សម្ដេចតេជោ ៖ ចិនជួយសាងសង់ផ្លូវរបស់កម្ពុជាចំនួន ៣០ខ្សែ ដែលចំណាយថវិកាអស់ជិត ២,០០០លានដុល្លារ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា រដ្ឋាភិបាលចិន បានរួមចំណែកជួយសាងសង់ផ្លូវរបស់កម្ពុជាចំនួន ៣០ខ្សែ មានប្រវែងជាង ៣,០០០គីឡូម៉ែត្រ ដែលចំណាយថវិកាអស់ជិត ២,០០០លានដុល្លារអាមេរិក។

សម្ដេចតេជោ ហ៊ុន សែន បានថ្លែងក្នុងពិធីបើកការដ្ឋានសាងសង់ លើកកម្រិតគុណភាពផ្លូវជាតិលេខ ៤១ មានប្រវែងជាង ៩៥ គីឡូម៉ែត្រ នាព្រឹកថ្ងៃទី ២៦ ខែធ្នូនេះថា រដ្ឋាភិបាលចិន បានជួយកម្ពុជាក្នុងការកសាងហេដ្ឋារចនាសម្ព័ន្ធចាំបាច់នានាដូចជា ផ្លូវ និងស្ពាន ជាដើម ដែលសាងសង់នាពេលកន្លងមក និងបាននិងកំពុងសាងសង់។

សម្ដេចតេជោ ហ៊ុន សែន បានថ្លែងបន្តថា «ក្នុងនោះ មកដល់ពេលនេះ មិត្តចិនបានចូលរួមចំណែកជួយសាងសង់ផ្លូវរបស់យើងចំនួន ៣០ខ្សែ ដែលមានប្រវែងជាង ៣,០០០គីឡូម៉ែត្រៗ ដែលចំណាយថវិកាអស់ជិត ២,០០០លានដុល្លារៗ អាហ្នឹងគឺការសាងសង់រួចហើយ ប៉ុនអាកំពុងសាងសង់គឺមានប៉ុន្មានទៀត ៣ខ្សែ ដែលត្រូវចំណាយថវិកាប្រមាណជាជាង ៥០០លានដុល្លារ»។

ចំណែកស្ពានធំៗវិញ រដ្ឋាភិបាលចិន បានជួយសាងសង់រួចចំនួន ៩ស្ពានហើយ និងកំពុងជួយសាងសង់ស្ពានមួយចំនួនទៀត៕