ព័ត៌មានជាតិ

សាស្រ្តាចារ្យប្រវត្តិសាស្រ្ត បំភ្លឺជុំវិញដើមកំណើតជនជាតិខ្មែរ

បានផុស

២ years មុន

នៅ

ថ្ងៃអង្គារ ១០ មករា ២០២៣

ដោយ

លោកសំបូរ មាណ្ណារ៉ា សាស្ត្រាចារ្យប្រវត្តិសាស្រ្តខ្មែរបានចេញមកពន្យល់ជុំវិញបញ្ហាទាក់ទងនឹងដើមកំណើតជនជាតិខ្មែរ ក្រោយមានការលើកឡើងថាខ្មែរមានដើមកំណើតកាត់ពីឥណ្ឌាឫចិន។

លោកសាស្ត្រាចារ្យសំបូរ មាណ្ណារ៉ា ដែលតែងតែស្រាវជ្រាវទាក់ទងវប្បធម៌និងប្រវត្តិសាស្រ្តបានធ្វើការពន្យល់ថា ខ្មែរមានកំណើតពីពួកមេឡាណេស៊ីយាងនិងឥណ្ឌូនេស៊ីយាង ហើយខ្មែរជាជនជាតិមួយស្ថិតនៅអំបូរខ្មែរមន ដែលបានមករស់នៅរាយប៉ាយលើទឹកដីនៅឧបទ្វីបឥណ្ឌូចិននិងតំបន់អាស៊ីអាគ្នេយ៍តាំងពី ៤ ០០០ ទៅ ៥ ០០០ឆ្នាំមុនគ្រិស្តសករាជ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសាស្ត្រាចារ្យភ្ញាក់ផ្អើលក្រោយមានការលើកឡើងថា ខ្មែរមានកំណើតកាត់ពូជជាមួយចិន ឬឥណ្ឌា។ លោកបានហៅការលើកឡើងនេះជាការយល់ច្រឡំ និងខ្វះការស្រាវជ្រាវច្បាស់លាស់។

លោកសាស្ត្រាចារ្យលើកឡើងភស្តុតាងថា តាមការសិក្សាស្រាវជ្រាវដោយប្រៀបធៀបសន្ទស្សន៍លលាដ៍ក្បាលមនុស្សខ្មែរនិងឥណ្ឌាមានលក្ខណៈខុសគ្នាស្រឡះ មិនមែនជាអម្បូរជាតិសាសន៍តែមួយនោះទេ។

លោកសាស្រ្តាចារ្យបន្តថា បើនិយាយពីមនុស្សសាស្រ្តវិញគឺខ្មែរមានកម្ពស់ទាបជាងឥណ្ឌា ឆ្អឹងខ្មងជើងខ្លីជាងឥណ្ឌា ដែលបញ្ជាក់ថាពូជខ្មែរខុសពីឥណ្ឌា។

ដោយឡែកទាក់ទងសង្គមសាស្រ្តនិងវប្បធម៌វិញក៏ខុសគ្នាដែរ តាំងពីសម័យដើមមនុស្សខ្មែរគឺឲ្យតម្លៃលើនារី លើកតម្កើងមាតាជាធំ ខុសពីឥណ្ឌានិងចិនឲ្យតម្លៃលើបិតាធិបតេយ្យគឺប្រុសជាធំ។

លោកសាស្ត្រាចារ្យ សំបូរ មាណ្ណារ៉ា លើកឡើងយ៉ាងដូច្នេះថា ការមិនយល់ដឹងពីប្រវត្តិសាស្ត្រមិនបានស្រាវជ្រាវឲ្យបានច្បាស់លាស់ហើយយកទៅផ្សព្វផ្សាយបន្ត នាំឲ្យមានការបកស្រាយខុសនិងភណ្ឌច្រឡំ។

បើតាមលោកសាស្រ្តាចារ្យ ពូជសាសន៍ខ្មែរកាត់ផ្សំពីអម្បូរមេឡាណេស៊ីយាងនិងឥណ្ឌូនេស៊ីយាងដែលបានចាប់កំណើតនៅលើទឹកដីរបស់ខ្លួនរាប់ពាន់ឆ្នាំ មុនកកើតរដ្ឋខ្មែរដំបូងនៅសតវត្សទី ១ ដែលបង្កើតបានសន្តតិវង្សព្រះនាង លីវ យី និងព្រះបាទហ៊ុន ទៀន តរហូតមកដល់បច្ចុប្បន្ននេះ។

រួមសេចក្ដីមកតាមរយៈភស្ដុតាងជាច្រើនបង្ហាញថា ខ្មែរជាជាតិសាសន៍មានអាយុកាលចំណាស់នៅភូមិភាគអាស៊ីអាគ្នេយ៍ហើយស្ថិតនៅក្នុងអំបូរមនុស្សមួយដោយឡែកពីអំបូរឥណ្ឌានិងចិន ហើយដែលនរវិទូលោកឲ្យឈ្មោះថា អូស្រ្ដូអាស្យាទិក (Au stroasiatiques)៕

Related Topics:លោក សំបូរ ម៉ាណារ៉ា