សម្ដេចតេជោ ហ៊ុន សែន ឧបត្ថម្ភថវិកា ១០លានរៀលដល់អ្នកស្រី ហែម ស៊ីណាត បេក្ខជនប្រឡងបាក់ឌុបវ័យ ៥៦ឆ្នាំ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រកាសឧបត្ថម្ភថវិកាចំនួន ១០លានរៀល ដល់អ្នកស្រី ហែម ស៊ីណាត ដែលជាបេក្ខជនប្រឡងបាក់ឌុបវ័យ ៥៦ឆ្នាំ ដើម្បីលើកទឹកចិត្តដល់ការរៀនពេញមួយជីវិតរបស់អ្នកស្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សូមជម្រាបថា អ្នកស្រី ហែម ស៊ីណាត អាយុ ៥៦ ឆ្នាំ មកពីភូមិថ្មរមៀល ឃុំបន្ទាយឆ្មារ ស្រុកថ្មពួក ខេត្តបន្ទាយមាន ជ័យ បានចូលរួមប្រឡងបាក់ឌុបសម័យប្រឡង ៥ ធ្នូ ២០២២។ តែលទ្ធផលអ្នកស្រី ហែម ស៊ីណាត មិនបានប្រឡងជាប់នោះឡើយ។

សម្ដេចតេជោ ហ៊ុន សែន បានបង្ហោះសារនៅលើទំព័រហ្វេសប៊ុក នារសៀលថ្ងៃទី ២៦ ខែធ្នូ ឆ្នាំ ២០២២នេះថា «ដើម្បីលើកទឹកចិត្តដល់ការរៀនពេញមួយជីវិត ខ្ញុំសូមចូលរួមឧបត្ថម្ភដល់ប្អូនស្រី ហែម ស៊ីណាតអាយុ ៥៦ឆ្នាំ ដែលបានចូលប្រឡងបាក់ឌុបហើយធ្លាក់ នូវថវិកាចំនួន ១០លានរៀល»។ ជាមួយគ្នានេះ សម្ដេចតេជោ ហ៊ុន សែន ក៏បានជូនពរអ្នកស្រី ហែម ស៊ីណាត ឲ្យប្រឡងបាក់ឌុបជាប់នៅឆ្នាំ ២០២៣ខាងមុខ។

អ្នកស្រី ហែម ស៊ីណាត ខិតខំចូលប្រឡងបាក់ឌុប ដើម្បីបំពេញក្ដីស្រមៃរបស់ខ្លួន ចង់ធ្វើជា​គ្រូបង្រៀនមួយរូប។ ទោះបីជាលទ្ធផលឆ្នាំ ២០២២នេះ មិនជាប់ក៏ដោយ ក៏អ្នកស្រី ហែម ស៊ីណាត និយាយថា នៅឆ្នាំ ២០២៣ អ្នកស្រី នឹងដាក់ពាក្យប្រឡងម្ដងទៀត៕