ដំណើរ​ទស្សនកិច្ច​មេដឹកនាំ​កម្ពុជា​ទៅ​ម៉ាល់ឌីវ ​មាន​ចុះហត្ថលេខា​លើ​ឯកសារ​ចំនួន ៦

ក្នុង​ដំណើរ​ទស្សនកិច្ច​របស់​សម្តេច​តេជោ ហ៊ុន សែន ទៅ​សាធារណរដ្ឋ​ម៉ាល់ឌីវ នឹង​មាន​ការ​ចុះ​ហត្ថលេខា​លើ​ឯកសារ​ចំនួន ៦។

លោក ស្រី ថាំរ៉ុង រដ្ឋមន្ត្រីប្រតិភូអមនាយករដ្ឋមន្ត្រីបានថ្លែងថា ក្នុង​ដំណើរ​ទស្សនកិច្ច​របស់​មេដឹកនាំ​កម្ពុជា​ទៅ​ប្រទេស​ម៉ាលឌីវ នឹង​មានការ​ចរចានិង​ចុះ​ហត្ថលេខា​លើ​ឯកសារ​ចំនួន ៦ ពាក់ព័ន្ធ​​វិស័យ​ទំនាក់ទំនង​ការទូត សុខាភិបាល និង​ទេសចរណ៍។

ដំណើរទស្សនកិច្ច​រយៈពេល ៣ ថ្ងៃ ក្រៅពី​ជំនួប​ជាមួយ​ប្រធានាធិបតី​ម៉ាល់ឌីវ លោក អ៉ីប្រាហ៉ីម ម៉ូហាមេដ សូលី ​ប្រមុខ​ដឹកនាំ​កម្ពុជា​សម្តេច​តេជោ ហ៊ុន សែន ក៏​នឹង​ទទួល​ជួប​ថ្នាក់​ដឹកនាំ​ប្រទេស​ម៉ាល់ឌីវ​មួយ​ចំនួន​ទៀត មាន​អនុ​ប្រធានាធិបតី​ម៉ាល់ឌីវ ប្រធាន​សភា ប្រធាន​តុលាការ​កំពូល និង​រដ្ឋមន្រ្តី​ក្រសួង​ការបរទេស​របស់ប្រទេស​ម៉ាល់ឌីវផង​ដែរ។

តបតាមការអញ្ជើញរបស់លោក អ៉ីប្រាហ៉ីម ម៉ូហាមេដ សូលី ប្រធានាធិបតីនៃសាធារណរដ្ឋម៉ាល់ឌីវ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជាបាន​ដឹកនាំគណៈប្រតិភូជាន់ខ្ពស់ទៅបំពេញទស្សនកិច្ចផ្លូវការ នៅសាធារណរដ្ឋម៉ាល់ឌីវ​រយៈពេល ៣ ថ្ងៃ ពីថ្ងៃទី១៥ ដល់ថ្ងៃទី១៧ ខែមករា ឆ្នាំ២០២៣។

ដំណើរ​ទស្សនកិច្ច​របស់​មេដឹកនាំ​កម្ពុជា​ទៅ​ប្រទេស​ម៉ាល់ឌីវ ក៏​មានការ​ចូលរួមអម​ដំណើរ​ដោយ​លោក​ ប្រាក់ សុខុន រដ្ឋមន្រ្តីការបរទេសនិងសហប្រតិបត្តិការអន្តរជាតិ, លោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស, លោក ថោង ខុន រដ្ឋមន្រ្តីក្រសួងទេសចរណ៍, លោក ម៉ម ប៊ុនហេង រដ្ឋមន្រ្តីក្រសួងសុខាភិបាល ព្រមទាំងឥស្សរៈជនជាន់ខ្ពស់នៃរាជរដ្ឋាភិបាលនិងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងដែរ៕