ចង់​រៀន​ជំនាញ​កសិឧស្សាហកម្ម​ គួរ​ស្វែង​យល់​ចំណុចអ្វីខ្លះ?

ជំនាញ​កសិឧស្សាហកម្ម ជា​មុខ​ជំនាញ​មួយ​មាន​ភាព​ទូលំទូលាយ អាច​ឱ្យ​សិស្ស​ស្វែង​យល់​​ពី​ការ​កែច្នៃ​ចំណីអាហារជា​ផលិតផល​សម្រេច។

ជំនាញ​កសិឧស្សាហកម្ម សិក្សា​ផ្ដោត​សំខាន់​​លើ​ការ​កែច្នៃ​អាហារ ការ​រក្សា​គុណ​ភាព​អាហារ ការ​សិក្សា​លើ​អតិសុខុមប្រាណ សិក្សា​លើ​សារធាតុ​ចិញ្ចឹម ទី​ផ្សារ​ផលិតផល និង​សេដ្ឋកិច្ច​ជា​ដើម។

ក្រោយ​បញ្ចប់ការ​សិក្សា សិស្ស​នឹង​យល់ដឹងពីមូលដ្ឋានគ្រឹះក្នុងការកែច្នៃកសិផល បច្ចេកវិទ្យា និងវិទ្យាសាស្រ្តអាហារ យល់​ដឹងពីបច្ចេកវិទ្យាក្រោយការប្រមូលផល និងបច្ចេកវិទ្យាជីវអាហារ រួម​ទាំង​ការគ្រប់គ្រងសុវត្ថិភាពអាហារ។

ការសិក្សា​ជំនាញ​​​កសិឧស្សាហកម្ម​ ​ត្រូវ​មានមូលដ្ឋាន​គ្រឹះ​​ផ្នែក​ ជីវវិទ្យា និង​រូបវិទ្យា ដោយកម្រិត​​ថ្នាក់​បរិញ្ញាបត្រ​សិក្សា​រយៈពេល ៤ ឆ្នាំ។

ក្រោយ​បញ្ចប់​ការ​សិក្សា សិស្ស​អាច​​ទៅ​បម្រើការងារ​ពាក់ព័ន្ធ​មុខ​ជំនាញ​កសិឧស្សាហកម្ម​មាន​៖

-សាស្រ្តាចារ្យ​​ នៅតាមគ្រិះស្ថានសិក្សា
-អ្នកវិទ្យាសាស្ត្រស្រាវជ្រាវ (វេជ្ជសាស្ត្រ)
-អ្នកជំនាញព្យាបាលដោយតមអាហារ
-អ្នកវិទ្យាសាស្រ្តអភិវឌ្ឍន៍ផលិតផល / ដំណើរការ
-មន្រ្តីកិច្ចការបទបញ្ញត្តិ
-អ្នកនិពន្ធវិទ្យាសាស្ត្រ​ (ឯកសាបែបវិទ្យាសាស្ត្រ)
-មន្ត្រីតាមក្រសួងពាក់ព័ន្ធ
-អ្នកបច្ចេកទេសចំណីអាហារ
-អ្នកព្យាបាលដោយសារធាតុចិញ្ចឹម
-អ្នកគ្រប់គ្រងគុណភាព
-អ្នកបច្ចេកទេសខាងផលិត
-អ្នកបច្ចេកទេសមន្ទីរពិសោធន៍វិទ្យាសាស្ត្រ

ជំនាញ​កសិឧស្សាហកម្ម​មាន​សិក្សា​នៅ​សាកលវិទ្យាល័យ​ភូមិន្ទ​កសិកម្ម​ សាកលវិទ្យាល័យមានជ័យ វិទ្យាស្ថាន​កសិកម្ម​ព្រែកលាប និង​គ្រឹះស្ថាន​សិក្សា​មួយ​ចំនួន​ទៀត។

​ប្រទេស​កម្ពុជា​ទីផ្សារ​​កសិឧស្សាហកម្ម​កំពុង​មាន​ការ​​ខ្វះខាត​ ខណៈការ​ចាប់​យក​​ជំនាញ​​នេះ​ក៏​អាច​ចូលរួម​​ជួយ​អភិវឌ្ឍន៍​ប្រទេស​ឱ្យ​មាន​ភាព​ជឿនលឿន​រីក​ចម្រើន​ទៅ​មុខ៕

ដោយ៖ ថារី