សម្ដេចតេជោ ៖ រដ្ឋកំពុងសិក្សាគម្រោងសាងសង់ផ្លូវដែកល្បឿនលឿន ពីរាជធានីភ្នំពេញទៅកាន់ខេត្តព្រះសីហនុ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងឲ្យដឹងថា រាជរដ្ឋាភិបាល កំពុងសិក្សាលើគម្រោងសាងសង់ផ្លូវដែកល្បឿនលឿន ពីរាជធានីភ្នំពេញទៅកាន់ខេត្តព្រះសីហនុ និងពីខេត្តព្រះសីហនុទៅកាន់ព្រំដែនប្រទេសថៃ។ ការឲ្យដឹងរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ផ្លូវលេខ ១៤៦B តភ្ជាប់ទៅផ្លូវលេខ ១៤៨ ក្នុងខេត្តព្រះសីហនុ នាព្រឹកថ្ងៃទី ២២ ខែធ្នូនេះ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «យើងមានផ្លូវហើយស្រេច ធ្វើបើសិនយើងសម្រេចចិត្តនឹងធ្វើទៅលើរឿងនេះ ចំណាយពេលវេលាវាមិនយូរទេ ដោយសារតែយើងមានផ្លូវដែកចាស់រួចស្រេច ផ្លូវដែកចាស់មិនអាចនឹងបម្រើឲ្យការអភិវឌ្ឍវិស័យសេដ្ឋកិច្ចបានទេ»។

សម្ដេចតេជោ ហ៊ុន សែន បានឲ្យដឹងដែរថា កាលពីថ្ងៃទី ៩ ខែវិច្ឆិកាកន្លងទៅនេះ នាយករដ្ឋមន្ត្រីចិន ក៏បានលើកឡើងជុំវិញគម្រោងសាងសង់ផ្លូវដែកល្បឿនលឿននេះ ក្នុងការចរចានាពេលខាងមុខ៕