ៊ួន សាបូ ដែលជាអតីតសាកលវិទ្យាធិការទី១ នៃសាកលវិទ្យាល័យអន្តរជាតិ ដែលលោកតែងមានទស្សនៈវែងឆ្ងាយក្នុងការលើកស្ទួយវិស័យអប់រំ ឱ្យបានរីកចម្រើនលូតលាស់សម្រាប់បណ្តុះពុទ្ធិដល់កូនខ្មែរជំនាន់ក្រោយៗ។

ឯកឧត្តម​បន្ត​ថា សមិទ្ធផលគួរជាទីមោទនៈទាំងអស់នេះ បានស្តែងឱ្យឃើញអំពីតួនាទីមិនអាចអាចខ្វះបាននៃវិស័យឯកជន នៅក្នុងការចូលរួមបណ្តុះបណ្តាល និងបង្កើតធនធានមនុស្សកម្ពុជា ដើម្បីឈានទៅសម្រេចបានតាមគោលដៅនៃគោលនយោបាយអភិវឌ្ឍវិស័យអប់រំ ដែលជាមូលដ្ឋានគ្រឹះនៃការអភិវឌ្ឍសង្គម-សេដ្ឋកិច្ច។

ជាមួយនឹងការអភិវឌ្ឍធនធានមនុស្សតាមរយៈការអប់រំ រាជរដ្ឋាភិបាល កំពុងយកចិត្តទុកដាក់លើផ្នែកមួយទៀតគឺការធានាឱ្យប្រជាពលរដ្ឋមានសុខភាពល្អ ព្រោះថាប្រទេសជាតិមួយមានការអភិវឌ្ឍប្រកបដោយភាពធន់, ចីរភាព និងមានភាពប្រកួតប្រជែងខ្ពស់ លុះត្រាតែប្រជាពលរដ្ឋមានចំណេះ, ជំនាញ និងសុខភាពល្អបរិបូណ៌។

សុខភាពល្អបរិបូណ៌នេះ គឺជាទ្រព្យធនដ៏មានតម្លៃមហាសាលនិងជាកត្តាចាំបាច់មិនអាចខ្វះបាននៅក្នុងកិច្ចដំណើរការនៃការអភិវឌ្ឍជាតិ។

ជាមួយគ្នានេះ លោក​បណ្ឌិត​ក៏​ធ្វើការលើកទឹកចិត្តបន្ថែមទៀតដល់ថ្នាក់ដឹកនាំសាកលវិទ្យាល័យអន្តរជាតិគ្រប់កម្រិត និងគ្រប់ផ្នែកបន្តយកចិត្តទុកដាក់រៀបចំកម្មវិធីសិក្សារបស់ខ្លួនឱ្យស្របតាមស្តង់ដារកម្មវិធីសិក្សាជាតិ និងអន្តរជាតិ ទាំងក្នុងវិស័យសុខាភិបាល និងក្រៅវិស័យសុខាភិបាល ដែលសាកលវិទ្យាល័យអន្តរជាតិ កំពុងអនុវត្តនៅតាមសាខារបស់សាកលវិទ្យាល័យដែលមានស្រាប់ មិនថានៅរាជធានីភ្នំពេញ ឬតាមបណ្តាខេត្តនោះឡើយ។