លោក ឌិត ទីណា ៖ សាលាកសិកម្ម​បានបណ្តុះបណ្តាលថ្នាក់ដឹកនាំជាច្រើន ត្រូវបន្តកសាង ​និងថែទាំកេរ្តិ៍ឈ្មោះនេះ

សកលវិទ្យាល័យភូមិន្ទកសិកម្ម មានកិត្តិនាមល្អ និងបានជួយបណ្តុះបណ្តាលថ្នាក់ដឹកនាំក្នុងវិស័យនេះជាច្រើន។ លោករដ្ឋមន្រ្តីថ្លែងបែបនេះ នៅក្នុងជំនួបសំណេះសំណាលជាមួយសាស្ត្រាចារ្យ​ លោកគ្រូ អ្នកគ្រូ និងនិស្សិត​នៃសាកលវិទ្យាល័យភូមិន្ទកសិកម្ម កាលពីថ្ងៃទី ០១ ខែ ធ្នូ ឆ្នាំ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាឱកាសនេះ រដ្ឋមន្រ្តីវ័យក្មេង លោក ឌិត ទីណា បានផ្តាំផ្ញើចំនួនបីចំណុច ដើម្បីបន្តអភិវឌ្ឍវិស័យកសិកម្ម រួមមាន៖

១. សាកលវិទ្យាល័យ​ គឺជាកន្លែងផ្តល់កិត្តិយស កិត្តិស័ព្ទ​ មោទកភាព និងទំនុកចិត្ត​ ដល់សាស្ត្រាចារ្យ​ និង​និស្សិត។ កេរ្តិ៍ឈ្មោះល្អ​ កើតចេញពី ការខិតខំចូលរួមកសាងទាំងអស់គ្នា​ឥតឈប់ឈរ​។ សាកលវិទ្យាល័យយើងមានប្រវត្តិយូរមក​ហើយ​ក៏មានកិត្តិនាមល្អបានបណ្ដុះបណ្ដាលថ្នាក់ដឹងនាំវិស័យកសិកម្មជាច្រើន ដូច្នេះ​ យើងត្រូវបន្តកសាងនិងថែរក្សា​កេរ្តិ៍ឈ្មោះនេះ។

២. សាស្ត្រាចារ្យ​ គឺជាអ្នកផ្តល់ចំណេះដឹង​ និងបណ្តុះបណ្តាលធនធានមនុស្ស​។ កាលណាធនធានមនុស្សយើងខ្លាំង​ នោះយើងអាចបង្កើត​ស្នាដៃ​ និងអភិវឌ្ឍប្រទេសបានគ្រប់វិស័យ​ រួមទាំងកសិកម្មផងដែរ។ លោកគ្រូ អ្នកគ្រូ​ គឺជាអ្នក​ចាក់​សោរបើកទ្វារឱ្យសិស្សគ្រប់រូបបានចូលចាប់យកចំណេះដឹង​ ហេីយនៅពេលបានឃើញសិស្សជោគជ័យ កំលាំងចិត្តពី​មោទកភាពរបស់លោកគ្រូ អ្នកគ្រូគឺជារង្វាន់ដ៏ធំបំផុត។

៣. និស្សិតត្រូវមានគោលដៅជីវិត​ច្បាស់លាស់ និងតស៊ូប្រឹងប្រែងដើម្បីភាពជោគជ័យនៅក្នុងជីវិត។ គ្មានអ្នកណា​អាចទទួលខុសត្រូវលើអនាគតរបស់យេីងជាងយើងខ្លួនឯងនោះទេ។ យើងត្រូវមានផែនការជាក់លាក់ ត្រូវធ្វើការ​ងារតូចតាចឱ្យបានសម្រេចនិងឱ្យកាន់តែបានល្អ។ បើយើងជាធនធានមនុស្សល្អ មិនខ្វះទេអ្នកត្រូវការយើង។

សូមបញ្ជាក់ថា លោក ឌិត ទីណា ត្រូវបាន​ព្រះ​មហាក្សត្រ​​ចេញ​ព្រះរាជក្រឹត្យ​តែង​តាំង​ជា​រដ្ឋមន្រ្តី​ក្រសួង​កសិកម្ម រុក្ខាប្រមាញ់ និងនេសាទ កាលពី​ថ្ងៃទី​១៤​ តុលា និង​បាន​ចូលកាន់តំណែងនៅ​ថ្ងៃទី​១៧ តុលា៕