រដ្ឋបាលជលផល៖ រដូវធ្វើត្រីប្រហុកផ្អកនឹងចាប់ផ្តើមសម្បូរច្រើនចាប់ពីថ្ងៃទី២៩ធ្នូ ដល់ថ្ងៃទី​៣​មករា

រដ្ឋបាលជលផលនៃក្រសួងកសិកម្មរុក្ខាប្រមាញ់និងនេសាទ បានប្រកាសថា រដូវធ្វើត្រីប្រហុកផ្អកនឹងចាប់ផ្តើមសម្បូរច្រើនចាប់ពីថ្ងៃទី២៩ ខែធ្នូ ឆ្នាំ២០២២ រហូតដល់ថ្ងៃទី០៣ ខែមករា ឆ្នាំ២០២៣ខាងមុខនេះ។

យោងតាមសេចក្តីជូនដំណឹងរបស់រដ្ឋបាលជលផលចុះថ្ងៃទី២៨ធ្នូនេះបានឱ្យដឹងថា នៅក្នុងរដូវនេសាទឆ្នាំ២០២២​-​២០២៣​ តាមការសង្កេតត្រីចាប់ផ្ដើមបន្លាស់ទីចេញពីបឹងទន្លេសាប បឹងស្ទឹង​ និងព្រែកនានា ចូលទន្លេសាប
ទន្លេមេគង្គ និងទន្លេបាសាក់ដែលអំណោយផលដល់ការធ្វើនេសាទបានត្រីច្រើន ជាពិសេសគន្លងដាយត្រីតាមដងទន្លេសាប​នៅក្នុងភូមិសាស្ត្រខេត្តកណ្ដាល និងរាជធានីភ្នំពេញ ចាប់ពីថ្ងៃ ៧កើតដល់ថ្ងៃ១២កើត ខែបុស្ស ត្រូវនឹងថ្ងៃទី២៩ ខែធ្នូ ឆ្នាំ២០២២ ដល់ថ្ងៃទី០៣ ខែមករា ឆ្នាំ២០២៣ ក្នុងករណីមេឃស្រឡះល្អគ្មានភ្លៀងកក់ខែ ឬមិនទទួលរងឥទ្ធិពលព្យុះភ្លៀង។

អាស្រ័យដូចបានជម្រាបខាងលើ សូមបងប្អូនប្រជាពលរដ្ឋដែលមានបំណងធ្វើប្រហុកផ្អកត្រីឆ្អើរ ឬទឹកត្រី សូមរួសរាន់អញ្ជើញមកទិញត្រីតាមពេលវេលា និងទីកន្លែងដូចមាននៅក្នុងសេចក្តីជូនដំណឹងនេះ។ទន្ទឹមនេះរដ្ឋបាលជលផលសំណូមពរដល់អាជ្ញាធរមូលដ្ឋានឬសមត្ថកិច្ចពាក់ព័ន្ធមេត្តាបង្កលក្ខណៈងាយស្រួលជូនដល់បងប្អូនប្រជាពលរដ្ឋបាន
ធ្វើដំណើរ ស្នាក់នៅនិងដឹកជញ្ជូនផល ផលិតផលត្រីដោយរលូនតាមការគួរ៕

អត្ថបទ៖ សំអឿន